രാജവെമ്പാല
വിക്കിപീഡിയ, ഒരു സ്വതന്ത്ര വിജ്ഞാനകോശം.
വിഷനാഗങ്ങളില്‍ കരയില്‍ ജീവിക്കുന്നവില്‍ ഏറ്റവും നീളമേറിയ ഉരഗമാണു രാജവെമ്പാല (ഒഫിയൊഫാഗസ് ഹന്നാ). പൂര്‍ണ്ണവളര്‍ച്ചയെത്തിയ രാജവെമ്പാലയ്ക്ക് 18 അടിയോളം (എകദേശം 5.5. മീറ്റര്‍) നീളം വന്നേയ്ക്കും. ന്യൂറോടോക്സിന്‍ ഗണത്തില്‍ പെടുന്ന രാജവെമ്പാലയുടെ വിഷത്തിനു ഒരു ശരാശരി മനുഷ്യനെ പതിനഞ്ചുമിനുറ്റുകളില്‍ കൊല്ലുവാനുള്ള കഴിവുണ്ടു്. വിഷനാഗങ്ങളടക്കം മറ്റു നാഗങ്ങളെ ആഹാരമാക്കുന്ന രാജവെമ്പാലയുടെ സ്വഭാവത്തെയാണു ശാസ്ത്രീയനാമത്തിലെ ഒഫിയൊഫാഗസ് എന്ന പദം സൂചിപ്പിക്കുന്നതു്. രാജവെമ്പാലയുടെ ആംഗലേയനാമമായ King Cobra എന്ന പേരില്‍ നിന്നും പ്രസ്തുതഉരഗം, മൂര്‍ഖന്‍ (നജാ നജാ) പാമ്പുകളില്‍ വലിയതെന്നുള്ള ധാരണ പൊതുവായിട്ടുണ്ടു്. നജാ കുടുംബത്തില്‍ പെടുന്ന പാമ്പുകളെ പോലെ പത്തി വിടര്‍ത്തുവാന്‍ കഴിയുന്നതൊഴികെ മൂര്‍ഖനുമായി യാതൊരു സാമ്യവും രാജവെമ്പാലയ്ക്കില്ല.
സാധാരണഗതിയില്‍ രാജവെമ്പാലയ്ക്ക് അതിന്റെ നീളത്തിന്റെ മൂന്നിലൊരുഭാഗം തറയില്‍ നിന്നുയര്‍ത്തി പത്തിവിടര്‍ത്തുവാന്‍ സാധിക്കാറുണ്ടു്, ഒരു സാധാരണ മനുഷ്യനെ ഭയചകിതനാക്കുംവിധം നേര്‍ക്കുനേര്‍ നോക്കുവാന്‍ ഈ നാഗത്തിനു കഴിയുന്നതുകാരണം രാജവെമ്പാലയെ കുറിച്ചു പല കഥകളും മിത്തുകളും പ്രചാരത്തിലുണ്ടു്.
ഉള്ളടക്കം |
[തിരുത്തുക] ആവാസം
രാജവെമ്പാല പ്രധാനമായും വസിച്ചുപോരുന്നതു് ഇന്ത്യന്‍ ഉപഭൂഖണ്ഡം, ദക്ഷിണ ചൈന, മലേഷ്യ, ഫിലിപ്പീന്‍സ്, ശ്രീലങ്ക ഒഴികെയുള്ള ദക്ഷിണപൂര്‍വ്വ ഏഷ്യയിലെ മഴക്കാടുകള്‍ എന്നിവടങ്ങളിലാണു്. ഇന്ത്യന്‍ ഉപഭൂഖണ്ഡത്തിലെ പര്‍വ്വതപ്രദേശങ്ങളില്‍ സമുദ്രനിരപ്പില്‍ നിന്നും 6500 അടിവരെ ഉയരത്തില്‍ രാജവെമ്പാലയുടെ ആവാസങ്ങള്‍ നിരീക്ഷിക്കാവുന്നതാണു്. വനനശീകരണം നിമിത്തം രാജവെമ്പാലയുടെ എണ്ണത്തില്‍ ഗണ്യമായ കുറവുകളുണ്ടായിട്ടുണ്ടെങ്കിലും ഈ ജീവി വംശനാശഭീഷണിയിലല്ല. തടാകങ്ങളും അരുവികളും നിറഞ്ഞ ഭൂപ്രകൃതിയില്‍ ജീവിക്കുവാന്‍ ഇഷ്ടപ്പെടുന്ന രാജവെമ്പാലയ്ക്ക് ഉത്‌പ്ലവിക്കുവാനുള്ള കഴിവുകള്‍ കൂടിയുണ്ടു്. വയനാട്ടിലെ കാടുകളില്‍ രാജവെമ്പാല ധാരാളമായുണ്ട്. ബ്രഹ്മഗിരി വനങ്ങളിലും ഇവ വസിക്കുന്നു.
