മീനച്ചിലാറ്

വിക്കിപീഡിയ, ഒരു സ്വതന്ത്ര വിജ്ഞാനകോശം.

കേരളത്തിലെ ഒരു ജില്ലയായ കോട്ടയത്തിന്റെ ഹൃദയഭാഗത്തുകൂടി ഒഴുകുന്ന നദിയാണ് മീനച്ചിലാര്‍. 78 കിലോമീറ്റര്‍ നീളമുള്ള നദി ഈരാറ്റുപേട്ട, പാലാ, ഏറ്റുമാനൂര്‍, കോട്ടയം എന്നീ പട്ടണങ്ങളില്‍ കൂടി ഒഴുകി വേമ്പനാട് കായലില്‍ ചെന്നു ചേരുന്നു.

പശ്ചിമഘട്ടത്തില്‍ നിന്നും ഉല്‍ഭവിക്കുന്ന പല അരുവികള്‍ ചേര്‍ന്നാണ് മീനച്ചിലാറ് ഉണ്ടാവുന്നത്. നദിയുടെ കടല്‍നിരപ്പില്‍ നിന്നുള്ള ഉയരം മലയോടു ചേര്‍ന്നുള്ള പ്രദേശങ്ങളില്‍ 77 മുതല്‍ 1156 മീറ്റര്‍ വരെയും മദ്ധ്യ പ്രദേശങ്ങളില്‍ 8 മുതല്‍ 68 മീറ്റര്‍ വരെയും താഴ്ന പ്രദേശങ്ങളില്‍ 2 മീറ്ററില്‍ താഴെയുമാണ്.1208 ച.കി.മീ പ്രദേശത്തെ മീനച്ചിലാര്‍ നനയ്ക്കുന്നു. ഒരു വര്‍ഷം 23490 ലക്ഷം ഘന മീറ്റര്‍ ജലം മീനച്ചിലാറില്‍ കൂടി ഒഴുകുന്നു. ഉപയോഗയോഗ്യമായ 11100 ലക്ഷം ഘന മീറ്റര്‍ ജലം മീനച്ചിലാറ് വര്‍ഷംതോറും പ്രദാനം ചെയ്യുന്നു. ചെറുതും വലുതുമായി 38 പോഷക നദികളാണ് മീനച്ചിലാറിനുള്ളത്. ഇവയ്ക്കു പുറമേ മീനച്ചിലാറില്‍ ലയിക്കുന്ന 47 ഉപ-പോഷക നദികളും 114 ചെറിയ അരുവികളും ഉണ്ട്.

[തിരുത്തുക] പദ്ധതികള്‍

കേരള സംസ്ഥാന വിദ്യുച്ഛക്തി വകുപ്പ് മീനച്ചിലാറില്‍ നിന്നുള്ള വെള്ളം ഇടുക്കി അണക്കെട്ടിലേക്ക് തിരിച്ചുവിടാനായി വാഗമണ്ണിന് അടുത്തായി രണ്ട് ടണലുകള്‍ നിര്‍മ്മിച്ചിട്ടുണ്ട്. ഇവയില്‍ ഒരെണ്ണം വഴിക്കടവ് തടയണയില്‍ നിന്ന് കരിന്തിരിയിലേക്കും മറ്റേത് കൂട്ടിയാര്‍ നിന്ന് കപ്പക്കനത്തേക്കുമാണ്.

കേരള സര്‍ക്കാര്‍ 2006-ല്‍ മീനച്ചില്‍ നദീതട പദ്ധതിക്ക് ഉയര്‍ന്ന പ്രാധാന്യം നല്‍കിയിരിക്കുന്നു. ഈ പദ്ധതി മൂവാറ്റുപുഴയിലുള്ള അധിക ജലത്തെ മീനച്ചിലാറിലേക്ക് തിരിച്ചുവിടാനായി അറക്കുളത്തുനിന്ന് മേലുക്കടവിലേക്ക് ഒരു ടണല്‍ നിര്‍മ്മിക്കാന്‍ വിഭാവനം ചെയ്യുന്നു. ടണലിന്റെ നിര്‍മ്മാണം ഈ പ്രദേശത്തെ ജല ലഭ്യത കൂട്ടുവാന്‍ സഹായിക്കും എന്ന് പ്രതീക്ഷിക്കുന്നു.

[തിരുത്തുക] പരിസ്ഥിതി പ്രശ്നങ്ങള്‍

അടുത്തകാലത്തായി മീനച്ചില്‍ നദീതടത്തില്‍ പല പ്രധാ‍ന പരിസ്ഥിതി പ്രശ്നങ്ങളും ഉടലെടുത്തിരിക്കുന്നു. അവയില്‍ ചിലത് ചുവടെ ചേര്‍ക്കുന്നു.

മീനച്ചിലാറിലെ ജലം വഴിക്കടവ് തടയണയില്‍ നിന്ന് ഇടുക്കി അണക്കെട്ടിലേക്ക് തിരിച്ചുവിടുന്നത് നദിയിലെ ജല ലഭ്യത കുറയ്ക്കുന്നു.
വാഗമണില്‍ വിനോദ സഞ്ചാരത്തിന്റെ അമിതമായ ആധിക്യം മീനച്ചിലാറിന്റെയും പരിസര പ്രദേശത്തെയും ജീവജാലങ്ങളെയും പരിസ്ഥിതി സന്തുലിതാവസ്ഥയെയും ബാധിക്കുന്നു.
ഒരുപാട് തടയണകളുടെ നിര്‍മ്മാണം
അനധികൃത മണല്‍‌വാരല്‍ മൂലം നദിയുടെ അടിത്തട്ട് നശിച്ചു.
നെല്‍പ്പാടങ്ങള്‍ നികത്തി വാണിജ്യ-ഗാര്‍ഹിക ആവശ്യങ്ങള്‍ക്കായി ഉപയോഗിക്കുന്നത്.
നെല്‍പ്പാടങ്ങളില്‍ നിന്ന് കളിമണ്ണും ചെളിയും ചുടുകട്ട വ്യവസായത്തിനായി വാരിക്കൊണ്ടുപോവുന്നത്.
ഈരാറ്റുപേട്ട, പാലാ, ഏറ്റുമാനൂര്‍, കോട്ടയം എന്നി സ്ഥലങ്ങളില്‍ നിന്ന് നദിയിലേക്ക് നഗര മാലിന്യങ്ങള്‍ തള്ളുന്നത്.

[തിരുത്തുക] സാംസ്കാരിക സ്വാധീനം

അരുന്ധതി റോയിയുടെ ബുക്കര്‍ സമ്മാനം ലഭിച്ച കൃതിയായ “ദ് ഗോഡ് ഓഫ് സ്മാള്‍ തിംഗ്സ്“ (കൊച്ചു കൊച്ചു കാര്യങ്ങളുടെ തമ്പുരാന്‍) മീനച്ചിലാറ് ഒഴുകുന്ന അയ്മനം ഗ്രാമത്തിന്റെ പശ്ചാത്തലത്തിലാണ് എഴുതിയിരിക്കുന്നത്.