Boksmaer

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.

Ligking vaan Boksmaer in Braobant

Boksmaer (officieel Boxmeer) is e dörp en 'n gemeinte in 't noordooste vaan de Nederlandse provincie Noord-Braobant, aon de Maos, tege de grens mèt Nederlands Limburg aon. Neve 't dörp Boksmaer umvat de gemeinte ouch de kèrne Bäöge (Beugen), Groeninge (Groeningen), Holthaes (Holthees), Maashaes (Maashees), Oefelt (Oeffelt), Overloon, Rijkevoort, Sambaek (Sambeek), Vierlingsbaek (Vierlingsbeek) en Vortum-Mullem. Besjèrmheilege vaan Boksmaer is Sint-Pieter.

Väöl vaan de dörper ligke aon de Maos, dee 't landsjap wiedgoond vörmgief. Zoe ligk dao 't natuurgebeed Maashegge. In 't dörp ligke oonder mie twie kloesters en de restante vaan 'n in 1806 aofgebroke kestiel. De aw dörpskèrk woort in 1944 bij de Bevrijing door de Geallieerde verweus en tenao neet mie opgebouwd. E paar stökker vaan 't interieur zien euvergebrach in de nui kèrk.

In Boksmaer vint eder jaor 'n Heilegbloodpercessie plaots. Mèt vastelaovend hèlt me dao de "metweursrènne". Einen daag nao de Tour de France weurt dao de fietsrènrónd "Daags na de Tour" gehawwe.

In 1942 woort de gemeinte Sambaek aon Boksmaer touwgeveug. In 1994 volgde Oefelt en Rijkevoort, in 1998 teslotte bereikde de gemeinte mèt de touwvoging vaan Vierlingsbaek zienen huiegen umvaank.