Cjargne

De Vichipedie, la enciclopedie libare dute in marilenghe.

La Cjargne e je une regjon storiche dal Friûl, tes Alps Orientâls; i siei confins a son la Cjadene Cjargnele Principâl, che e segne il confin cun l'Austrie a nord, il confin cun la provincie di Pordenon e po la confluence de Fele tal Tiliment a sud, il cjanâl d'Aupe a jevât e il confin cul Venit a bonât, par une superficie totâl di 1220 km². Il cjaulûc de Cjargne al è Tumieç, che cui siei 10.500 abitants e jè la citât plui grande e plui impuartant di cheste regjon. Fuarts rapuarts storic a lein la Cjargne cu lis areis confinantis de Provincie di Belun e ancje cun il Friûl culinâr.

Stali in Cjargne

[cambie] Gjeografie

[cambie] Cjanâi e flums

La Cjargne e je une regjon componude di siet valadis, ognidune cul sô torent (mancul il Cjanâl di Monai):

Cjanâl di San Pieri, traviersât dal Bût

Cjanâl di Guart, traviersât dal Dean

Cjanâl di Lumiei, traviersât dal Lumiei

Cjanâl di Peteç, traviersât dal Tiliment

Cjanâl Pedarç, traviersât da la Pesarine

Cjanâl d'Incjaroi, traviersât dal Cjarsò

Cjanâl di Monai (clamât ancje Valcjalde)

Chescj flums a si butin ducj tal Tiliment, des bandis di Tumieç.

[cambie] Lis monts

Dal pont di viste gjeologjic a si cjatin diviers gjenars di piere intes monts: il calcâr, la dolomie e la silice. La mont plui alte e jè il Colians (2780 m). Lis altris cimis plui impuartantis a son:

la Peralbe (2694 m)

la Cridule (2.580 m)

il Clap Grant (2.487 m)

la Bivare (2.474 m)

la Crete Forade (2.462 m)

il Siere (2.443 m)

la Crete di Seregnò (2.190 m)

la la Mariane (1906 m)

Il Colians	Il Colians viodût di Pozòuf	La Peralbe	La Crete di Seregnò
Sot di soreli sul Sernio	La Mariane	La Tinise	La Crìdule

[cambie] I lâcs

In Cjargne i lâcs a son pôcs e avonde piçui; il plui grant e impuartant al è chel di Cjavaç. Pò a vegnin chel di Sauris, e cualchi lagut minôr come il lâc Avostanis sore Tamau, o i lâcs di Volaie e Bordaglie sore For di Avoltri, piçui ma une vore interessants dal pont di viste paesagjistic.

[cambie] I paîs

Architeture rurâl: Toglât a Clavaiis

Lis Dolomitis di For Disore

Al è po di zontâ a chescj il comun di Sapade, al dì di vuê sot de provincie di Belun

