Киро Глигоров

Од Википедија, слободна енциклопедија

Киро Глигоров, роден на 3 мај 1917 година во Штип, македонски политичар. Глигоров е прв претседател на Република Македонија, функцијата ја извршува во два мандати од 1991 до 1999 година. За претседател на РМ е избран на 27 јануари 1991 година од страна на Собранието на Република Македонија, а по втор пат на 19 ноември 1994 на претседателски избори. Функцијата претседател на Републиката ја врши до 19 ноември 1999 година.

Во текот на своите два мандати ја промовира политиката на "eквидистанца" кон сите соседи на земјата: Србија и Црна Гора, Бугарија, Грција и Албанија. На 3 октомври 1995 врз него е извршен обид за атентат, по што беше оневозможен да ја врши функцијата претседател до 1996. Во тоа време како претседател согласно Уставот на Република Македонија го заменува Стојан Андов, кој во тоа време беше претседател на Македонското Собрание.

Киро Глигоров дипломирал на Правниот факултет на Универзитетот во Белград. Во време на окупацијата работил во Бугарија како стажант адвокат. Учесник е во Народноослободителната борба од 1941 година. Бил член на АСНОМ. Во Президиумот на АСНОМ бил одговорен за финансии (повереник за финансии). Бил секретар за финансии на Сојузниот извршен совет, член на Претседателството на СФРЈ и претседател на Собранието на СФРЈ.

Заедно со Борис Трајковски, Глигоров во 2005 година стана прв носител на „Орден на Република Македонија“.

[уреди] Творештво

Глигоров е автор и на неколку дела, главно пишувани по завршувањето на неговиот мандат како претседател:

• „Македонија е сè што имаме“ (2001)
• „Атентат - ден потоа“ (2002)
• „Виорни времиња : Република Македонија реалност на Балканот“ (2004) и
• „Сите југословенски (стопански) реформи“ (2006).

	Претседатели на Република Македонија
	Киро Глигоров | Борис Трајковски | Бранко Црвенковски