George Walker Bush
De Uiquipedia
|
||
| Orde: | Presidente nu 43 | |
| Mandatu: | del 20 de xineru de 2001 al | |
| Predecesor: | Bill Clinton | |
| Socesor: | Nel cargu | |
| Nació'l: | Sábadu 6 de xunetu de 1946 | |
| Nació en: | New Haven (Connecticut) | |
| Pareya: | Laura Welch Bush | |
| Profesión: | Empresariu | |
| Partíu políticu: | Partíu Republicanu | |
George Walker Bush 
(Pronunciación) (nacíu'l 6 de xunetu de 1946 en Connecticut, Estaos Xuníos) ye'l presidente de los Estaos Xuníos d'América d'anguaño. Enanties yera'l Gobernador del estáu de Texas. Miembru tradicional del Partíu Republicanu, foi empresariu na industria petrolífera y del deporte profesional, como Manager xeneral del equipu de beisbol de los Texas Rangers.
Bush foi elexíu 46u Gobernador de Texas en 1994, y reelexíu en 1998. Ganó la nominación del Partíu Republicanu a les eleiciones presidenciales de 2000, y foi elexíu Presidente nunes eleiciones xenerales mui reñíes y non faltes de polémica. Foi reelexíu nes eleiciones de 2004 cuando se disputaba la Presidencia col Partíu demócrata de John Kerry.
So pá, George H. W. Bush tamién foi Presidente de los Estaos Xuníos cuatro años y ocho más, vicepresidente. El so hermanu, Jeb Bush ye'l Gobernador de Florida d'anguaño. So güelu, Prescott Bush, foi senador. Tien amás dos hermanos más pequeños, Marvin Bush y Neil Bush, los dos empresarios. Él y John Quincy Adams son los únicos fíos de Presidentes qu'acceden a la presidencia.
Tabla de conteníos |
[editar] Educación y mocedá
Nació en New Haven, Connecticut y crióse en Midland, Texas y Houston.
Tres graduase na Philips Academy en xunu de 1964, Bush gradúase n'historia na Universidá de Yale y con un posgráu n'Arte en 1968. Bush ye seleicionáu pola sociedá secreta Skull & Bones. En mayu de 1968, alístase na Texas Air National Guard.
En 1973 va a la Harvard Business School onde estudia un Master n'Alministración d'Empreses (MBA) en 1975. Dos años dempués cásase con Laura Welch, bibliotecaria demócrata de Midland. Tienen dos fíes ximielgues, Barbara y Jenna, nacíes en 1981.
El 4 de setiembre de 1976, na redolada de la casa de branu de la so familia en Kennebunkport, Maine, la policía arrestólu por conducir baxo los efeutos del alcohol. Bush describió esos díes antes de la so conversión relixosa nos sos 40 como una dómina "nómada" y una "mocedá irresponsable", y almitió que bebía de más d'aquella. Bush diz que dexó la bébora en 1986 y que la responsabilidá del cambiu ye, en parte, d'un aconceyamientu que tuvo en 1985 col reverendu Billy Graham.
[editar] Vida profesional
[editar] Negocios
Bush entamó la so carrera na industria petrolífera en 1979 cuando entamó Arbusto Energy, una empresa d'esploración de petroleu y gas. En 1984 Bush vendió la compañía yá renomada Bush Exploration Co., a Spetrum 7, otra petrolera de Texas. En cumplimientu de los alcuerdos de venta, Bush convirtióse en CEO. Spectrum 7 perdió ingresos y foi absorbida por Harken Energy Corporation en 1986, onde Bush se convirtió en Direutor.
N'abril de 1989, Bush aconceyó a un grupu d'inversores d'ente los collacios íntimos de so pá, incluyendo'l so compañeru de fraternidá Roland W. Betts. El grupu mercó'l 86% de los Rangers por 75 millones de dólares.
Como Manager xeneral de los Rangers, Bush asistió a les rellaciones del equipu colos medios y a la construcción d'un nueu estadiu. La so posición pública dio-y reconocimientu por toa Texas.
[editar] Carrera política
Bush entamó la so carrera asistiendo a so pá nes campañes al Senáu de 1964 y 1970. Tras dexar la Guardia Nacional en 1972, foi direutor políticu pa la campaña del senáu n'Alabama. En 1978 presentóse a la Cámara de los representantes, pero perdió col demócrata Ken Hance (agora republicanu). Ronald Reagan sofitó al oponente de Bush nes primaries republicanes.