[തിരുത്തുക] ഇരതേടല്‍
ഇതര നാഗങ്ങളെ പോലെ രാജവെമ്പാലയും അഗ്രം പിളര്‍ന്ന നാക്കുകൊണ്ടു മണം പിടിക്കുന്നു. കൃത്യതയുള്ള കാഴ്ചശക്തിയും (എകദേശം 300 അടിദൂരെയുള്ള ഇരയെപോലെ ശ്രദ്ധിക്കാനാവുന്ന തരത്തിലുള്ളതു്), പ്രകമ്പനങ്ങള്‍ പൊടുന്നനെ തിരിച്ചറിയുവാനുള്ള കഴിവും, ബുദ്ധിശക്തിയും രാജവെമ്പാലയെ നല്ലൊരു വേട്ടക്കാരനാക്കുന്നു. ഇരയെ വിഷം പ്രയോഗിച്ചു കീഴ്‌പ്പെടുത്തിയ ശേഷം വിഴുങ്ങുകയാണു പതിവു്. വിഷം ദഹനസഹായിയായി കൂടി പ്രവര്‍ത്തിക്കുന്നു. മറ്റു പാമ്പുകളെപ്പോലെ കീഴ്‌താടിയെല്ലുകള്‍ സ്ഥാനഭ്രംശനം ചെയ്തു സ്വന്തം തലയേക്കാള്‍ വലുപ്പമുള്ള ഇരകളെ കൂടി വിഴുങ്ങുവാന്‍ രാജവെമ്പാലയ്ക്കു സാധിക്കുന്നു.
[തിരുത്തുക] ഭക്ഷണം
രാജവെമ്പാലയുടെ മുഖ്യ ആഹാരം മറ്റു പാമ്പുകള്‍ തന്നെയാണു്, ഇവയില്‍ വിഷമുള്ളവയും ഇല്ലാത്തവും ഉള്‍പ്പെടുന്നു. എന്നിരുന്നാലും ആഹാരത്തിനു ദൌര്‍ലഭ്യം നേരിടുമ്പോള്‍ പല്ലി മുതലായ ജീവികളെയും ഇരകളാക്കുന്നു. ആഹാരം ദഹിക്കുന്നതിനുള്ള കാലതാമസവും കുറഞ്ഞ മെറ്റബോളിസവും കാരണം പൂര്‍ണ്ണമായ ഒരു ആഹാരത്തിനുശേഷം മാസങ്ങളോളം ഇവയ്ക്ക് ഇരതേടാതെ ജീവിക്കുവാനാകും. പകല്‍ സമയങ്ങളില്‍ ഇരതേടുന്ന രാജവെമ്പാലയെ ദുര്‍ലഭമായെങ്കിലും രാത്രികാലങ്ങള്‍ കാണാറുണ്ടു്, ഇതുമൂലം തന്നെ Diurnal ജീവികളെന്നു തെറ്റായി വ്യാഖ്യാനിച്ചും കാണപ്പെടുന്നു.