[cambie] Storie

I cosacs in Cjargne

L'ataman cosac Krasnoff

Une volte colade la republiche libare, in Cjargne a rivarin gnûfs invasôrs: i cosacs, vignûts in Friûl za ta la Istât dal 1944. In principi il lôr numar al ere di 20.000, ma a tocjarin lis 40.000 unitâts te vierte dal '45 (al si tegni cont che la popolazion cjargnele in chê volte e jere di mancul di 60.000 animis); cun lôr a puartarin lis fameis, i cjars, i imprescj e 6.000 cjavai. Chescj cosacs a erin une popolazion di origjine russe, che a volevin ribaltâ il guvier bolscevic dal URSS; cussì cun la vignude de vuere a si alearin cui todescs. Cuant che però la vuere e scomençà a lâ mal par l'"asse" e la armade rosse e pocà fûr de Urss i naziscj, Hitler al fo costret a prometiur une gnove patrie dute par lôr: la Kosakenland in Nord Italien, che no jere altri che la Cjargne. Cussì te Istât dal '44 Hitler al assegnà dut il teritori cjargnel, plui une part dal Alt Friûl (comuns di Bordan, Buie, Maian, Trasaghis) a dôs divisions russis, une cosache cjapitanade dal ataman Krassnov, chê altre caucasiche, che e jere za stade impegnade in Polonie. Come capitâl e fo sielzude Verzegnis. Par la int cjargnele la ocupazion e fo un veri e propi martiri, ancjemò vuê ben vîf tai ricuarts dai viei: cualchi famee e fo butade fûr di cjase par fâ puest ai gnûfs rivâts, un grum invezit a forin obleadis a convivi cun int da lis usancis cussì diviersis des lôr che ducj i tentatîfs di comunicazion a erin praticamentri dibants. Un grum a forin po i ats di violence ai dams de popolazion; tra i plui cognossût la espulsion di scuasit ducj i abitants di Dalès, Bordan e Trasaghis, i sacs di Cedarcjis, Cjadugnee, Dinvilin e Sudri. A Dimponç il predi dal paîs, don Giuseppe Treppo (medaie d'aur al valôr civîl) al vignì copât par vê cirût di salvâ dôs feminis dal stupri. Ma l'acjadiment che al è restât sigurementri plui tignût adamens te popolazion al è stât la coparie, ai 2 di mai dal 1945, di 22 personis a Davâr: i cosacs, bile che a si ritiravin, a vignirin tacâts di bande dai partesans; par rapresae a reagjirin cun chest ecidi. La ocupazion difat e durà fin al mai dal '45; cuant che i cosacs, par vie de avanzade angloamerecane in Italie a pierderin la sperance di vê la Cjargne dute par lôr, cjapadis fameis, cjârs e cjavai, a si incolonarin viers il Pas di Mont di Crôs, e di lì te valade dal Gail. Culì però par lôr e jere stade preparade une brute sorprese: a Yalta i cjâfs dai esercits aleâts a vevin difat stabilît che i cosacs a varessin vût di jessi consegnâts a la armade rosse: chest al voleve dî la fusilazion par i uficiâi e la deportazion tai gulag siberians par i altris. Alore il plui dai cosacs al stabilì di suicidâsi dibessoi: cussì tal mai dal '45 a si butarin, cun lis lôr fameis, tes aghis de Drave murint ineâts.

