Jean Baptiste Joseph Fourier
Frå Wikipedia – det frie oppslagsverket
Jean Baptiste Joseph Fourier (21. mars 1768–16. mai 1830) var ein fransk matematikar og fysikar. Han vart tidleg foreldrelaus, men av di han var så gåverik vart han oppteken som elev ved ein militærskule.
Fourier var revolusjonær og vart fleire gonger arrestert under den franske revolusjonen. Òg seinare fekk han problem på grunn av fortida si. Han fylgde Napoleon som vitskapeleg rådgjevar under felttoget i Egypt, og vart utnemnd til fleire høge stillingar under Napoleon. I ettertid er Fourier best hugsa for å ha utvikla det franske vitskapsakademiet.
Fouriers hovudverk er Thêorie analytique de la chaleur (1822). Det er eit grunnleggjande verk innan funksjonsteorien med mange viktige bruksområde. Fourier viser her at alle periodiske funksjonar kan framstillast som ein sum av sinus- og cosinusfunksjonar.
Fourieranalysen spelar ei stor rolle i optikk, akustikk, signalbehandling og bølgjelære. Variasjonane i tidevatnet kan t.d. framstillast ved fourieranalyse. Fourier skreiv òg likningsteori og sannsynsrekning.
