Јужни Словени
Од Википедија, слободна енциклопедија
Јужни Словени е општ назив за современите јужнословенски народи, кој ги вклучува македонците, бугарите, србите, црногорците, босанците, хрватите и словенците. Терминот јужнословенски пред се е поврзан со класификацијата на јазиците кои ги говорат овие народи. Сите овие денешни народи се создадени преку еден етногенетски процес на мешање со други народи.
Така на пример, според некои македонски историчари, особено според Драган Ташковски, денешните Македонци се создадени преку етногенетски процес на мешање меѓу македонските словенски племиња и античките македонци за кои не се знае многу и најчесто има спротивставени мислења за нив. Некои велат дека тие биле грко-јазичен народ [1], додека други дека тие воопшто и не зборувале грчки, туку свој посебен јазик - старомакедонски [2]. Мешањето бил процес кој траел доста долго, а започнал со доаѓањето на Словените на Балканот во V и VI век. Ова тврдење е докажано и со низа антрополошки и генетски истражувања кои сведочат за автохтоноста на Македонците [3]. Некои историчари сметаат дека сомнително е и самото тврдење дека Македонците се словенски народ, бидејќи, како што велат тие, за тоа нема археолошки докази. Денешните Македонци го наследиле својот етноним македонци од своите антички предци, античките Македонци.
Денешните Бугари, пак, се создадени преку етногенетски процес на мешање меѓу Прабугарите - според некои турко-јазичен [4] , а според други ирано-јазичен номадски народ од централна Азија којшто се сместил на Балканот во 7 век и кои се нарекувале Булгари, како и од неколку словенски племиња што им претходеле еден век на Булгарите. Денешните Бугари го наследиле јазикот од Словените, а нивниот етноним българи од Прабугарите (Булгарите).
Денешните Срби се настаните преку етногенетски процес на мешање меѓу дојденото словенско население и романизираното влашко население кое пак има тракиски, дакиски и илирски корени.
Сепак, постојат многу работи поврзани со словените кои сè уште се само претпоставки и со сигурност не се потврдени.