Il non Cjargne al ven de popolazion che pe prime volte e fo a stâ in cheste regjon, i Gjai Cjargnei, rivâts culì dal Pas di Mont di Crôs plui o mancul tal 400 a.C. Cuant che al rivave il frêt unvier, i Cjargnei a levin jù te pedemontane cun lis lôr bestiis. La prime date storiche da la vignude dai Cjargnei e si à tal 186 a.C., cuant che cirche 50.000 di lôr fra oms, feminis e fruts, vignûts jù te pedemontane dulà che passavin l'unvier, a fondarin in somp un cuel une vile clamade Akileja. I romans, che a si davin pinsîrs par la espansion di chest popul, cuntun grant esercit a sdrumarin la vile e a ributarin i Cjargnei fra lis monts, fondant te Basse une lôr citât che clamarin par l'apont Aquilee. I Cjargnei però, par cjapâ possès dai plui morbits teritoris de planure furlane, a si alearin cui Celts da l'Istrie, cui Gepidi e cui Taurisci par vinci i romans; alore i romans a mandarin lis legjons dal consul Marco Emilio Scauro, che al sbaraià i Cjargnei cuntune grande bataie tal 115 p.d.C. Cussì i romans a divenerin i parons de Cjargne, là che fondaron tal I secul a.C. la colonie di Iulium Carnicum (al dì di vuê Zui) che e permeteve di controlâ la vie dite Iulia Augusta che puartave tal Noric e che e deventà la localitât plui impuartant de Cjargne. Cun la vignude da la religjon cristiane Iulium Carnicum e fo sede di une diocesi che leve pardabon di fûr dai confins di ce che è la Cjargne vuê. E fo fonfade la Plêf di San Pieri, che e cjape il non dal cuel di San Pieri, là che e je logade. Il prin patriarcje che o savìn il non al fo Ienuarius, muart tal 490; in chest periodi la regjon e subì un grum di invasions, la plui impuartant chê dai Langobarts, calâts in Friûl tal 568. E propite tal periodi langobart i vescui a scomençarin a bandonâ la Cjargne par lûcs plui segûrs come Cividât e Grau, e dal 737 no forin plui nomenâts vescui pe diocesi di San Pieri; la cure des animis e fo dade a un proposit, che al veve lis funzions di arcidiacon de Cjargne. Pò, cun la nassite dal Patriarcjât di Aquilee, tal 1077, la Cjargne e fo part dal Patriarcât, par passâ po sot de Republiche di Vignesie tal 1420; i vignesians propite de Cjargne a cjapavin gran part dal legnam che ur coventave par fâ sù lis lôr nâs. Cul Tratât di Cjampfuarmit, tal 1797, e passà, tal mût di dut il Friûl sot dal Imperi Austro-Ongjarês, par tornâ a la Italie tal 1866, dopo da la tierce vuere di indipendence. Cun la vignude de Prime vuere mondiâl, la Cjargne e fo un teritori in prime linie. E nassè la "Zone Cjargne", comandade dal generâl Lequio, che leve da la Peralbe fin tramai al Rombon. Cun la rote di Cjaurêt, ai 24 di otubar dal 1917, la Cjargne e fo invadude dai austri-todesc; la ocupazion e durarà par un an, fin ae liberazion, avignude tal novembar dal 1918. Ancje te Seconde vuere mondiâl la Cjargne e à vût di subî une invasion, cheste volte di bande dai cosacs, vignûts de Russie tal 1944 clamâts di Hitler, che al veve fât dal Friûl, e de Cjargne in mût particolâr, la Kosakenland la tiare dai cosacs. I cosacs combaterin cuintri dai partesans cjargnei, che a vevin metût sù la Republiche libare de Cjargne, nassude tal setembar dal 1944 e muarte tal otubar dal midiesim an. Tal mai dal 1945, cun la sconfite da la Gjermanie, i cosacs a si ritirarin, copant 22 oms in chel di Davâr parcè che i partesans ju vevin tacâts. Cun la fin de vuere in Cjargne e tornà la normalitât, fate però di miserie e di puaretât par il plui da la int; a forin un grum i cjargei che tai ans daspò la vuere a scugnirin migrâ, prime vie pal mont, po cul boom industriâl talian la migrazion e fo plui concentrade viers la planure furlane e lis grandis citâts dal nestri paîs, in mût particolâr Milan e Torin. Tal dicembar dal 2003 e fo mitude ai vôts la propueste pe creazion de provincie de Cjargne, dal Glemonês e dal Tarvisian, cun cjaf lûc Tumieç: di fat in Cjargne e je presint une fuarte fuarce autonomistiche, par vie des resons socio-economichis che a diferenciin cheste bande dal Friûl dal rest de provincie di Udin; il referendum dut câs al à vût esit negatîf (46% favorevui ae gnove provincie cuintri il 54% dai contraris), par vie de oposizions dai comuns dal Glemonês e dal Tarvisian.

[cambie] Clime

Il clime de Cjargne al è garp; une vore frêt cun bondantis neveadis di unvier e fresc di istât cun gruessis plois. Al si cjate culì, a pet de altris regjons des Alps, un sbassament dai limits altimetrics plui o mancul di 400-500 m; par dîsi, se tes Alps Orientâls o Centrâls la vegjetazion no cres plui sore dai 2.300 metros, in Cjargne e dismèt za a 1.900 metros.

