Edsger Dijkstra
De Uiquipedia
Edsger Wybe Dijkstra (Rotterdam, 11 de mayu de 1930 – Nuenen, 6 d'agostu de 2002) foi un informáticu holandés. En 1972 dieron-y el premiu A. M. Turing poles contribuciones fundamentales que fizo na estaya de los llinguaxes de programación.
Dijkstra estudió física teórica na Universidá de Leiden. Trabayó pa Burroughs Corporation, la Universidá Teunolóxica d'Eindhoven y la Universidá de Texas n'Austin. Retiróse nel añu 2000.
Ente les mayores contribuciones de Dijkstra a la informática tan l'algoritmu del camín más cortu (nomáu Algoritmu de Dijkstra) o'l semáforu, una ferramienta pa sincronizar programes.
Otra de les contribuciones más remembraes de Dijkstra foi l'artículu Go To Statement Considered Harmful, espublizáu en 1968, nel que criticaba l'emplegu de la orden goto en programes d'ordenador. Esti artículu considérase perimportante nel desendolcu de la programación estructurada, ún de los primeros pasos dica la inxeniería del software. Tamién trabayó n'otros proyeutos importantes, como'l primer compilador pal llinguaxe ALGOL 60. Dempués trabayó na estaya de la verificación formal de programes.
Amás de investigador científicu, Dijkstra foi un home con gran pruyíu pola enseñanza, que exerció n'universidades como la de Eindhoven o la d'Austin (Estaos Xuníos); dizse que yera un escelente profesor.
Dijkstra morrió de cáncer en 2002. Munchos de los sos escritos caberos (fechos con pluma) escaneáronse dempués y alcuéntrense n'internet.
[editar] Enllaces esternos
- Go To Statement Considered Harmful (n'inglés)
