Boarische Dialekte im Vagleich
Aus Wikipedia
 |
Der Àrtikl is im Dialekt „westlichs Nordboarisch“ gschriem worn. | |
Inhaltsverzeichnis |
[dro werkln] Einleitung und Grundloong
[dro werkln] Wej da Vagleich àfbaut is
Wemma de boarischn Dialekte mitanånd und mit da hòuchdaitschn Standardspròuch vagleicha mecht, nòu mouma ins Mittlòlter zruckgej zum Mitthòuchdaitschn (und tàlweis bis zum Òlthòuchdaitschn) òls Àsgångspunkt. In da Tabölln untn stèjt òlso d Spòltn Mittelhòuchdaitsch spròuchgschichtle gseha im Mittlpunkt. De åndern Spòltn zoing, wej se d Laute in de vejer boarischn Dialekt-Hàptgruppm (wejs àà in da boarischn Wikipedia unterschiedn wern) und im Standarddaitschn entwicklt hom. De Lautgruppm, wejs nòuaranånd in da Tabölln stenga:
- mittlhòuchdaitsche oafåche Kurzvokale (fir jede Lautentwicklung vo oam Vokal oa Zeiln)
- mittlhòuchdaitsche oafåche Långvokale
- mittlhòuchdaitsche Zwielaute
- sunstiche Laute und Lautgruppm
D Wortbeispül hàn asu gwöhlt, dàßs d Gsetzmàssichkeitn bå de Lautentwicklunga àfzoing. Dej göltn fir de meistn Werter, ower fràle niat fir òlle, wàl àà es Mittlhòuchdaitsche durtmòls koa einheitliche Spròuch wòr (ner a "normalisierts Konstrukt" wej d Spròuchwissnschåftler soong), und wàl se Spròuchn und Dialekte und d Entwicklunga dòu iwer d Jòhrhunderte niat immer in oafåche Regln fåssn lèjn. Weiters gèjts niat um oanzlne Dialekte, sundern ner um d Hàptgruppm und um Untergruppm, wòu Bsunderheitn hàn.
[dro werkln] D Schreibung
D Bouchstoom und Sunderzeichn in de Dialektspòltn orientiern se ån de Regln, wejs im Artikl Wikipedia: Boarische Umschrift festghòltn hàn. In de Laut- und de Beispül-Spòltn is òllas asu gschriem, wejs gsprocha wird (phonetisch), und de långa Vokale wern dopplt gschriem, damit ma d Lenga guat siaht. Um persenliche Schreibweisn und Feinheitn bå Ortsdialekte gèjts niat (in Geechasoz zu de Artiklbeitreech). Standarddaitsch und Mittlhòuchdaitsch hàn in da Standardschreibweis gschriem.
[dro werkln] Wej es Boarische vo de Spròuchwissnschåftler eigordnat wird
Wichte is, dàß es Wort "Hòuchdaitsch" in da Spròuchwissnschåft ånderscht ågwendt wird òls wej efters in da Umgångsspròuch und in de Dialekte, wòu "Hòuchdaitsch" fir de daitsche Standardhòuchspròuch stèjt, òls Gechasoz zu de Dialekte. Su iss dòuda ower niat gmoant, sundern spròuchwissnschåftle. Grob eitàlt, und ner firs Boarische in d Tejfm gånga:
- Daitsch
- Niederdaitsch
- Hòuchdaitsch: Da gròuße Unterschied zu de niederdaitschn Dialekte is, dàß de hòuchdaitschn de zwoate Lautvaschejbung mitgmåcht hom
- Mittldaitsch
- Owerdaitsch
- Alemannisch und Schwäbisch
- Ostfränkisch und Sidfränkisch
- Boarisch
[dro werkln] De zeitliche Eintàlung
- Åid-Boarisch (750 - 1050)
- boarischs Mitlhochdaidsch (1050 - 1350)
- frianaizaitlichs Boarisch (grét), owadaidsche Litaratuaschbråch (gschrim) (1350 - 1650)
Es Boarische is schriftle schòu in òlthòuchdaitscher Zeit belegt, seitn spèjtn 8. Jòhrhundert, òls Òltboarisch.
[dro werkln] Spròuchliche Entwicklunga
Dej kåmma nòuchad òlle in da Iwersichtstabölln studiern, ejtz wird erscht amòl bschriem, wos hinter deane steckt.
[dro werkln] De Boarische Oasülberdehnung
Dòu gèjts um Werter, dej wòu urspringle an kurzn Vokal ghått hom. In da Standardspròuch is dej Dehnung ner tàlweis vawirklicht worn. Fir an Tàl vo de boarischn Dialekte (bsunders in Altbayern, Oberösterreich, Niederösterreich, Salzburg) hòut bå oasülbiche Werter d Oasülberdehnung (standarddaitsch: Einsilberdehnung) bå òlle Werter mit an Vokal + an Fortiskonsonant oder a Konsonantngruppm gwirkt. Òlle Werter in da Tabölln, wòu de boarische Oasülberdehnung gwirkt hòut, hàn mit an hòuchgstölltn Oanser "¹" kennzeichnat.
