Con Steynbek

Vikipediya, açıq ensiklopediya - ویکیپدیا ، آچیق انسایکلوپدیا

Con Steynbekin
Con Steynbekin
Doğumu
27 Fevral, 1902 Salinas vadisi Kaliforniyada
Vəfatı
20 Dekabr , 1968 Nyu-York

Con Steynbekin (27 Fevral, 1902 – 20 Dekabr , 1968), Amerika yazıçısı.

Con Steynbekin əsərləri onun öz ölkəsində, yaşayıb yaratdığı Amerika Birləşmiş Ştatlarında geniş oxucu auditoriyası qazanmışdır. Onun əsərləri hər il yüksək tirajlarla çap olunaraq yayılmaqdadır. Dünyanın bir çox ölkələrində bu kitablar müxtəlif dillərə tərcümə olunur və daha da populyarlaşır. Steynbekin Kaliforniyadakı Salinas şəhərciyində evi muzeyə çevrilmiş (1974), çox geniş ədəbi-ictimai fəaliyyətə malik Con Steynbek cəmiyyəti yaradılmış, qədirbilən xalqı yazıçının xatirəsini əbədiləşdirmək üçün bir çox təşəbbüslərin gerçəkləşməsini təşkil etmişdir. Steynbekin əsərlərindəki alleqoriya, tənqid, bütünlükdə Amerika reallıqlarını əks etdirən məqamlar bu qabaqcıl cəmiyyət üçün bir ibrət güzgüsü və gerçək olaraq qəbul edilmişdir.

Steynbekin ilk kamil əsəri olan «Lacivərd Örüş» kitabında bəhs olunan kiçik Salinas şəhəri Folknerin əsərlərindəki xəyali Yoknapatafa dairəsinə bənzər mistik rol oynamışdır. Steynbekdə Salinas Folkner yaradıcılığında onun doğma Oksford şəhərində Misisippi boyunca uzanan Lafayet qədər əhəmiyyətli təsirə malikdir. Qarşılıqlı əlaqədə olan hekayələr toplusu «Lacivərd Örüş» kitabında sakit Kaliforniya vadisində yaşayan ailələrin iztirabla dolu sirrli həyatları və bədbəxt taleləri təsvir olunmuşdur. Romantizmin qüdrəti və yüksək bədii-təsvir imkanları sayəsində C.Steynbek Salinas – Kaliforniya timsalında bütün Amerikanı, bu mühitin tərkibi kimi isə «orta amerikalıları» daha dəqiq desək, Amerika cəmiyyətini konkretləşdirmiş və böyük ustalıqla tarixi qanunauyğunluqların xalq həyatına daxil olması prosesinin bu adamların yaşayışında, mənəviyyatında əmələ gətirdiyi köklü dəyişiklikləri realist boyalarla göstərə bilmişdir.

1933-cü ildə Corc Albeyə ünvanladığı məktubda C.Steynbek ürəyindən keçənləri belə yazır: «Mən bütün vadi haqqında əsər yazmaq istərdim, kiçik şəhərləri və kəndlərindəki, vəhşi qayalarındakı təsərrüfatların hamısından. Və görərdim ki, bu yerlər dünyanın vadisinə necə çevrilər...».

Tədqiqat işinin əsas predmeti kimi Con Steynbekin iki böyük romanı – «Qəzəb Salxımı» və «Həyəcanlarımızın Qışı» adlı əsərləri geniş təhlilə cəlb olunmuşdur. Bu əsərlər Amerika və dünya ədəbiyyatının ən samballı nümunələrindən sayılır.

C.Steynbekin «Qəzəb Salxımı» əsəri Amerikada kənd təsərrüfatı sahəsində islahatların aparılması zərurətini ortaya qoyaraq çoxlarını bu barədə düşünməyə vadar etdi. «Qəzəb Salxımı» romanı çap olunduqdan sonra böyük səs-küyə səbəb olur. Amerika Fermerlər Assosasiyası yazıçını məhkəməyə verir. Onlar əsərdə bəhs olunan problemlərin reallığı əks etdirmədiyini bildirir və Steynbekdən üzr istəməsini tələb edirlər.