World Trade Center
El Vikipedio
La Mondkomerca Centro (anglalingve World Trade Center [ŭorld trejd senter]) estis sepopo da konstruaĵoj en Novjorko.
Ĝemelturoj - Konstruaĵoj 417-metraj, 110-etaĝaj kiuj staris sur la insulo Manhatano, Novjorko, Usono inter 1972 kaj 2001. Je sia konstruo, ili estis la plej altaj en la mondo. Tamen en 1974, en Ĉikago la Sears-turo superis la ĝemelturojn. La turoj estis nur du konstruaĵoj de la 7-konstruaĵa Mondkomerca Centro, tamen oni ofte nomas la ĝemelturojn mem Mondkomerca Centro. Ili estis uzataj por komerco. Multaj grandaj financaj firmaoj havis oficejojn tie.
En 1993 la turojn atakis teroristoj, kiuj eksplodigis bombon en la subtera aŭtoparkejo. Je la 11-a de septembro 2001, la turoj estis denove atakitaj per teroristoj, kiuj kaperis du aviadilojn el Bostono kaj intence trafis la turojn. La trafo mem ne faligis la turojn; ekstreme varmegaj fajroj moligis la ŝtalajn apogilojn kaj ili, post preskaŭ horo da brulado, kolapsis. Almenaŭ 2602 mortis tiutage, plejparte oficejaj laboristoj kaj fajro-batalistoj.
Je 2002 la planado por la loko daŭris, tamen estas konfesite ĉie ke oni ne rekonstruos la ĝemelturojn.
En 2004 estis metita la fondoŝtono por nova konstruaĵo nomota Turo de Libero (angle Freedom Tower), kiu estu denove la plej alta en la mondo. Ĝi altu 541,32 metrojn; tio estas 1776 futoj; la mezuro memorigu pri la jaro 1776 de la Usona Revolucio. La centra konstruaĵo altu 335 metrojn kaj havu helikecan formon; sur ĝi estos ŝtaltraba konstruaĵo kun ventocentralo, kiu produktu parton de la elektro bezonata. Sur tiu centralo leviĝos tureto, kiu atingos la menciitan alton.
Mastro de la konstruaĵo estas Larry Silverstein. Li estis luprenanto de la Ĝemelturoj.
