Fidiricu II di Hohenstaufen

Di Wikipedia, l'enciclopedìa lìbbira.

Fidiricu II di Hohenstaufen. Sutta lu sò regnu, Palermu divintò lu centru culturali e pulìtico di l'èpuca.

Fidiricu II di Hohenstaufen di Svevia (Fidiricu I di Sicilia), (Jesi, Ancona 26 di dicèmmiru dû 1194 - Castel Fiorentino pressu San Severo, Foggia 13 di dicèmmiru dû 1250), re di Sicilia dû 1198 ô 1250, re di Girmania, ô tronu dû Sacru Rumanu Mperu dû 1211 ô 1250.

Fidiricu era figghiu di Arricu VI, figghiu di Fidiricu Barbarussa, e di Custanza di Autavilla, figghia di Ruggeru II lu Nurmannu, e nascìu a Jesi, ntâ Marca Anconitana mentri chi sò matri era 'n viaggiu versu la Sicilia.

La nàscita di Custanza era mpurtanti pâ succissioni dû Regnu di Sicilia e pirtantu :quannu la mpiratrici Custanza era grossa di Fidiricu, s'avìa lu suspettu 'n Cicilia e pi tuttu lu riami di Pugghia, ca era grossa pirchì era grannuzza d'etati; pirciò quannu fu ura di parturiri fici mettiri na tenna granni nta la chiazza di lu paisi e fici un bannu dicennu ca qualunqui fìmmina vulissi assistiri a la nàscita di lu picciriddu era lìbbira di tràsiri nta la tenna; assai fìmmini cci jeru e vìttiru e accussì lu suspettu finìu. (G. Villani)

Lu sò mperu fu spissu 'n guerra cû Statu Pontificiu, e pirciò nun fa maravigghia chi vinissi scumunicatu pi dui voti. Lu papa Gregoriu IX arrivau a chiamàrilu l'Anticristu e chistu forsi causau doppu la sò morti la liggenna chi avìa a turnari doppu 1000 anni.

[cancia] Mpiraturi poliglotta

Tra lu 1197 e lu 1198 mureru Arricu VI e Custanza, lassannu òrfanu lu nicareddu Fidiricu chi havi quattr'anni e è sutta la tutela di Papa Nnucenzu III. Fidiricu fu pirciò reghi di Sicilia a l'etati di quattr'anni sutta la riggenza dû Papa, e lu jornu di lu sò quattordicèsimu cumpliannu (26 di dicèmmiru dû 1208) si autoprucramau maiurenni assumennu mmidiatamenti l'affittiva rispunzabbilitati dû regnu. Si maritau cu Custanza, figghia dû reghi Alfonsu d'Araguna.

Ottoni IV di Girmania avìa statu eliggiutu Mpiraturi di lu Sacru Rumanu Mperu nta lu 1209. Fidiricu avìa statu mmeci eliggiutu Mpiraturi di na fazzioni ribbelli sustinuta di Nnucenzu III nta lu 1211 a la Dieta di Nurimberga, ma chistu fu n'onuri vacanti nzinu a lu 27 di giugnettu dû 1214 quannu nta la battagghia di Bouvines Fulippu II Augustu Reghi di Francia, culligatu di Fidiricu, scunfissi Ottoni IV, culligatu dî Ngrisi. Di sta battagghia li stòrici dùnanu la data di l'unitati nazziunali francisa.

Si dici ca Fidiricu sapissi novi lingui (sicilianu, talianu, latinu, pruvinzali, àrabbu, grecu, francisi e dui formi di tudiscu). Fu un cuvirnanti assai mudernu pi li sò tèmpura favurennu la scienza e avennu punti di vista cchiuttostu avanzati nta l' econumìa. Funnau l'univirsitati di Nàpuli ntô 1224. Abbulìu li monòpuli di statu, li dazzî nterni e livau li freni a li mpurtazzioni nterni di lu sò mperu.

