Laban luzeen gaua
Wikipedia(e)tik
Laban luzeen gaua 1934eko ekainaren 30koari deritzo, noiz Adolf Hitlerren aginduz Sturmabteilungeko (SA) buruzagiak atxilotuak edota erahilak izan ziren. 1933an gobernura heldu zenetik, alderdi Naziak estatuaren estruktura guztiaren jabe egiteko prozesua hasi zuen. Prozesu honetan paper garrantzitsua izan zuten SA edota alderdi naziko eraso taldeek. SA 1921ean sortutako talde paramilitar bat zen, alderdiaren fronte armatua osatzen zuena.
Gobernura heldu ostean, Hitler enpresari eta militarrekin harremanak estutzen saiatu zen. Erlazio hauetan SA (zeinak 1934ean, 4.500.000 kide zituen) arazo bat bihurtu zen. Enpresariak paramilitarren jokaera bortitzaren beldur ziren eta militarrek postua kenduko zietela uste zuten. Gainera, alderdi Naziaren barnean korronte ezkertiar bat zegoen, erregimen sozialista bat ezarri nahi zuena. SAko buruzagi batzu homosexualak izateak ere atzeraka eragiten zion alemaniar burgesiari.
Guzti honi alderdi Naziaren barneko lehiakortasuna gehitu behar zaio. Heinrich Himmler (SSen buruzagia), Reinhard Heydrich eta Hermann Göringek SA paretik kendu gura zuten eta Hitler etengabe presionatzen zuten talderen boterea murrizteko. 1934tik aurrera, SAko buruzagien eta Nazi alderdiko ezkertiar korronteko kideen arteko harremanen zurrumurru interesatuak zabaltzen hasi ziren. Himmelerrek SAk estatu kolpe bat emateko asmoa zuela zioen txosten bat aurkeztu zion Hitlerri.
1934eko ekainaren 30ean, Hitler eta SSen pelotoi bat Wiesseko etxebizitza batean aurkeztu ziren, non Hitlerren aginduz SAko buruzagi nagusiak bilduta zeuden. Atxilotuak eta asko erahilak izan ziren. Denera 200 bat pertsona hil zirela uste da.