[cambie] La flore

La plui part de Cjargne e je cuvierte dai boscs, soredut peçs, fajârs e laris, mentri plui in alte cuote si cjatin i passons, logâts sù pes clevis cun buine esposizion al soreli ma masse erts pe agricolture. In Cjargne a son presints 2.000 specis vegjetalis e plui di 1.000 gjenars di foncs.

La vegjetazion mude biel che aumente la cuote. Fin ai 400-500 m a van sù i boscs di rôi e di cjastinârs e lis culturis de zone sub-montane. Ca di pôc a subentre la flore montane: boscs di fajârs, peçs e pins. Sore dai 1.500 m, la vegjetazion arboree e si presente avonde puare, i arbui a scomencin a deventâ vie vie plui rârs, piçui e dispueâts fin a tocjâ il limit altimetric, che in Cjargne lu si cjate a 1.700 m, e al è il plui bas di dute la regjon alpine. Sore di cheste cuote a cressin dome sterps, baràçs, plets di cerniculars, in talian "mirtilli" e verts passons. Di vierte, si pues viodi in chescj pascs il sclop di colôrs dai flôr di mont, des cosulutis e des genzianis.

[cambie] La faune

La Cjargne e je habitat naturâl par un grum di nemai; tra chescj si cjatin la marmote, il cjamoç, il stinbec, il cjavrûl, il gjal cedron, la pernîs, l'acuile. Cualchi volte al è ancje capitât che un valigjan si sedi imbatût tal ors. Condiplui, tal 2005 e jè stade scuvierte par opere dai ricercadôrs de Universitât di Udin tai boscs dongje Soclêf une gnove specie di nemâl, clamât cjan-procion.

[cambie] Popolazion

Al dì di vuê la Cjargne e à cirche 40.000 abitants, cun plui di 10.000 dome a Tumieç. La densitât e je une vore basse, par la plui part de regjon al di sot di 50 abitants par kmq (nome i comuns plui grancj par abitants e plui piçui par estension superin, ma di pôc, chiste suee: Tumieç, Davâr, Sudri, Darte, Vile di Cjargne, Enemonç) e il probleme dal abandon dai paîs al è une vore fuart; dopo dal 1866, cu la Unificazion de Italie, un grum di int e lassà la sô tiere par emigrâ in Europe, Americhe o Australie, cirint un futûr mancul puar e cence dutis lis dificoltâts de vite in montagne. Ancjemò vuê a son pocjis lis industriis, ancje se chest al à judât la conservazion dal ambient.

Censiment de popolazion cjargnele:

1871: 43.556 abitants

1881: 50.627

1891: 57.160

1901: 63.298

1911: 63.298

1921: 65.478

1931: 60.148

1936: 54.823

1951: 61.230

1961: 57.622

1971: 49.506

1981: 46.129

1991: 42.685

2001: 40.151

[cambie] Lenghe

Par cuasi dute la regjon si fevele furlan, te variant cjargnele. Propite la Cjargne e jè definide da cualchidun il baluart dal furlan, parcè che di fat culì a si son conservadis espressions e peraulis antichis che in planure a son stadis talianizzadis. Un esempli e jè la peraule cartufule, di origjin todescje, che te basse e ven spès sostituide cun patate o ancje la peraule cernicule, in talian mirtillo e che ta in ta bàsse a clamin gjenericamentri mores. Il furlan de Cjargne al è conservadôr par i suns consonantics, ma inovadôr par chel che rivuarde lis vocâls; di fat i varis dialets cjargnei a àn insiorât il propit sisteme vocalic cun un grum di ditoncs primârs e secondârs. Il cjargnel centri-orientâl cui ditoncs secondaris nèif (nêf), cròus (crôs), al si diferenzie parò di chel occidentâl nìaf crùas. A Sapade, Sauris e Tamau invezit, di un grum di secui in cà a son fevelâts dialets todescs puartâts casù de ints todescjis te etât di mieç. Al dì di vuè parò chestis lenghis a son coladis in disûs, soplantadis da furlan e talian.