[cancia] Stupor Mundi

Fidiricu fu chiamatu ê sò tèmpura Stupor Mundi, (Maravigghia dû Munnu) e Puer Apuliae (lu Picciriddu di la Pugghia). La sò curiusitati ca nun finìa mai lu purtau a apprufunniri la filusufìa, l'astroluggìa, la matimàtica, l'algebbra, la midicina e li scienzi naturali; scrissi puru un libbru, un manuali di comu fari la caccia cu li farcuna (De arte venandi cum avibus, L'arti di la caccia c'aceddi ), e assai copî llustrati di lu XIII e di lu sèculu XIV di stu libbru asìstinu ancora; sutta st'aspettu signau na tappa funnamintali nta la storia di la scienza spirimintali muderna.

Cuntribbuìu a rinnuvari la littiratura taliana e nta stu senzu appi mpurtanza funnamintali la Scola Siciliana ca ncintilìu lu vulgari sìculu-pugghisi cu lu pruvinzali dî truvatura chi friquintàvanu la sò curti, e facennu la basa - appoi arriccuta di la parrata tuscana - ca purtau a la lingua di la Divina Cummedia. Amava la puisìa e puemi nni scrissi iddu stissu.

[cancia] Scumunicatu di Grigoriu IX

Nta lu 1227, lu 9 di sittèmmiru, prissatu di papa Gregorio IX, partìu pi la sesta Cruciata anchi siddu na tirrìbbuli pistilenza fa straggi di li sò cruciati. Naturarmenti è custrittu a rintrari e lu papa lu scumùnica arreri nta lu 29 di lu stissu misi.

Lu 28 di giugnu dû 1228 fa na nova partenza di Brìndisi pi la sesta Cruciata. Sta vota Fidiricu otteni successu c'un accordiu cu lu Sultanu al-Kamil e si ncruna Regghi di Gerusalemmi nna lu Tempiu di lu Santu Sipulcru lu 18 di marzu dû 1229

Stu successu senza armi e senza participazzioni di la Cresia, fu pigghiatu assai mali di lu papa Gregoriu IX. Di tutti sti fatti accuminzau dda lutta longa e forti tra Fidiricu e lu Papa (e lu sò succissuri Nnucenzu IV). Nta sta lutta si cci nfilaru prestu li citati di la Liga Lummarda di unni accuminzau la longa sciarra tra Guelfi (Liga Lummarda) e Ghibillini.

Fidiricu ntô passatu avìa già fattu tanti liggi: a Capua nta lu 1220, a Missina nta lu 1221, a Melfi nta lu 1224, a Sarausa nta lu 1227 e a San Germano nta lu 1229. Ntô 1231, duranti na cirimonia granni, pubbricau lu secunnu gruppu di liggi cu li sò dirittivi, d'accordiu c'un gruppu di juristi ntra li quali: Roffredo di Benevento, Pier delle Vigne, l'arcivìscuvu Giacomo di Capua e Andrea Bonello di Barletta. Stu corpu orgànicu di liggi chi fu pigghiatu a mudellu p'assai tempu e si fa vìdiri comu la funnazzioni di nu statu mudernu, pigghiau lu nomu di Custituzzioni di Melfi.

[cancia] Li sò casteddi nta l'Euru

Comu curiusitati ccà cc'è la mmàggini di la munita taliana di 1 euru cent ca riproduci lu cchiù famusu di li casteddi fidiriciani: Castel del Monte ntâ Pugghia

1 Euro cent talianu cu lu disignu di Castel del Monte

[cancia] Liami

Un situ web è fattu di l'Assuciazzioni fidirizziana: stupormundi.it ('n talianu e nta àutri lingui)

[cancia] Rifirimenti

• it:Federico II del Sacro Romano Impero
• Arba Sicula, Volumi XVI, Numira 1 & 2, Primavera & Autunnu, 1995.