Volleyball
Vu Wikipedia, der fräier Enzyklopedie.
Volleyball ass eng Equipësportaart aus dem Grupp vun de “Réckschlo-spiller”, bei där sech zwou Ekippe vu jeeweils sechs Spiller op engem duerch een Netz gedeelten Terrain géintiwwerstinn.
Zil vum Spill ass et, de Volleyball ënnert Asaz vum ganze Kierper iwwert d’Netz op de Buedem vum géignereschen Terrain ze schloen. Gläichzäiteg geet et awer och dorëms, ze verhënneren, datt dem Géigner genee dat geléngt. All Ekipp däerf de Ball genee dräi Mol (an eng Kéier Block) beréiere fir en op déi aner Säit ze kréien.
Volleyball kënnt ursprénglech aus den USA a gëtt weltwäit gespillt. De Weltverband F.I.V.B., dee säi Sëtz an der Schwäiz huet, ass matt 217 Natiounen dee Verband matt deene meeschte Memberlänner. Offiziell hunn 2002 33 Millioune Spiller Volleyball gespillt. Do dergéint huet d’FIFA der nëmmen +/- 31 Milliounen.
[Änneren] Terrain
Dë Volleyballsterrain ass 18m laang a 9m breet, so datt all Équipe op enger Halschent vu 9 x 9m spillt. Di zwou Halschente sin duerch ee Filet getrennt deem seng Héicht bei den Hären 2,43m, bei den Dammen 2,24m an am Mixed (Loisir) 2,35m bedréit. De Filet muss aus engem donkele Fuedem bestoen, en ass 1m breet an 9,5 bis 10m laang, sou datt en op all Säit vum Terrain 25 bis 50cm iwwert d’Saitenlinnien vum Terrain erausgeet. D’Poteaue fir de Filet festzemaache sin dowéinster och net op der Saitenlinn, mee ongeféier 1m aus dem Terrain eraus plazéiert. Vir d’Saitenlinien besser siichtbar ze ma sin direkt iwwert de Saitenlinnen zwee Bänner vertikal um Filet befestegt. Iwwert dëse Bänner stëcht nach ee Staf, d’Antenn, 80cm iwwert de Filet. D’Antennen däerfen zu kengem Zäitpunkt vum Ball beréiert gi, vue dass se d’Begrenzung vum Terrain duerstellen. De Filet muss straff gespaant sinn, vue datt d’Filetberéirung duerch de Ball kee Feeler duerstellt an dësen no enger Beréierung nach däerf weider gespillt ginn.
An dräi Meter Ofstand zur Mëttellinn fanne sech parallel zu dëser d’Ugrëffslinnen (och nach “3m Linn” genannt). Nëmme Virderspiller däerfen bannent der Zone tëscht dësen zwou Linnen attackéieren. Hannerspiller däerfen de Ball nëmmen ënnerhalb vun der Filetskant spillen oder mussen hannert der Ugrëffslinn ofsprangen. Se däerfen awer virun der ugrëffslinn opkommen.
Ronderëm den eigentlechen Terrain musse mindestens dräi Meter fräigehale ginn, wou de Ball och nach däerf gespillt ginn. Fir Matcher an der Hal gëtt ugerode mindestens een 8m héichen Daach ze hunn, ouni datt do ee Baskettskuerf oder Ähnleches géif stéieren. Wann ee sech awer hei zu Lëtzebuerg all ze streng un des Regele hale géif , da kéinten d’Matcher net méi all gespillt ginn. Dowéinster stellt d’FLVB däitlech méi geréng Ufuerderunge fir national Matcher wéi d’FIVB fir internationaler.
[Änneren] Geschicht
Volleyball gouf am Dezember 1895 vum William G. Morgan zu Holyoke, USA virgestallt. De Sportdirekter vun der YMCA hat ee Spill mam Numm "Mintonette" als Spill fir eeler Memberen entwéckelt. Et huet laang Zäit als douce Alternativ zum Basketball, deen zu Springfield, wat nëmme 10 Meile Loftlinn ewech läit, entstane wor. D'Indoor-Sportart huet charakteristesch Elementer aus Tennis an [[Handball] enthalen. De Morgan selwer huet nach di éischt Regele verfaasst. Dës Regele hunn ee 25 x 50 Feet (~ 7,72m x 15,24m) groussen Terrain an ee 6 Feet 6 Inches (~1,98m) héicht netz virgesinn. Au contraire zu haut wor weder d'Unzuel vun de Spiller um Terrain nach d'Unzuel vun de Ballkontakter limitéiert. Bei engem falsche Service, hat ee wéi am Tennis, een zweete Versuch ze gutt.
En Zuschauer vum éischte Spill an der YMCA zu Springfield huet 1896 den nach haut genotzten Numm "Volleyball" agefouert, dee vum engleschen Wuert "volley", wat fir eng Salv steet. Ausserdeem goufen zu dësem Ulass och di éischt Ännerungen un de Regele virgeholl.
Während deenen nu folgende Joren huet sech d'Sportaart iwwer Kanada (1900) an d'ganz Welt verbreet. Si gouf während dem éischte Weltkrich vun amerikanesche G.I.'s an Osteuropa agefouert, wou Volleyball sech bannent kierzster Zäit zu engem populäre Sport entwéckelt huet. Bis an d'Mëtt vum 20. Jorhonnert hat de Sport dun vum ganzen europäesche Kontinent Besëtz ergraff. Di meescht Techniken an taktiken aus dem moderne Volleyball, goufe vun europäeschen Ekippen agefouert. Beispiller sinn ënnert anerem de Block (Tschechoslowakei, 1938), de Libero (UdSSR), d'Manchette (Tschechoslowakei, 1958) an d'Ugrëff aus der hënneschter Réi (Polen, 1974).
Di féierend Natioune sinn am Moment Brasilien, Italien, China a Russland. D'F.I.V.B. schätzt datt sech ronn e sechstel vun der Weltpopulatioun als aktive Spiller oder Zuschauer um Volleyball bedeelegt.
Di international Federatioun, d'Fédération Internationale de Volleyball (FIVB), gouf 1974 gegrënnt. Säit 1963 gëtt et eng europäesch Confédératioun, d'Confédération Européenne de Volleyball (CEV) matt hirem Sëtz zu Lëtzebuerg. D'Lëtzebuerger Federatioun F.L.V.B. gouf den 20.6.1981 gegrënnt a richt all Joer esouwuel d'Championat am Männer- wéi am Dammenvolleyball aus wéi och d'Coupe de Luxembourg.
Volleyball ass säit 1964 olympesch Disziplin. d'Variant Beach-Volleyball gëtt säit 1986 vun der FIVB offiziell unerkannt a gehéiert säit 1996 zum olympesche Programm.
