دیوان سید آل مجتبی علی خان
وکیپیڈیا سے
دیوان سید آل مجتبیٰ علی خاں
(پیدائش:1920ء)
وفات:2001ء)
[ترمیم] سوانحی خاکہ
شیخ المشائخ حضرت دیوان سید آل مجتبیٰ علی خانرحمۃ اللہ علیہ سجادہ نشین آستانہ عالیہ حضور سلطان الہند غریب نواز اجمیریرحمۃ اللہ علیہ 3/نومبر1920ء کو گڑگانواں (ہندوستان) میں پیدا ہوئے آپ ابھی صغیرالسن تھے کہ والد ماجد حضرت دیوان سید آل رسول علی خان رحمۃ اللہ علیہ آستانہ عالیہ اجمیر شریف کے منصب سجادگی سے سرفراز ہوئے۔ چنانچہ حضرت کا پورا خاندان اجمیر شریف آکر آباد ہو گیا۔ سات سال کی عمر میں آپ کی والدہ ماجدہ کا سایۂ عاطفت سر سے اٹھ گیا آپرحمۃ اللہ علیہ کی اعلی تعلیم و تربیت میں آپ کی دادی جان اور والد گرامی کا اہم کردار رہا ہے۔ دونوں بزرگوں نے نہ صرف آپ کی دینی و دنیوی تعلیم و تربیت کا اہتمام کیا بلکہ آپ کے کردار اور ذات کی بہترین تشکیل کے لیے اسلاف کے اخلاق کریمانہ کے ایسے ایسے نمونے آپ کے سامنے پیش کیے کہ آپ ہر طرح سے اپنے بزرگوں کے نقوش پاء پرثابت قدم ہو گئے۔آپ کی تعلیم و تربیت میں مولانا عبدالمجید رحمۃ اللہ علیہ جیسے عظیم انسانوں کا بھی بڑا ہاتھ رہا۔ مولانا اس قدر محترم شخصیت تھے کہ حضرت کے والد گرامی دیوان سید آل رسول علی خانرحمۃ اللہ علیہ بھی ان کے تلامذہ میں شمار ہوتے تھے۔ مولانا رحمۃ اللہ علیہ اکثر اپنے ہونہار شاگر دیوان سید آل مجتبیٰ علی خاں رحمۃ اللہ علیہ کو باتوں باتوں میں یہ احساس دلایا کرتے کہ آپ انتہائی خوش قسمت ہیں کہ ایک مجسم شفقت استاد آپ کے والد مہربان کی صورت میں موجود ہے۔ اِدھر اُدھر دیکھنے کی ضرورت نہیں انہی کے نقش قدم پر چلیں اورانہی کی طرح نشست و برخاست اورپر اعتماد گفتگو کرنے کی صلاحیت اپنے اندر پیدا کریں۔ ان کی صحبت سے پورا فائدہ اٹھائیں آپ دیکھیں گے کہ انشاء اللہ آپ ایک کامیاب انسان اور کامیاب جانشین خواجہ بزرگ رحمۃ اللہ علیہ ثابت ہونگے۔ الحمد للہ آپ نے استاد مہربان کی نصیحت پر حرفاً حرفاً عمل کیا چنانچہ آپ نہ صرف شکل و صورت اور نشست و برخاست بلکہ علمیت، گفتگواور شفقت و مروت میں بھی اپنے والد محترم کی تصویر تھے۔ آپ کو ابتدائی تعلیم دینے والوں میں مولانا غلام جیلانی رحمۃ اللہ علیہ صدرالمدرسین مدرسہ اسلامی عربی اندر کوٹ میرٹھ بھی شامل تھے۔ آپ نے1942ء میں درس نظامی کی تکمیل کے بعد ایک مجمع عام میں اکابر ممتحنین صدرالشریعہ مولانا امجد علی رحمۃ اللہ علیہ صدر الافاضل مولانا نعیم الدین مراد آبادی رحمۃ اللہ علیہ ، مولانا مفتی امتیاز احمد صاحب رحمۃ اللہ علیہ مفتی و مدرس دارالعلوم عثمانیہ درگاہ معلی اجمیر شریف کے سامنے جس جامع اور موثر اندا ز میں سوالات کے جوابات دیے اس کی دادو تحسین حاضرین اور اکابرین کی جانب سے دیر تک ملتی رہی۔ تحریک پاکستان میں بھی آپ اپنے والد گرامی کی ہدایات پر مسلم لیگ کی حمایت میں دور دراز کے دورے فرماتے رہے۔ آپ کا مزاج سادہ، طبیعت میں قناعت اور تقوی موجود تھا تلاوت کلام پاک، سیرت طیبہ اور ملفوظات بزرگان چشت کا مطالعہ آپ کے پسندیدہ معمولات میں شامل تھا۔ پاکستان میں سلسلہ چشتیہ کی تمام درگاہوں خصوصاً حضرت بابا فرید گنج شکر رحمۃ اللہ علیہ کی درگاہ پر حاضری آپ کا معمول تھا۔ 13/اپریل2001ء بمطابق 18/ محرم الحرام 1422 ہجری آیات فتح کی تلاوت و تکرار کرتے ہوئے اپنے خالق حقیقی سے جا ملے اور آج گلشن سلطان الہند راماں تحصیل فتح جنگ ضلع اٹک کے مقام پر اپنے والد بزرگوار دیوان سید آل رسول علی خان رحمۃ اللہ علیہ کے پہلو میں آسودۂ خواب ہیں۔ آپ کے بعد آپ کے صاحبزادے دیوان سید آل حبیب علی خان زیب سجادہ آستانہ ہوئے جو تاحال سجادہ نشین ہیںـ
[ترمیم] حوالہ جات
چشمہ ء فیض از: سید شاکر القادری، ن والقلم ادارہ مطبوعات، اٹک، پاکستان
زمرہ جات: تاریخ اٹک | مشائخ اٹک | تصوف | سلاسل تصوف | چشتیہ | صوفیاء | سوانح حیات | تذکرے | سیرت و سوانح