En 1994, Bush garró una escedencia nos Rangers pa presentase a Gobernador de Texas contra la demócrata Ann Richards. El 8 de payares de 1994 ganó a Richards con un 53% de los votos frente al 46%. En 1998 Bush presentóse a la reeleición y algamó una victoria clara, col 69% de los votos, convirtiéndose nel primer Gobernador de Texas elexíu dos vegaes consecutives. A lo llargo'l gobiernu de Bush, fexo significativos camudamientos na xusticia criminal, lleis civiles y financiación pa los escolinos. Bush tomó una llinia dura tocántenes a la pena de muerte y recibió munches crítiques de los sos opositores, la tasa d'encarcelamientu foi de 1014 internos por 100.000 en 1999, la segunda mayor.
[editar] Campañes Presidenciales
[editar] Campaña de 2000
Na campaña de 2000, Bush declaróse "conservador compasivu".
[editar] Campaña de 2004
Nes eleiciones de 2004, Bush algamó 31 de 50 estaos y 286 votos electorales.
[editar] Etapa como Presidente
[editar] Política exterior y seguridad
En 2002, Bush refugó'l tratáu de Kioto por consideralu perxudicial pal crecimientu de la economía estaunidense.
Tres los ataques terroristes del 11 de setiembre de 2001, el Departamentu d'Estáu punxo como prioridá oriente prósimu.
[editar] Terrorismu
El 11 de setiembre de 2001, Al-Qaida secuestró cuatro grandes aviones de pasaxeros y estrellólos escontra les torres ximielgues del World Trade Centre de Nueva York y escontra'l Pentágonu en Washington DC. 2.500 fueron los muertos pol ataque.
El 7 d'ochobre de 2001, con sofitu internacional, Bush llanzó la "guerra escontra'l terrorismu" en xeneral, y dirixida faza'l réxime talibán d'Afganistán en particular, onde s'escondía Osama bin Laden másimu dirixente d'Al-Qaeda, un yemenín nacíu n'Arabia Saudí. Estaos Xuníos invadió Afganistán.
Irónicamente, dende la cayida de los talibán, los suministros d'opiu medraron significativamente.
Como rempuesta a la preocupación por terrorismu, Bush retiró'l Tratáu sobro misiles anti-balísticos de 1972 pa promocionar un nueu sistema de defensa de misiles. La Sociedá Americana de Física criticó esti cambiu y teniendo dubies sobro la efectividá. Baxo'l mandatu de Bush, el gastu militar total medró fasta un nivel comparable al de la Guerra fría, lo que llevanta insinuaciones de que si'l so primer oxetivu ye alimentar la industria militar de la que'l presidente Eisenhower alvirtió en 1961.
[editar] Iraq
Poco depués del 11 de setiembre l'alministración Bush promovió una aición urxente n'Iraq, anunciando qu'Iraq tenía armes de destrucción masivo, que Saddam Hussein yera una amenaza pa la seguridá mundial, desestabilizaba Oriente Prósimu, emburriaba'l Conflictu árabe-israelín y financiaba terroristes. Los críticos dixeron que los intereses económicos nos recursos petrolíferos iraquinos yeren el motivu real.
El 13 de payares de 2002 baxo la resolución 1441, Hans Blix y Mohamed ElBaradei dirixieron a los inspectores d'armamentu de la ONU n' Iraq.
El Secretariu d'Estáu Colin Powell recomendó evitar una guerra ensin l'aprobación clara de la ONU. L'alministración trató d'algamar una resolución del Conseyu de seguridá de la ONU autorizando la fuerza militar según el capítulu VII de la Carta de les Naciones Xuníes pero, vista la vigorosa oposición de naciones clave, incluyida l'amenaza de vetu de Francia, descartóse esa opción y, con un pequeñu grupu de países, preparóse pa la guerra.
La invasión d'Iraq entamó'l 20 de marzu de 2003. Bush declaró la victoria'l 1 de mayu de 2003 pero'l despliegue estaunidense continúa en 2005 pesie a la captura de Hussein por culpa de la resistencia iraquina.
El 30 de setiembre de 2004 l'informe final del Grupu d'investigación d'Iraq concluyó que "nun alcontraron evidencies de que Saddam Hussein tuviere un stock d'armes de destrucción masiva en 2003". L'informe de la comisión del 11-S nun alcontró evidencies creyibles de que Saddam Hussein tuviere armes de destrucción masiva. Amás, la comisión del 11-S concluyó que pesie a los contautos ente Iraq y Al Qaeda en 1996, nun surdió "nenguna rellación de collaboración".
[editar] Ver tamién
- Gobiernu y política de los Estaos Xuníos
- Artículos rellacionaos con Estaos Xuníos
[editar] Enllaces esternos
| Predecesor: Bill Clinton |
Presidentes de los Estaos Xuníos 2001 - anguaño |
Socesor: Nel cargu |
