Grööntüüch
From Wikipedia
Grööntüüch kann ok witt, rood oder geel wesen, man fresch mutt dat wesen, wegen de Vitamine.
Dat wichtigste is woll jümmers noch de Kool. Den gifft dat as Gröönkool, Rosenkool, Koppkool, Koolrabi un Blomenkool.
Den Koppkool gifft dat as Wittkool, Roodkool, Spitzkool un Wirsing.
Denn kummt all de Woddeln oder Wuddeln. De wardt faaken tosamen mit gröne Arfen kookt.
Mit de Arfen verwandt sünd de grönen Bonen, de in dat Gericht Beern, Bonen un Speck höört, man meist mit Petersilie as Bilaag eten wardt.
Bi'n Gröönhöker krist ook riepe Arfen, Bonen un Linsen. Von elkeen ward 'n stampige Supp kookt, dor höört an fresch Grööntüüch Woddeln, Porree, Sellerie un Petersilienwoddel rin.
Ut Wittkool ward faaken Suurkool maakt. Ook Gurken un rode Beet wardt traditschonell in Suur leggt, man dat gifft ook fresche Smoorgurken mit Hack.
Salaatgurken höört to't niemoodsche Grööntüüch, so as Tomaaten, Paprika un so wieder. Öllere Rohkost sünd Koppsalaat un Feldsalaat.
Un denn gifft dat noch 'n ganz fein Grööntüüch, den Spargel. De kümmt tosamen mit Woddeln, Porree un Sellerie in de Hochtietssupp.
Swattwoddeln sünd sotoseggen de Spargel von'n Winter.
Un denn is dor noch de Spinaat. De ward traditschonell to Mus kookt un mit kookte Eier (un natürlich Kantüffeln) eten. Draffst awers nich warmhollen, ans smeckt he as inslapen Fööt.
