Qurani
From Wikipedia
Qurani (au Korani) ni msahafu unaotumiwa na waumini wa Uislamu. Waislamu wanaamini kuwa yaliyomo ndani ya kitabu hicho ni ujumbe alioshushiwa mtume Muhammad na Mungu kupitia malaika Gabrieli. Wanavyoamini ujumbe huo ulimfikia Mtume Muhammad kwa ajili ya uwongofu wa mwanadamu kutokana na Allah (Mwenyezi Mungu). Kabla ya kuja ujumbe huu, Mwenyezi Mungu aliteremsha Wahyi kwa Mitume kadha wa kadha kama Nabii Musa (Taurati au Torati), Nabii Daudi (Zaburi), na Nabii Isa (au Yesu) (Injili) (rehema na amani ziwe juu yao).
Qurani kama maandishi yaliyotangulia kabla yake ya Taurati na Injili yaliteremshiwa Mitume wa Mwenyezi Mungu kupitia Malaika Jibrili ambaye ni mojawapo wa Malaika wake wakubwa. Katika muda wa miaka 23 Qurani ilikuwa ikiteremshwa kidogo kidogo kama Wahyi kwa Muhammad kwa mujibu wa munasaba mbali mbali katika maisha ya Waislamu wa wakati wake, ili kuwatoa katika giza na kuwatia katika mwangaza, na kuwa ni uwongofu wa watakaokuja katika Waislamu baada yao.
Kuanzia wakati Muhammad alipokuwa na miaka 40 mpaka alipofikia umri wa miaka 63, Jibrili alikuwa akitumwa kwake kumteremshia hii Qurani yenye ujumbe kutoka kwa Mola wake uliokusanya maamrisho na makatazo na maelekezo na simulizi mbali mbali za Umma zilizotangulia kwa ajili ya kuwaongoza Waislamu duniani, na kwa hivyo Qurani imeteremshwa katika muda wa miaka 23 mpaka alipofariki Mtume Muhammad dunia.
Kwa kuwa kila ufunuo au wahyi huteremshwa kwa Nabii fulani kwa lugha yake anayoitumia katika zama zake, kama vile Kiibria kwa Mtume Musa na Kiaramia kwa Mtume Isa, vile vile Qurani iliteremshwa kwa lugha ya Muhammad ambayo ilikuwa ni Kiarabu. Pamoja na hayo, leo kuna tafsiri nyingi sana ulimwenguni za Qurani kwa lugha mbali mbali ili Waislamu wa makabila na jinsi tofauti tofauti waweze kufahamu maana ya Qurani kwa lugha zao.
Qurani pamoja na Sunnah za Mtume Muhammad ndizo chanzo cha Sharia ya Kiislamu, na kutokana na maandishi haya, Waislamu wanajifunza kila aina ya Ibada (Sala, Saumu, Zaka na Hija), na kila aina ya Maingiliano (ya kijamii, kisiasa, kiuchumi na kadhalika). Tofauti kubwa baina ya maandishi haya ni kuwa Qurani ni maneno ya Mwenyezi Mungu kwa Waislamu au wanadamu kwa jumla, na Sunnah ni maneno na vitendo vya Mtume Muhammad katika uhai wake alipokuwa mjumbe wa Mwenyezi Mungu, na yote mengine aliyoyaona na kuyasikia yakifanywa na Masahaba zake akawa hakuyapinga au kuyatoa makosa na yanachukuliwa kuwa ni mambo aliyoyakubali kuendelewa kufanywa.
Leo Qurani baada ya miaka ya zaidi ya elfu na kitu ni yale yale maneno na maandishi yaliyoachwa na Mtume Muhammad kwa Waislamu, nayo husomwa na kuzungumzwa na kusomeshwa na kuhubiriwa na kufasiriwa na kufanyiwa uchunguzi mbali mbali na Waislamu na wasiokuwa Waislamu, na kila kukicha mambo mengi katika maisha na sayansi yanagunduliwa yakiwa yanakubaliana na yale yaliyokuwemo ndani ya hii Qurani.