[തിരുത്തുക] വിഷം
രാജവെമ്പാലയുടെ വിഷം, മുഖ്യമായും പ്രോട്ടീനുകളും പോളിപെപ്‌റ്റൈഡുകളും അടങ്ങിയതാണു്, ഇതു ഇവയുടെ കണ്ണുകള്‍ക്കു പുറകിലുള്ള ദഹനഗ്രന്ഥിയില്‍ നിന്നും ഉത്പാദിക്കപ്പെടുന്നു. രാജവെമ്പാല കൊത്തുമ്പോള്‍ അരയിഞ്ചു നീളമുള്ള അവയുടെ പല്ലുകള്‍ വിഷം ഇരയുടെ ദേഹത്തേയ്ക്ക് കുത്തിവയ്ക്കുകയാണു ചെയ്യുന്നതു്. ഗബൂണ്‍ അണലി എന്നൊരു ഇനം പാമ്പു കഴിഞ്ഞാല്‍ ഇരയുടെ ദേഹത്തേയ്ക്ക് ഏറ്റവും അധികം വിഷം കുത്തിവയ്ക്കുന്നതു രാജവെമ്പാലയാണു്. ഒരു ഇന്ത്യന്‍ ആനയെ മൂന്നുമണിക്കൂറിനുള്ളില്‍ കൊല്ലാന്‍ ശേഷിയുള്ളത്രയും വിഷമെന്നു കണക്കുകള്‍ പറയുന്നു.
രാജവെമ്പാലയുടെ വിഷം ഇരയുടെ നാഡീവ്യൂഹത്തെയാണു ബാധിക്കുന്നതു്. വിഷബാധ ഇരകളില്‍ കലശലായ വേദനയും, മങ്ങിയ കാഴ്ചയും, തലചുറ്റലും, പരാലിസിസും വരുത്തി വയ്ക്കുന്നു. വിഷബാധയേറ്റു മിനുറ്റുകള്‍ക്കുള്ളില്‍ ഹൃദയത്തിന്റെ പ്രവര്‍ത്തനും തകരാറിലാവുകയും വിഷബാധയേറ്റ ജീവി കോമ എന്നു വൈദ്യശാസ്ത്രത്തില്‍ വിശദീകരിക്കുന്ന അവസ്ഥയിലാവുകയും ചെയ്യുന്നു. തുടര്‍ന്നുവരുന്ന ശ്വാസതടസ്സം വിഷബാധയേറ്റവരില്‍ മരണം വരുത്തുന്നു. മനുഷ്യര്‍ക്കു രാജവെമ്പാലയുടെ വിഷബാധയേല്‍ക്കുകയാണെങ്കില്‍ രക്ഷപ്പെടുവാന്‍ മറുമരുന്നുകളുണ്ടു്. ഇന്ത്യയില്‍ രാജവെമ്പാലയുടെ ദംശനമേല്‍ക്കുന്ന ഒരു ലക്ഷം പേരില്‍ 5.6 - 12.6 ആളുകളില്‍ മരണം നടക്കുന്നുവെന്നു പഠനങ്ങള്‍ സൂചിപ്പിക്കുന്നു.
ഒരു തുള്ളിവിഷം മറ്റു പല പാമ്പുകളുടെ വിഷത്തോട് താരതമ്യം ചെയ്യുമ്പോള്‍ ശക്തി തീരെ കുറവാണ് (ഉദാ: ഇന്ത്യന്‍ മൂര്‍ഖന്‍, ആഫ്രിക്കയിലെ കറുത്ത മാംമ്പ എന്നിവ.) എന്നാല്‍ ഇവ വിഷം കുത്തി വയ്കുന്നതിനാല്‍ കൂടുതല്‍ വിഷം അകത്തു ചെല്ലാനും തന്മൂലം അപകടസാധ്യതയും കൂടുകയും ചെയ്യും.
[തിരുത്തുക] ഇതും കാണുക
[തിരുത്തുക] ചിത്രശേഖരം
 മിസോറിയിലെ സെയിന്റ്.ലൂയിസ് മൃഗശാലയില്‍ നിന്നുള്ള ചിത്രം |
 പൂര്‍ണ്ണവളര്‍ച്ചയെത്തിയ ആണ്‍വര്‍ഗത്തില്‍ പെടുന്ന രാജവെമ്പാല |
 ശൈശവദശയിലുള്ള രാജവെമ്പാല |
