Charles-Maurice de Talleyrand

El Vikipedio

Charles-Maurice de Talleyrand-Périgord, Duko de Talleyrand, Princo de Bénévent, naskita je la 2-a de februaro 1754 en Parizo, mortinta je la 17-a de majo 1838 same en Parizo, estis franca kleriko kaj diplomato. Li efikis en la tempoj de (kaj parte por) Ludoviko la 14-a, la Franca Revolucio, Napoleono la 1-a, Ludoviko la 18-a kaj Ludoviko-Filipo, servis ĉiujn kaj ĉiufoje perfidis la reĝimon, kiun li estis servinta por la sevonta. Li estis korupta homo, sed lerta diplomato, kaj fakte konstante provis kiel eble plej bone servi sian landon. Li estis unu el la plej gravaj rolantoj historiaj de lia tempo.

Li estis neamata de sia patrino, kaj tio ĉiam suferigis lin. Dum infanaĝo akcidento kaŭzita de lia vartistino igis lin dumvive lama, kaj devigata surhavi specialan boton. Pro tio ke li ne povis fari militistan karieron lia familio trudis lin iĝi pastro, kvankam li tute ne havis emon al tio. Li la tutan vivon havis plurajn amorantinojn. Li fariĝis episkopo, sed dum la Franca revolucio, li elektis aniĝi al la Konstitucia pastraro (kiu ĵuris fidelecon al la respubliko kaj al la Civila Konstitucio de la Pastraro, kaj estis kondamnita de la Papo) kaj solenis kiel konstitucia episkopo la Festo de Federacio la 14-an de julio 1790. Poste li entute eksiĝis de la eklezia stato. Li estis epikuristo kaj rafinita homo.

[redaktu] Citaĵoj

• En politiko pli gravas tio, kio estas kredata, ol tio, kio estas vera.
• La plej bona helpanto de diplomato estas lia kuiristo.
• Se la homoj scius, de kiaj malgranduloj ili estas regataj, ili tuj ribelus.
• La politiko estas nur maniero agiti la homojn antaŭ ol utiligi ilin.
• La vivo estus eltenebla, se ne ekzistus la plezuro.
• Anglio havas du saŭcojn kaj tri cent religiojn; kontraŭe Francio havas du religiojn, sed pli ol tri cent saŭcojn.
• Ekzistas afero pli terura ol kalumnio; estas la vero.
• Malkontentuloj estas malriĉuloj, kiuj pensas.
• Virinoj foje pardonas al tiu, kiu ekspluatas okazon, sed neniam al tiu, kiu maltrafas ĝin.
• Oni kredas nur je tiuj, kiuj kredas pri si mem.
• Ne diru malbonaĵon pri vi; viaj amikoj sufiĉe da ĝi diras.
• La parolo estis donita al la homo por kaŝi liajn pensojn.
• La plej bona maniero renversi registaron estas partopreni en ĝi.
• Eblas lezi la leĝojn, kaj ĝi tamen ne krias.
• Se io validas sen mencio, ĝi validas eĉ pli, se oni mencias ĝin.
• "Jes" kaj "ne" estas la plej mallongaj kaj plej facile prononceblaj vortoj, kaj tiuj, kiuj postulas plej multe la pripensado.
• Ĉiam apogu vin sur principoj, fine ili cedos.