Stephanus Spielberg
E Vicipaedia
| Stephanus Spielberg | |
|---|---|
| Steven Spielberg | |
 |
|
| Natus | 18 Decembris 1946 Cincinnatopoli, Ohium |
| Obiit | |
Stephanus Spielberg vel Ludimontius (Anglice: Steven Spielberg), Cincinnatopoli in civitate Ohio die 18 Decembris 1946 natus, est moderator cinematographicus qui hodie maxima omnium admiratione afficitur, annis septuagesimis qui dicuntur et octogesimis aliquas pelliculas generis phantastici maximo populi plausu et concursu dignatas fecit.
[recensere] De vita et operibus
Spielberg gente Iudaea originis Ucrainicae natus, cum in California adolesceret, a puero ingenti earum amore commotus pelliculis studuit faciendis. Itaque annis sexagesimis aliquibus pelliculis experimentalibus confectis anno 1971. pellicula televisionali Certamen singulare (Anglice Duel) inscripta primam gloriam sibi comparavit, qua pellicula generis ad animorum suspensionem summam spectantis (eius quod "thriller" nominari solet) vectorem carri maximi induxit studentem, ut in regione deserta vectorem alium vehiculi parvi de via detruderet.
Feliciter etiam anno 1974 pelliculam Ferrovia celerior in Sacchariam inscriptam confecit, ante quam anno 1975. Maxillas illas, quibus nihil celebrius est, in lucem edidit. Hac pellicula de priste alba in homines aquis marinis utentes debacchata Spielberg maxime innotuit. Quem successum iteravit pellicula "Occursus proximi cum genere tertio" inscripta, qua creaturas cogitatione rationeque praeditas extra hunc orbem terrarum natas in America advenientes introduxit. Anno autem 1981, fecit partem primam trilogiae de Indiana Iohannis archaeologo periculorum amantissimo confectae, quae pellicula Raptores arcae perditae inscribitur. Secutae sunt pelliculae Indiana Iohannis et templum iudicii, quae inscripta est, anno 1984, anno 1989; illa autem Indiana Iohannis et bellum de cruce gestum ultimum nominata.
Spielberg anno 1982 pellicula illa, quae spectantium maxima caritate concursu celebritate ornata est, iterum ad genus phantasticum revertit. Pellicula enim E.T: Extraterrestris inscripta amicitiam inter puerum propter solitudinem suam tristiorem et creaturam extraterrestrem in terra relictam tractavit. Anno 1985. secutus est ille Color Purpureus, anno autem 1987, Imperium Solis. Quae pelliculae a veterioribus eo differunt, quod non sunt generis phantastici, sed tamquam fabulae generis tragici ad vitam hominum veram spectant. Quarum prior facta est de muliere nigra paupere, quae in provincia Civitatum Unitarum ad meridiem vergenti vitam degeret, altera de puero britannico in castris versante, dum bellum per totum orbem terrarum gerebatur alterum.
Mediocri concurso pelliculas Semper anno 1989, anno 1991. Hamus inscriptas in lucem ediderat, cum anno 1993. Horto illo Iurassico quem, ut cinotheatrum adiret, non pellexit? Qua fabula dinosauros finxit ex seminibus cellularum minimis denuo creatos, qui in insula deserta homines creatores suos aggrederentur. Quae pellicula quamvis populo tantopere placeret, artis cinematographicae peritos Ratio illa Schindleri multo maiore admiratione affecit, ut qua pellicula de factis Oscari Schindler narraverit fabricatoris supellectilis Germani, qui tempore Shoae plus quam mille Iudaeos a certa morte vindicavit.
Postea gloriam inveteratam Ludimontius adaequare non potuit. Inter pelliculas eius populo gratiores numerandi sunt Mundus perditus anni 1997., quae pellicula a fine Horti Iurassici initium capit, et A.I. Artificialis Intelligentia anni 2001. et Relatio de minore populi parte anni 2002. et Cape me si potes eiusdem anni. Quarum alterius argumentum hoc est: Medio saeculo XXI. homines androidarum servitiis fruuntur, quorum uno ad similitudinem pueri formato, cum vera caritatis cupidine afficiatur, omnes crudeliter abutuntur, quod non est homo verus atque ingenuus. Relatione illa iterum homines medio saeculo XXI. qui erunt introduxit, sed fabulam de scelere patefaciendo monstravit. Pellicula ultima Ludimontius Francisci Aganialis Iunioris vitam exhibuit, qui annis sexagesimis ad vicies quinquies centena milia dollarum fraude sibi comparavit, cum se medicum, iuris consultum, pilotam esse simulavit.
Anno 2002. etiam miniseriem generis phantastici televisionariam Captus inscriptam produxit. Cuius seriei partes ipse non fecit, sed occupatus erat in dirigendis pelliculis suis. Anno 2004., cum comoediam nigram Aula terminalis inscriptam edidisset, erant, qui dicerent Ludimontium in cinematographum cottidianum abiisse, cuius pelliculae iam non essent unicae. Tamen Ludimontius adhuc ille est cinematographus, qui multas pelliculas celeberrimas fecerit et cuius maxima sit auctoritas.
