Wolfgang Amadeus Mozart
vanuit Wikipedia, die vrye ensiklopedie.
Wolfgang Amadeus Mozart (27 Januarie 1756 - 5 Desember 1791) is een van die mees belangrike en invloedryke komponiste in die geskiedenis. Hy is deel van die Klassieke musiekera in kunsmusiek.
[wysig] Lewe
Mozart is gebore in Salzburg (die hoofstad van die destydse onafhanklike aartsbisdom Salzburg, tans deel van Oostenryk), en is gedoop as Johannes Chrysostomus Wolfgangus Theophilus Mozart (vernoem na sy ouma aan sy ma se kant en na die heilige van die dag van sy geboorte, Johannes Chrysostomus). Sy pa het later 'Wolfgangus' verkort na 'Wolfgang' en het ook 'Theophilus' vertaal na 'Amadeus' (liefde vir God) en het die 'Johannes Chrysostomus' weggelaat. Mozart het self daarvan gehou om klein veranderinge aan sy naam, veral sy tweede naam, te maak. Hy het slegs nou en dan die bekende Amadeus gebruik, soos ons dit vandag ken. Hy het veel eerder die Franse weergawe, 'Amadé' verkies. Hy het ook soms die Italiaanse 'Amadeo' en die Duitse 'Gotlieb' gebruik. Soms het hy dit selfs agteruit gespel, naamlik "Trazom" of "Mozart Wolfgang"!
Hy word algemeen gesien as 'n wonderkind. Hy het begin komponeer toe hy vyf was. Sy pa, Leopold Mozart was 'n bekende vioolonderwyser en komponis. Hy was ook 'n streng ouer wat voordeel getrek het uit sy seun deur hom as 'n wunderkind in die howe van Europa te vertoon. Wolfgang se suster, Nannerl, was 'n talentvolle pianis en het haar jonger broer gereeld begelei op Leopold se toere. Mozart het 'n aantal klavierstukke geskryf, veral duette om saam met haar te speel. Toe Wolfgang eenkeer siek word, het Leopold meer kommer uitgespreek oor die verlies aan inkomste as oor sy seun. Die koue weer en die voortdurende reise kon moontlik 'n aandeel hê in die siekte wat hy later beleef het.
Gedurende sy reise het Mozart vele groot musikante ontmoet en het ook die werke van ander groot komponiste geken (onder andere J.S. Bach, G.F. Handel, F.J. Haydn). Selfs mense wat nie musikante was nie het sy aandag getrek: hy is so beïndruk deur die klank van Benjamin Franklin se glasharmonika, dat hy verskeie stukke daarvoor gekomponeer het.
As 'n volwassene word hy 'n Vrymesselaar en slaag deur harde werk daarin om sy pa te bekeer voor sy dood in 1787. Sy latere opera Die Towerfluit bevat Vrymesselaarstemas en -simbole. Hy was in dieselfde Vrymesselaarslosie as Haydn.
[wysig] Sien ook
[wysig] Eksterne skakels en bronne
- Wolffgang Amadeus Mozart - by die Engelse Wikipedia
- Aloys Greither: Wolfgang Amade' Mozart Rowohlt Taschenbuch Verlag GmbH, 1962
- Robert W. Gutman: Mozart: A Cultural Biography. Random, 2001
- H. C. Robbins Landon: 1791: Mozart's Last Year. Thames & Hudson, 1988 ISBN 0500281076
- Maynard Solomon: Mozart: a life. Harper, 1996 ISBN 0060926929
- Köchel se katalogus van Mozart se werke
- Compact Mozart biography - at mozartones.com
