Воден

Од Википедија, слободна енциклопедија

Воден (грчки: Έδεσσα (Едеса)) е град во северниот дел на денешна Грција, во периферијата Централна Македонија, северо-западно од Солун, или поточно во префектурата Пела. Преку железничка пруга Воден е поврзан со Лерин и Битола кон запад, додека пак со Солун кон југо-исток. Во непосредна близина на градот се наоѓаат неколку природни езера и водопади, кои се голема туристичка атракција. Воедно, поради неговата околина се претпоставува дека го добил името Воден. Исто така и низ самиот град течат голем број на поточиња кои само ја надополнуваат целата слика. Воден има 18.250 жители.

[уреди] Македонците во Воден и воденско

Во градот и неговата околина денес живеат голем број на Македонци и македонскиот јазик сеуште се зборува во меѓусебната комуникација во повеќе воденски села и во самиот град Воден, а преку репортажа на весникот „Време“ Македонците од Воден и воденско јавно ги кажаа своите маки за изумирањето на македонскиот јазик меѓу младите и за зачувувањето на македонските традиции во воденските села (традиционалните ора). Македонската организација и политичка партија Виножито планираше да отвори македонски културен центар во градот, но тоа беше спречено од грчките власти кои воопшто не го признаваат македонското малцинство во Егејска Македонија. Партијата Виножито својата прва седница на Централниот совет ја има одржано токму во Воден на 26.1.1997.

[уреди] Историја

Градот Воден и неговата околина имаат богата историја уште од античко време. Градот Воден уште од самото основање припаѓал на античко македонското кралство, а во околината на денешниот град Воден се наоѓала и македонската престолнита Ајга. Во времето на Отоманската империја, Воден и воденско развиле многу богат македонски културен, национален и економски живот. Покрај панаѓурите кои се организирале, градот бил и попатна станица на некогаш најпрометната релација Солун - Битола. Во голем број се легендите, преданијата и фолклорот од воденскиот крај кој е неизоставен дел од македонскиот фолклор. Етничкиот состав на Воден и воденско масовно се менува по поделбата на Македонија, а поголеми размери добива со насилните иселувања и протерувања на Македонци за време на Граѓанската војна во Грција (1945-1949).