دیوان سید آل رسول علی خان

وکیپیڈیا سے

دیوان سید آل رسول علی خان اجمیری
(پیدائیش: 1893 ء﴾
﴿وفات: 1973ء)

[ترمیم] سوانحی خاکہ

آپ رحمۃ اللہ علیہ حضرت خواجہ سید خورسند علی رحمۃ اللہ علیہ المعروف بہ ’’پیرجی‘‘ کے صاحبزادے ہیں آپ کی ولادت ضلع گڑ گانواں (ہندوستان) میں ہوئی ۔ والد گرامی اور مولانا عبدالمجید رحمۃ اللہ علیہ سے اکتساب علم کیا۔ اپنے والد سے بیعت کی اور انہی سے خرقۂ خلافت بھی عطا ہوا۔ اس کے علاوہ بسّی شریف کے حضرت میاں علی محمد خان رحمۃ اللہ علیہ چشتی نظامی(1881ء ۔ ۔ ۔ 1975ء) سے بھی خرقۂ خلافت پایا۔

درگاہ معلی کی سجادہ نشینی 

1922ء میں اجمیر شریف کے سجادہ نشین سید شرف الدین رحمۃ اللہ علیہ کے لاولد فوت ہو جانے پر آپ رحمۃ اللہ علیہ سلطان الہند حضرت خواجہ غریب نواز رحمۃ اللہ علیہ کے سجادہ نشین قرار پائے اور 1947ء تک حضور خواجہ غریب نواز رحمۃ اللہ علیہ کی درگاہ معلی کی سجادگی کے روحانی و مذہبی فرائض انجام دیتے رہے۔ علم و فضل اور روحانیات میں اپنی مثال آپ تھے۔

تحریک پاکستان میں حصہ 

تحریک پاکستان میں آپ کی خدمات آب زر سے لکھنے کے قابل ہیں۔ آپ شروع ہی سے مسلم لیگ اور تحریک پاکستان کے زبردست حامی تھے۔

ہجرت 

1947ء کے بعد اگرچہ حکومت ہند نے ان پر بہت زور دیا کہ وہ بدستور خواجہ اجمیری رحمۃ اللہ علیہ کی درگاہ کے انتظام و انصرام کی ذمہ داری انجام دیتے رہیں اور منہ مانگی مراعات دینے کی پیش کش کی لیکن انہوں نے غیر مسلم حکومت کے تحت رہنا قبول نہ کیا اورسنت نبوی صل اللہ علیہ وآلہ وسلم کی اتباع میں قیام پاکستان کے چند روز بعد اپنے پورے خاندان کے ساتھ ہجرت کر کے پاکستان تشریف لے آئے یہاں انہوں نے پہلے سرگودھا میں قیام کیا اور پھر کچھ عرصہ بعد پشاور آگئے اور یہاں چوک شادی پیر ہشت نگری میں قیام فرما ہو کر خلق خدا کی روحانی تربیت فرمانے لگے۔

