Amelia Earhart
From Wikipedia
Amelia Earhart (*24. Juli 1898; †(verschollen) 2. Juli 1937) weer ene bekannte Flegerin ut’n US-amerikaanschen Staat Kansas. Se weer de eerste Minsch, de twee mol över den Atlantik floog. Se weer de eerste Minsch, de alleeen vun Honolulu op Hawaii noh Oakland in Kalifornien floog. Se weer ok de eerste Minsch de alleen vun Mexiko-Stadt noh Newark un de eerste Minsch, de alleeen vun Los Angeles noh Mexiko-Stadt floog. Amelia Earhart weer mit en rieken Mann mit de Naam Putnam verheirood. Se weer för Fruenrechten.
1937 harr Amelia Earhart sik vörnahm eenmal an’n Äquater langs üm de ganze Welt to flegen. To disse Reis is se an 21. Mai 1937 tohopen mit ehr Navigator Fred Noonan opbrocken. Se harr all mehr as Dreeveerdel von de Reis trüggleggt, as se an’n 2. Juli von Lae in Papua-Niegguinea losflöög. Op de Howland-Eilannen wull se de letzte Twüschenlannen maaken, is ober nie dor ankommen.
Earharts Verswinnen hett een von de gröttsten Sööken utlöst, de dat in de Historie geven hett. 64 Flugtüüch un 8 Kriegsschip weer doran bedeeligt, ober ehr Flugtüch un ok se sülvst oder ehr Begleider sünd nich funnen worrn. Över ehrn Verbliev is veel spekuleert worrn: Dat se een Spion von de US-Amerikaners wesen is un de japanschen Stüttpunkten utspioneern schüll, oder dat se sik mit ehrn Navigator op een Insel afsett un dor en nieg Leven anfungen hett. Na een annern Snack müss se notlannen un is von de Japaners fangen sett worrn, un eenige meenen gor dat se von Butenirdische entföhrt un mitnohmen worrn is.
De Söök is an’n 19. Juli afbrocken worrn. Offiziell hett man ehr denn för verschollen un wahrschienlich doot erklärt.
