Bohemoslovacia

E Vicipaedia

Bohemoslovacia post et ante Alterum bellum universale

Bohemoslovacia sive Res Publica Bohemoslovaca imperio Austro-Hungarico everso condita abs anno 1918 usque ad annum 1992 civitas in media Europa fuit, quae Germaniae, Austriae, Poloniae, Hungariae, Ucrainae, Unioni Sovieticae, Dacoromaniae adiacebat; eadem res publica Bohemiam, Moraviam, Silesiam, Slovaciam, Rutheniam Subcarpathaneam continebat. Terras Bohemicas, i.e. Bohemiam, Moraviam, Silesiam plerumque Bohemi, partim Theodisci et Poloni, Slovaciam Slovaci, partim Hungari, Theodisci, Poloni, Rutheniam Subcarpathaneam Russini et Hungari incolebant. Caput Bohemoslovaciae Praga, capita terrarum singularum Praga (Bohemia), Bruna (Moravia et Silesia), Bratislavia sive Posonium (Slovacia), Užgorod (Ruthenia Subcarpathanea) fuerunt. Bohemoslovacia tamquam res publica unius gentis Bohemoslovace loquentis condita est; utrum haec gens re vera fuerit necne, in dubio est.

Anno 1938, i.e. paulo ante alterum bellum gentium Bohemoslovacia secundum foedus Monacense ab gubernatoribus Germaniae, Magnae Britanniae, Franco-Galliae et Italiae factum confinia Bohemica, Silesiaca, Moravica Germaniae et partim Poloniae, confinia deinde Slovaca et Subcarpathanea Hungariae et partim Poloniae concedere coacta est omnesque Bohemoslovaciae partes ius sui administrandi acceperunt. Quin etiam anno insequenti Hitlerus, tyrannus Germaniae, minatus effecit, ut Slovaci Rem Publicam Slovacam declararent et Bohemia cum Moravia se sub tutelam Imperii Theodisci dederet; quo facto reliqua pars Bohemiae et Moraviae protectoratus Theodiscus facta est gubernatoresque Bohemoslovaci, qui se in exsilium Britannicum iam pridem contulerant, semet ipsi gubernatores Bohemoslovaciae occupatae declaraverunt.

Altero bello omnium gentium confecto omnes terrae praeter Rutheniam Subcarpathaneam, quam Unio Sovietica occupavit, rursus in Bohemoslovacia coniunctae sunt. Deinde ab anno 1968 usque ad annum 1992 Res Publica Slovaca et Res Publica Bohemica unam Foederativam Rem Publicam Bohemoslovacam conformabant, quae anno 1993 divisa est in partes duas, quarum una "Res Publica Slovaca" sive "Slovacia", altera vero "Res publica Bohemica" appellatur.

[recensere] De nomine Bohemoslovaciae

De nomine rei publicae adhuc disputatur, nam e.g. Carolus Egger nomine Tzechoslovaciae usus est; attamen Academia scientiarum huius rei publicae primum "Academia scientiarum Bohemoslovenica", deinde "Academia scientiarum Bohemoslovaca" nuncupabatur. Hoc nomen in usum inductum est, propterea quod vox Slovenica non ad Slovaciam, sed potius ad Sloveniam, illis temporibus partem Iugoslaviae, pertinebat. Praeterea in Lexico Bohemo-Latino anno 1992 edito tres versiones nominis huius rei publicae propositae sunt:

Československo: Bohemoslovenia (forma vetustior), Bohemoslovacia (forma recentior); Tzechoslovac(h)ia (-kia); (nomen officiale) Česká a Slovenská federativní republika Res Publica Bohemica et Slovaca.

československý: Bohemoslovenicus, Bohemoslovacus

Lexicon: Zd. Quitt - P. Kucharský, Lexicon Bohemo-Latinum voces antiquae et recentioris Latinitatis continens, Publica domus editoria paedagogica, Pragae 1992 (editio prima), 901 pp.

Europa — Civitates

Europa — Territoria

Categoriae: Bohemoslovacia | Tzekia | Slovacia

Bohemoslovacia

E Vicipaedia

[recensere] De nomine Bohemoslovaciae

Views

Navigatio

communitas

Quaerere

Linguis aliis