Turning Torso

vanuit Wikipedia, die vrye ensiklopedie.

Building Information
Turning Torso

Naam	Turning Torso
Ligging Dorp/Stad	Malmö
Ligging land	Swede
Argitek	Santiago Calatrava
Kliënt	Stad Malmö HSB
Konstruksie Begin Datum	2001
Voltooingsdatum	27 Augustus 2005

HSB Turning Torso is 'n wolkekrabber in Malmö, Swede aan die Sweedse kant van die Öresund-seestraat. Dit is deur Santiago Calatrava ontwerp en is amptelik op 27 Augustus 2005 geopen. Die toring bereik 'n hoogte van 190 meter (623 voet) met 54 verdiepings. Teen voltooing was dit die hoogste gebou in Skandinawië, en Europa se tweede hoogste woonstelblok, na die 264-meter-hoë Triumph-Palace in Moskou.

Die ontwerp is gegrond op 'n beeldhouwerk deur Santiago Calatrava genaamd Twisting Torso. Dit gebruik nege vyf-verdieping kubusse wat draai soos dit styg; die boonste segment is negentig grade gedraai ten opsigte van die grondverdieping. Elke verdieping bestaan basies uit 'n reghoekige gedeelte wat die sentrale kern omring, saam met 'n driehoekige gedeelte wat gedeeltelik deur 'n eksterne staalstellasie ondersteun word. Die onderste twee kubusse is bedoel om as kantoorruimte te dien. Kubusse drie tot nege huisves 149 luukse woonstelle.

Die Twisting Torso is 'n wit marmerbeeld gegrond op die vorm van 'n draaiende menslike liggaam. Johnny Örbäck, voormalige hoof uitvoerende beampte van die Turning Torso kontrakteur en raadsvoorsitter van die Malmö-tak van die koöperatiewe behuisingsvereniging HSB, het die beeld in 1999 gesien en met Calatrava in verbinding getree om hom te versoek om 'n gebou wat dieselfde konsep gebruik te ontwerp. Konstruksie het in die noordelike somer van 2001 begin.

Een van die redes vir die bou van die Turning Torso was om 'n herkenbare stadshorison vir Malmö te hervestig na die verwydering van die Kockumskranen ("Die Kockum Hyskraan") in 2002, wat minder as 'n kilometer van Turning Torso geleë was. Plaaslike politici het dit as belangrik beskou vir inwoners om 'n simbool vir Malmö te hê wat Kockumskranen kon vervang. Kockumskranen was 'n groot hyskraan wat vir skeepsbou gebruik is en tot 'n mate die stad se blouboordjiewortels verteenwoordig het. Turning Torso kan gesien word as 'n monument van 'n nuwe, meer internasionale Malmö.

[wysig] Erkenning

Turning Torso het die 2005 Emporis Wolkekrabber Toekenning met die grootste punteverskil in die toekenning se geskiedenis gewen en die Q1 Toring in Gold Coast Stad, Australië en Montevideo in Rotterdam, Nederland verslaan.

Die struktuur het ook die 2005 MIPIM toekenning in Cannes, Frankryk vir die beste internasionale residensiële gebou gewen. Ander gebou wat deelgeneem het sluit in 1 West India Quay in London, VK, en Espirito Santo Plaza in Miami, VSA.

Die konstruksie van Turning Torso is in 'n episode van die Discovery Channel se reeks Extreme Engineering gedek.