കൊല്ലവര്‍ഷ കാലഗണനാരീതി
വിക്കിപീഡിയ, ഒരു സ്വതന്ത്ര വിജ്ഞാനകോശം.
കേരളത്തിന്റേതു മാത്രമായ കാലഗണനാരീതിയാണ്‌ കൊല്ലവര്‍ഷം, അതുകൊണ്ടുതന്നെ കൊല്ലവര്‍ഷം മലയാള വര്‍ഷം എന്നും അറിയപ്പെടുന്നു. ക്രി.പി. 825-ല്‍ ആണ്‌ കൊല്ലവര്‍ഷത്തിന്റെ തുടക്കം. [1]
ഭാരതത്തിലെ മറ്റു പഞ്ചാംഗങ്ങള്‍ സൌരവര്‍ഷത്തെയും ചാന്ദ്രമാസത്തെയും അടിസ്ഥാനമാക്കി കാലനിര്‍ണ്ണയം ചെയ്തപ്പോള്‍, കൊല്ലവര്‍ഷപ്പഞ്ചാംഗം സൌരവര്‍ഷത്തെയും സൌരമാസത്തെയും ഉപയോഗിച്ചു. വേണാട്ടിലെ രാജാവായിരുന്ന ഉദയ മാര്‍‌ത്താണ്ഡ വര്‍മ്മയാണു കൊല്ലവര്‍ഷം തുടങ്ങിയതെന്ന് വിശ്വസിക്കപ്പെടുന്നു. ചിങ്ങം, കന്നി തുടങ്ങി 12 മലയാള മാസങ്ങളാണ്‌ ഉള്ളത്‌.
[തിരുത്തുക] ചരിത്രം
കൊല്ലവും വര്‍ഷവും ഒരേ അര്‍ഥമുള്ളവാക്കുകളാണ്‌ എന്നു തോന്നാമെങ്കിലും കൊല്ലം എന്ന സ്ഥലനാമവുമായി ബന്ധപ്പെട്ടാണ്‌ കൊല്ലവര്‍ഷം ഉണ്ടായിരിക്കുന്നത്‌. കൊല്ലം നഗരം സ്ഥാപിച്ചതിന്റെ ഓര്‍മ്മക്കാണ്‌ കൊല്ലവര്‍ഷം ആരംഭിച്ചതെന്നാണ്‌ ചില പണ്ഡിതന്മാരുടെ അഭിപ്രായം, എന്നാല്‍ രാജ്യതലസ്ഥാനം കൊല്ലത്തേക്കു മാറ്റിയപ്പോഴാണ്‌ കൊല്ലവര്‍ഷം തുടങ്ങിയതെന്ന് മറ്റുചിലര്‍ വാദിക്കുന്നു.
പരക്കെ അംഗീകരിക്കപ്പെട്ടിരിക്കുന്ന വാദം ഇതാണ്‌, പണ്ട്‌ ഭാരതത്തില്‍ അങ്ങോളമിങ്ങോളം പ്രചാരത്തിലിരുന്ന ഒരു കാലഗണനാരീതിയായിരുന്നു സപ്തര്‍ഷി വര്‍ഷം, കൊല്ലം ഒരു പ്രധാന വാണിജ്യകേന്ദ്രമായപ്പോള്‍ ഇവിടെയെത്തിയ കച്ചവടക്കാര്‍ അവര്‍ക്ക്‌ പരിചിതമായിരുന്ന സപ്തര്‍ഷിവര്‍ഷവും ഇവിടെ പ്രചാരത്തിലിരുന്ന കാലഗണനാരീതികളും ചേര്‍ത്ത്‌ ഉപയോഗിക്കുവാന്‍ തുടങ്ങി അത്‌ ഏറെ ബുദ്ധിമുട്ടുണ്ടായിരുന്ന കാര്യമായിരുന്നു, കാരണം സപ്തര്‍ഷിവര്‍ഷം അത്രയൊന്നും കൃത്യമല്ലായിരുന്നു, കൂടാതെ തദ്ദേശീയ കാലഗണനാരീതികളുടെ മാസവിഭജനരീതികളും കൃത്യമല്ലായിരുന്നു. അതുകൊണ്ട്‌ അവര്‍ ഇവ രണ്ടും ചേര്‍ത്ത്‌ പുതിയൊരു കാലഗണനാരീതി ഉണ്ടാക്കാന്‍ തീരുമാനിച്ചു. ഓരോ നൂറുവര്‍ഷം കൂടുമ്പോഴും വീണ്ടും ഒന്നുമുതല്‍ ആരംഭിക്കുന്ന രീതിയായിരുന്നു സപ്തര്‍ഷിവര്‍ഷത്തിനുണ്ടായിരുന്നത്‌. ക്രി.മു 76-ല്‍ തുടങ്ങിയ സപ്തര്‍ഷിവര്‍ഷം അതിന്റെ നൂറുവീതമുള്ള പത്താമത്തെ ചക്രം ആരംഭിച്ചത്‌ ക്രി.പി. 825-ല്‍ ആണ്‌. ആ സമയം നോക്കി വ്യാപാരികള്‍ പുതിയ സമ്പ്രദായം തുടങ്ങുകയും ചെയ്തു.
[തിരുത്തുക] കാലവിഭജനം
ചിങ്ങം, കന്നി, തുലാം, വൃശ്ചികം, ധനു, മകരം, കുംഭം, മീനം, മേടം, ഇടവം, മിഥുനം, കര്‍ക്കടകം എന്നിങ്ങനെ 28 മുതല്‍ 32 വരെ ദിവസങ്ങള്‍ ഉണ്ടാകാവുന്ന പന്ത്രണ്ട്‌ മാസങ്ങളായാണ്‌ കൊല്ലവര്‍ഷത്തെ തിരിച്ചിരിക്കുന്നത്‌. സൌരരാശികളുടെ പേരുകളാണിവ. ഓരോ മാസത്തിലും സൂര്യന്‍ അതത്‌ രാശിയില്‍ പ്രവേശിച്ച്‌ സഞ്ചരിക്കുന്നു എന്നതിന്റെ അടിസ്ഥാനത്തിലാണു് ഇതു്. തുടക്കകാലത്ത്‌ മേടമാസത്തിലായിരുന്നു വര്‍ഷാരംഭം എങ്കിലും ഇന്നത്‌ ചിങ്ങമാസത്തിലാണ്‌. ഗ്രിഗോറിയന്‍ കാലഗണനാരീതി ആണ്‌ പൊതുവേ ഇന്ന് കേരളത്തില്‍ പിന്തുടരുന്നതെങ്കിലും സുപ്രധാനകാര്യങ്ങള്‍ക്കായി കൊല്ലവര്‍ഷത്തെ ആശ്രയിക്കുന്നവര്‍ ഏറെ ഉണ്ട്‌.
[തിരുത്തുക] പ്രമാണാധാരസൂചി
- ↑ ചരിത്രം,പേജ് 62 കേരളവിജ്ഞാനകോശം 1988 എഡിഷന്‍
