Rimmesjtók

Van Wikipedia

Dit artikel is gesjreve in 't Valkebergs. Ómdat 't plaatsgebónje is, maogs doe 't ómzètte nao 't Rimmesjtóks, as te dit dialek sjpriks.

Rimmesjtók (Nederlands: Reijmerstok) ies 'n dörp in de gemeinte Gulpe-Wittem in 't heuvelland van Nederlands Limburg. In 2003 wone d'r ca 600 luuj. Neve de (oarsjprónkelike) oetsjpraok Rimmesjtók weurt ouch Remmesjtók, Rimmersjtók en Remmersjtók gezag.

[bewirk] Gesjiedenis

De naam kump van 'ne Mieddelièwse ridder Reijmer. 't Twiède gedeilte van 't woord: stok, ies 'n oud woord veur sjtam of hoes. De hière woonde op 'ne versjterkde haof, op de plek woa noe de Pöthaof sjteit. Hie zint potsjerve gevónge, daterend oet de 9e ièw (Karolingische tied). Veur drinkwater waor me aangeweze op 'n groate pool, de Wieërt, neve de boerderie. Nao de Twiède waereldoorlog ies 'r gedemp.

De familie Reijmer houw eigendómme in de Voersjtreek, woa noe Rimmersjdel liek en bie Nut: Kesjtièl Reijmersbaek. De groate verbingingswaeg van Luuk euver Visé, Gulpe nao Aoke leep vlakbie. Dae ies nog hèrkènbaar aan de naam: Ouwe Lukerwaeg.

Twiè nuuj buurte heisje: 't Pötveld en de Reijmer, gelege aan de weskant van de Dörpssjtraot.

[bewirk] Dialek

Rimmesjtók liek nog net binne de grens van de Benrather Linie. 't Versjiensel r-sjoew ies ein kènmerk. Nao 'ne klinker vèlt de r weg es d'r 'n s, 'n t of st volg. Bieveurveeld: paeëd (paard), paoët (poort), zjwat (zwart), beusjtel (borstel), ieësjte (eerste). De lien löp langs Gulpe, Wielder, Ranzel en door Klumme. In Tebannet en Mergraote sjpreke ze die r waal oet. Van dae kant zou de r kómme in de nujer versie van de plaatsnaam: Rimmersjtók en Remmersjtók.

[bewirk] Bezeenswaerdig

'n Groat aantal boerehäöf mèt rón poorte aan de Dörpssjtraot.
De baksjteine hièregood de Pöthaof oet 1650 sjteit op de plaats woa ièrder 'n soort börch sjtóng. De naam geit truuk nao de pöt neve 't geboew. 'ne Ièrdere naam waor Bokkenhäöfke. Op 'ne sjleetsjtein, bove'n 'n deur op de plei, sjteit 'ne geitebok aafgebeeld mèt es óndertitel: In den Bock 1734. 'n Sjuur haet sjpeklaoge.
'n Paar ouw vakwerkhoezer.

De gebreursj Laugs höbbe ziech toegelag op 't boewe in vakwerk. In de jaore 90 van de 20e ièw ies begoes met 't optrèkke van 'n vieftal neo-romantische vakwerkpande mèt toepassing van inheemse boewmateriale: maaskeie, breuksjtein, veldbrandsjtein, ouw deure en ouw panne.

'n Katholieke kèrk oet 1925 gewiejd aan de heilige Franciscus. 't Geboew ies van baksjtein en haet op de tore 'n zaaldaak. Daoneve sjteit 't oud mergele Franciscuskèrkske oet 1838, dat noe es woning deens deit. Op 't plein veur de kèrk sjteit 'n beeld: de Reijmer geneump.
Tramviaduct, woa-euver van 1925 tot 1938 de tram leep van Mestreech nao Aoke. Bie 't viaduct waor jaorelank 'n halte A g'n tram.
Natuurgebeed de Klingenderbösj

[bewirk] Dörpsvereiniginge

Fanfare St. Franciscus
Carnavalsvereiniging de Paoëtekiekers (vanwege 't groat aantal poorte in 't dörp).
Jónkheid Reijmerstok

[bewirk] Evenemente

Zomerkèrmes twiède zóndig van juli.
De paoëte va Rimmesjtók, 'n jaorlikse kunsmanifestatie woa achter miè es 25 poorte van (veurmalige) boerderieje 'n groat scala aan kuns weurt geëxposeerd.
Reimeifièste. Saer 1972. Op de lètste zaoterdig van mei en de ièrsjte zaoterdig van juni vinge live-optraejes plaats door versjillende pop-bands. Daoneve weurt discomuziek gedrièjd.

Gemeinte Gulpe-Wittem