سیرت 

آپ کی تمام زندگی تقوی اور پرہیز گاری سے مملو تھی چنانچہ وقت آخرعالم نزع میں بھی صاحبزادگان کو تسلی اور کلمہ حق کی تلقین کے سوا زبان مبارک پر کچھ نہ تھا اس وقت آپ کے چہرے پر سکون اس نفسِ مطمئن کو بشارتِ جنت کی علامت بن رہا تھا۔ درگاہ معلی اجمیر شریف کی سجادگی تو ایک بڑا اعزاز تھا لیکن آپ رحمۃ اللہ علیہ اپنے قیام اجمیر کے دوران اعزازی مجسٹریت اور وزیٹر سنٹرل جیل بھی رہے اعزازی مجسٹریٹ کی حیثیت سے خدمات کی انجام دہی میں یہ آپ کا معمول رہا کہ جب کوئی نادار شخص کسی قصور کی بنا پر آپ کے سامنے پیش کیا جاتا تو آپ اس پر کم از کم جرمانہ عائد فرماتے۔ بسا اوقات ان کا جرمانہ معاف بھی فرما دیتے۔ آپ کا فرمانا ہوتا کہ یہ شخص جتنی دیر اپنا روزگار چھوڑ کر یہاں موجود رہا یہ سزا بھی اس کے لیے کافی ہے۔ آپ کی خداخوفی اور غریب پروری کا یہ عالم تھا کہ آپ ان غریبوں کی اپنی جیب خاص سے اسطرح مدد فرمایا کرتے کہ اکثر غریب یہی دعا کیا کرتے کہ اللہ کرے ہمارا چالان حضرت صاحب کے سامنے پیش ہو۔بطور سجادہ نشین آستانہ عالیہ اجمیر شریف، درگاہ معلی کی اصلاح کے لیے آپ نے ایک کمیٹی مقرر فرمائی اور 1936 ء میں ایک باقاعدہ ایکٹ کے تحت اس کمیٹی کے انتظامات چلانے کا سلسلہ شروع کیا۔ یہاں بھی حضرت رحمۃ اللہ علیہ کی بے عرضی کا یہ عالم تھا کہ باوجود اہل اجمیر کی شدید خواہش اور مطالبہ کے آپ نے اس کمیٹی کی صدارت خود قبول نہ فرمائی۔ مولانا معین الدین اجمیری اور راجہ عضنفر علی خان ایڈووکیٹ نے اپنی تصانیف میں حضرت کے اس ایثار کو نمایاں طور پر بیان کیا ہے۔

وفات اور تدفین 

آپ کی وفات حسرت آیات 8/جمادی الاول 1393 ھ بمطابق9/ جون 1973ء کو ہوئی اور بیری باغ بیرون یکہ توت دروازہ پشاورکے قبرستان میں امانتاً مدفون ہوئے۔

تابوت کی منتقلی اورتحصیل فتح جنگ ضلع اٹک میں تدفین 

1994ء میں آپ کا تابوت لاکر کر گلشن سلطان الہند بمقام راماں تحصیل فتح جنگ ضلع اٹک میں سپرد خاک کیا گیا۔ جب تابوت کی منتقلی کی غرض سے آپ کی قبر مبارک کھولی گئی تو آپ کا تابوت مبارک محفوظ تھا چنانچہ اسی تابوت کو ایک نئے تابوت میں رکھ کر گلشن سلطان الہند منتقل کیا گیا۔ جہاں آپ کی آخری آراگاہ مرجع خلائق بنی ہوئی ہے۔ گلشنِ سلطان الہند میں تعمیرات کا سلسلہ تا حال جاری ہے۔ خوبصورت مسجد، محفل سماع کے لیے وسیع آڈیٹوریم حضرترحمۃ اللہ علیہ کی رہائش گاہ اور زائرین کے لیے تمام ضروری سہولیات کی فراہمی کے ساتھ کشادہ مہمان خانہ تعمیر ہو چکا ہے۔ جبکہ گنبد مزارات کی تعمیر کا سلسلہ جاری ہے۔

دربار شہنشہی سے بہتر
مردان خدا کا آستانہ
ضلع اٹک کو بجا طور پر فخر ہے کہ ہندوستان کے بے تاج بادشاہ والی ہندوستان کے سجادہ نشین یہاں پر آسودہء خاک ہیں
آپ رحمۃ اللہ علیہکے بعد آپ کے بڑے صاحب زادے دیوان سید آل مجتبی علی خان رحمۃ اللہ علیہ سجادہ نشیں ہوئے ۔

سید، شاکرالقادری۔ چشمہء فیض ﴿منظوم شجرہ سلسلہ چشتیہ نظامیہ﴾۔ اٹک ﹺ، پاکستان: ن والقلم ادارہ مطبوعات۔

[ترمیم] حوالہ جات