შუა საუკუნეები

ვიკიპედიიდან

შუა საუკუნეები (476 - 1492) — ძველი მსოფლიოს ისტორიის დასასრულსა და ახალი ისტორიის დასაწყისს შორის მოქცეული ათი საუკუნე.

ძველი მსოფლიოს ისტორიის დასასრულად ითვლება 476 წელი, როდესაც ერთ-ერთი გერმანული რაზმის წინამძღოლმა ოდოკარმა ბოლო მოუღო დასავლეთ რომის იმპერიას და თავი იტალიის მმართველად გამოაცხადა. ახალი დროის დასაწყისად მიჩნეულია ქრისტეფორე კოლუმბის მიერ 1492 წელს ამერიკის აღმოჩენის თარიღი.

[რედაქტირება] შუა საუკუნეები საქართველოში

476 წელს, როდესაც დაეცა დასავლეთ რომის იმპერია, ქართლში მეფობდა ვახტანგ გორგასალი. მან განამტკიცა სამეფო ხელისუფლება, საფუძველი ჩაუყარა მცხეთიდან თბილისში დედაქალაქის გადმოტანას, დააწესა კათალიკოსობა და საქართველოს ეკლესიას ავტოკეფალია მოუპოვა. ვახტანგი გმირულად დაიღუპა სასანიანთა წინააღმდეგ ბრძოლაში. მიუხედავად ვახტანგ გორგასალის მრავალმხრივი და ნაყოფიერი მოღვაწეობისა ჩვენი სამშობლოს, მისი მეფობა მაინც არ მიიჩნევა საქართველოსათვის შუა საუკუნეების დასაწყისად. საქართველოსთვის გაცილებით უფრო მეტი მნიშვნელობა ჰქონდა ქრისტიანობის სახელმწიფო რელიგიად გამოცხადებას. ამიტომ საქართველოსთვის შუა საუკუნეები იწყება ქართლის მოქცევით, ე.ი. დაახლოებით 326 წლით.