Abe Lenstra

Ut Wikipedy

Abe Lenstra (27 novimber 1920 - 2 septimber 1985), ek wol ús Abe, is dé Fryske fuotballeginde. As 16-jierrige makke er syn debút yn it 1e fan VV Heerenveen, de klup dêr't letter Sportklup It Hearrenfean út ûntstean soe. Op syn 19e spile er al foar it earst yn it Nederlânsk alvetal, dêr't er 47 kear foar spylje soe. Yn dy 47 wedstriden skoarde Abe 33 goals (like folle as Johan Cruijff, dy't 48 kear meispile hat). Om't er allinne op 'e posysje spylje woe wêr er it leafste spile bleau it mar by 47 wedstriden foar it Nederlânske alvetal.

Al as 14-jierrige krige Abe in oanbieding om yn Ingelân foar Huddersfield te spyljen, mar syn heit woe dat net hawwe. Letter hat Abe Lenstra sels oanbiedings wegere om yn Itaalje of Dútslân beropsfuotballer te wurden; sa't er sei om't er gjin slaaf fan sa'n klup wurde woe. Doe ek yn Nederlân it beropsfuotbal ynfierd waard hat er oant 1964 as healberops spile by "Sportclub Enschede", it lettere FC Twente.

Tegearre mei Faas Wilkes en Kick Smit stie Abe Lenstra model foar it stripfiguer Kick Wilstra.

Op 7 maaie 1950 spile Abe mei yn de histoaryske wedstriid tusken It Hearrenfean en Ajax. Mei noch mar in heal-oere op'e klok stie It Hearrenfean mei 1-5 efter. Abe Lenstra hie in grut oanpart yn de 5 goals fan It Hearrenfean dy't yn de rest fan de tiid noch makke waarden. It Hearrenfean wûn sa mei 6-5. Mei troch dat ferlies is Ajax dat jier it lânkampioenskip misrûn. Yn 1995 is yn it nei Lenstra neamde fuotbalstadion op it Hearrenfean troch Tryater in spektakelstik opfierd mei as reade line dizze wedstriid, ûnder de namme 'Abe'.

[bewurkje seksje] Literatuer

• Yme Kuiper, 'Abe Lenstra (1920-1985). Van Us Abe tot nationaal idool,' in: Fryslân, Nieuwsblad voor geschiedenis en cultuur, jg. 6 (2000), nr. 2, pp. 50-53. Online beskikber
• Johann Mast, 'Abe. Het levensverhaal van Nederlands eerste grote sportidool'. Uitgeverij Tirion