Havørnulukka
Frå Wikipedia – det frie oppslagsverket
Havørnulukka var den første ulukka innan sivil ruteflyging i Noreg. Ho fann stad den 16. juni 1936 ved fjellet Lihesten i Hyllestad kommune, på nordsida av munningen på Sognefjorden. I sjutida om morgonen støytte flyet Havørn mot fjellet og vart knust. Alle som var om bord, eit mannskap på fire og tre passasjerar, mista livet.
Denne morgonen var Lihesten dekka av lokal skodde. Flyet, som var på veg nordover, gjekk inn i skoddebanken for kort tid etterpå å verte knust mot fjellveggen om lag 100 meter nedanfor toppen av fjellet.
I flyhistorisk samanheng er denne ulukka viktig, for mellom dei omkomne og dei som etterpå hadde ansvar for redningsarbeidet finn vi pionerar i sivil norsk luftfart. Bernt Balchen var den som leidde arbeidet med å få vrakdelar og fleire av dei omkomne ned frå den bratte og utilgjengelege fjellsida.
Då ulukka hende, flaug Havørn i Det Norske Luftfartsselskap si post- og passasjerrute langs kysten mellom Bergen og Tromsø. Flyet var ein Junker av typen Ju-52/3M. Eit slikt luftfartøy kunne ta 15–17 passasjerar, og vart rekna for å ha stor lasteevne og gode kortbaneeigenskapar.
