Wahre Kirche Jesu
Us der alemannische Wikipedia, der freie Dialäkt-Enzyklopedy
Als chinesischi Undergruppe vu dr Pfingstbewegig vum Christetum, wo churz nooch 1900 entstande isch, isch die Wohr Chilche vum Jesus e (uabhängigi) Chilche, wo 1917 in Beijing (Peking) in China gründet worre isch. Dr gegewärtig gwählt Vorsitzend vu dr Internationale Versammlig vu dr Wohre Chilche vum Jesus isch dr Prediger Yung-Ji Lin. Es git ebba 1,5 Millione Gläubigi uf alle sechs Kontinente. Zue dr Lehr vu sällere Chilche ghört dr Glaub an die usschliesslich Göttlichkeit vum Jesus, d.h. d' Zweinaturelehre Christi, formuliert im Konzil vu Chalkedon 451, wird abglähnt.
Die Chilche stot mit dere Asicht in dr Tradition vum Monophysitismus, wo zwische 400 und 650 in dr südöstliche Provinze vum Römische Riich die dominierend christlich Konfession gsi isch.
Ebefalls abglähnt wird d'Lehr vu dr Trinität (Drifaltigkeit). Dr Empfang vum Heilige Geist symbolisiert aber, dass die Gläubige s'Himmelriich erbe.
Wie im Judetum isch dr Samschdig un nit dr Sunndig dr heilig Wuchedag.
Als wesetlichi Sakramente gelte Daifi, Fuesswäschig un die heilig Kommunion.
Des alles zämme bildet die fümf Hauptlehre vu sällere Konfession, wo si mit entsprechende Stelle ussem Nöie Testament begründet.
Vu dr grosse christliche Fyrdig werre Wihnächte un dr Karfridig als vu heidnischem Ursprung abglähnt. Beidi Däg hän nämlig ihr Ursprung in wichtige Feste vu andere Religione im alde Römische Riich un ihr Ybernahm in dr christlich Festkalender isch dorum domols essentiell fer d'Akzeptanz vu dr nöie Staatsreligion gsi. Dass die Wohr Chilche vum Jesus die Fester ablähnt, lit dorum wohl au in ihrem Gründigsort. Dr Chinese fählt dr vorchristlich kulturell Hindergrund vu viili christliche Feste völlig, weswäge si - nit utypisch fer Konvertite - in dr Uslegig vu dr Religion kompromissloser sin.