[cambie] Economie

Il Cjanâl Pedarç viodût di Clavaiis

Par vie dal teritori montagnôs, in Cjargne l'agricolture e je pôc mitude in vore; si coltivin soredut cartufulis, fasoi e blave. L'arlevament invezit al è une vore presint: a vegnin alevadis vacjis, pioris e purcîts, di cui vegnin salams, luaniis e speck (famôs al è chel di Sauris), mentri a nivel familiâr si arlevin gjalinis e dindis. Lis principalis industriis a son chês c'a àn a ce fâ cun il disfrutament dal len (seis, marangoneriis, fabrichis di mobils) e fabrichis di ocjai, pratiche impuartade dal Cjadovri (soredut a For Disore) e di orlois (Pesariis). In plui te basse cjargne, te zone di Damâr, e si cjate di cualchi an une vere e proprie zone industriâl, là che àn cjatât lavôr un grum di cjargnei. Impuartant pò al è il turism:i majôrs centris a son sigurementri For Disore, localitât di vilegjiature estive e di sports invernâi, e Ravasclêt, dulà c'al si cjate, tes monts Çoncolan (1.750 m) e Tamai (1.970 m), il plui grant complès schiistic di dute la regjon. Impuartant e jè ancje Darte par vie des nomenadis termis. Difondût aromai par dute la Cjargne al è pò un turism di gjenar ambientalistic, graciis a la bielece dal paesaç e dai paîs: cussì si cjatin visidadôrs tal Cjanâl Pedarç (in mût particulâr a Pesariis), a Sauris, a Paulâr, a Tamau, su lis olmis dai alpins de grande vuere, a Dimpeç, a For di Avoltri e Comelians, dome par dî i lûcs plui frecuentâts.

[cambie] Gastronomie

Chê cjargnele e jè une cusine puare, par vie dai pôcs gjenars alimentars che la nature e fornîs di chestis bandis; di fat in Cjargne, teritori montagnôs, l'agricolture e jè une vore dificil, tant che une volte, fin ai prins ains '50, i cjargnei a vignivin jù te planure par cjoli in fal i imprescj che dilunc il frêt unvier a fabricavin cul len cun blave e altris robis che in Cjargne no si cjatavin. E dîs une vilote:

Vegnin jù i cjargnei de Cjargne

vegnin jù batint il tac

cun la pipe inte sachete

cence un fregul di tabac

I plats principâi di cheste regjon duncje a son la polente, che par un grum di ains e à permitût di sorevivi in montagne, e lis mignestris, in mût particulâr la sope di fasui, clamade a Sudri dal disesiet, par ricuardâ l'an de invasion austro-todescje, e la jote, une sope di broade cuete cun fasoi, lat e farine di sorc. Cussì dîs un' altre vilote:

I cjargnei mangjn la jote

e la cuinzin cui gjardons

e la fieste si petenin

par ch'ju crodin bogns parons

[cambie] Manifestazions

5 di zenâr-Der orsh vander belin-il cûl de belin Sauris
periodi di carnevâl-Carnevâl sauran Sauris
Vinars Sant-Vie Crucis Lauc
28 di mai-Bussade des crôs Zui
lui-fieste dal persut Sauris
25 di lui-Fasin la mede Sudri
Vie per l'an-Tîr des cidulis Darte, For di Avoltri, Lauc, Paulâr

[cambie] Personaçs impuartants

Manuela di Centa, sportive
Giorgio di Centa, sportîf
Jacopo Linussio, industriâl
Pietro Piller Cottrer, sportîf
Leonardo Zanier, poete

[cambie] Galarie fotografiche

Il lâc di Volaie	Viodude di For di Avoltri	Montagnis di Sapade	Viodude di Marançanis
La concje di Paulâr	Il paisut di Clavaiis	Viodude di Trep di Cjargne	La glesie de Madone dal Carmine a Lenzon
Il Cjanâl di Peteç a Dimpeç	Sauris Disot	Stali in Cjargne