Aghe
De Vichipedie, la enciclopedie libare dute in marilenghe.
La aghe e cjape tantis formis in nature. La cognossin, cemût che o sin usâts a viodile, come un licuit naturâl cence colôr, cence savôr e cence odôr che al covente pe vite su la tiere. Al sô stât solit si clame glace, al sô stât aeriforme si clame vapôr di aghe.
La aghe, diferentementri de gran part di altris sostancis, pes cualis la forme solide a je plui penze di chê licuide, la glace a je mancul penze de aghe licuide. La densitât de aghe e je massime a 4 °C. Chest fat al ven parcè che il volum de aghe al aumente cul sbassâsi de temperadure, cun che che e cale la densitât. La aghe no si po sostituîle inte gran part da lis sôs utilizazions e no conven puartâle a une distance plui di cualchi centenâr di chilometris. Par colpe de incressite de popolazion mondiâl la disponibilitât di aghe potabil par persone a je daûr a calâ, il probleme des risiervis al po jessi risolt cuntune plui buine distribuzion e cul strassâ di mancul. Par chest la aghe a je une risorse di impuartance strategjiche in gran part dal mont. Inte filosofie antighe, cun fûc, tiere e aiar, al è un dai cuatri elements che a componin l'univiers. Lis religjons a sintin la aghe come un element di purificazion: esemplis a puedin jessi il batisim cristian e i bagns rituâi dai ebreus e intal Islam.