[dro werkln] D Entrundung
In vül boarische Dialekte hàn de mittlhòuchdaitschn Vokale "ö", "œ", "ü", "iu" (= långs "ü"), "öü", "üe" zu "è"/"èj"/"èă", "i", "ai", "iă"/"ej" entrundet worn. Dej Erscheinunga findma àà in åndere Dialektgruppm in Bayern, Süddeutschland, Österreich (ower niat in Vorarlberg) und im ostmittldaitschn Raum. Ågfånga hòut d Entrundung im 13. Jòhrhundert im boarischn und im alemannischn Raum, nòu hòutsa se inn rheinischn Westn im 15. Jòhrhundert und inn mittldaitschn Ostn im 16. Jòhrhundert àsbroitt. D Werter mit Entrundung hàn mit an hòuchgstölltn Zwoarer "²" kennzeichnat.
A åndere Erscheinung hòut in nordboarische, wàldlerische und ostmittlboarische Dialekte zu enliche Laute wej de grundetn Vokale "ö" und "ü" gfejert, nemle d Vaschmölzung von aran gånz oder hòlwat vokalisiertn "l" mit "e" und "i". Des derf ower niat mit ara unterblima Entrundung in deane Dialekte vawechslt wern.
[dro werkln] D Zwielaute
In de boarischn Dialekte findma mèjer Zwielaute wej in da Standardspròuch. In da mittlhòuchdaitschn Zeit hòuts d Zwielaute "ie", "uo" und "üe" geem. Dej hom se in da Standardspròuch und oft in de mittldaitschn Dialekte zu de oafåchn Laute "i", "u" und "ü" entwickelt, in da Fåchspròuch: Dej hàn monophthongiert worn. In de boarischn Dialekte (wej in de schwäbischn, de alemannischn und tàlweis in de ostfränkischn) hàn dej Zwielaute bliem: "iă", "uă", "iă/üă". Ner in de nordboarischn Dialekte hàns zerscht Oalaute worn, ower nòucha wieder Zwielaute, ower åndere: "ej", "ou", "ej". Dej hoißn immer nu "gestürzte" Zwielaute, wàlma frejers gmoant ghått hòut, dàß dej oafåch umdràht worn wàrn.
Wenn às Oalaute Zwoalaute wern, nòu hoißt des in da Fåchspròuch Diphthongierung. Des is in da Standardspròuch und in de boarischn Dialekte pàssiert, ower bå deane efters. In de meistn boarischn Dialekte hàn de mittlhòuchdaitschn Långvokale "ī", "ū", "iu" zu "ai", "au", "ai/ui" worn (in de hoch- und hèjchst-alemannischn Dialekte hàns ower Oalaute bliem). In de nordboarischn Dialekte hàn fåst òlle mitthòuchdaitschn Långvokale zu Zwielaute worn (wej in an Tàl vo de ostfränkischn Dialekte), und sugòr tàlweis Kurzvokale. Àà vül sidboarische Dialekte hom a ehnliche Entwicklung mitgmåcht, ower oft mit an åndern Lautergebnis. D Werter mit dera Vazwielautung hàn mit an hòuchgstölltn Dreier "³" kennzeichnat. De mittboarischn Dialekte hom vo dòu her wenger Zwielaute, ower wecha eanerer "l"- und "r"-Vokalisierung wieder åndere.
[dro werkln] D Entwicklung vom "l"
In de meistn mittlboarischn Dialekte und in an Tàl vo de nord- und sidboarischn Dialekte in da Nèjchtn vo de mittlboarischn (d "l"-Vokalisierung broitt se às) is es "l" hinter Vokale und vor Konsonantn oder im Àslaut zu "i" vokalisiert worn, wobei da Vokal àà efters mit vaendert worn is. In de nordboarischn Dialekte is es "l" oft zu an "ü"-hòltinga Hòlbvokal worn, wejma in da Spròuchwissnschåft sågt, und àà dånn is da Vokal efters mit vaendert worn. In de meistn sidboarischn Dialekte is es "l" òls Konsonant erhòltn bliem, und àà d Vokale hàn desweeng niat vaendert worn.
[dro werkln] D Entwicklung vom "r"
Wejs in Altbayern is: Hinter Vokale und vor Konsonantn oder im Àslaut wird es "r" haintzadooch in de meistn Dialekte zu "ă" vokalisiert. A konsequente "r"-Vokalisierung hòuts vor 70 Jòuer ner in de Dialekte im estlinga Altbayern (wej weiter im Ostn in Esterreich) geem, seitdem iss nòuch Westn gwåndert. Im Sidwestn, wòu d Dialekte sidboarische Eingheitn hom, is es "r" urspringle niat vokalisiert worn. Weiter im Nordn ohne an sidboarischn Einfluss, ner tàlweis.
[dro werkln] Wenn Konsonantn gschwecht wern oder wegfòlln
Wenn d Konsonanten "p", "t", "k" schwecher àssprocha wern und se desweng mèjer wej "b", "d", "g" åhèjern, sprecha d Fåchlait vo Konsonantnschwechung. Des gits bå owerdaitsche und mittldaitsche Dialekte. Wejs in de boarischn Dialekte is: Bsunders in de nordboarischn und in de mittelboarischn Dialekte wern d Konsonantn "p", "t" und "k" (ner vor Konsonantn) schwecher àsgsprocha, im Ånlaut meistns, ansunstn kommts bsunders in de mittlboarischn Dialekte àfn Sülbmtyp åå: entweder Långvokal + schwåcher Konsonant oder Kurzvokal + stòrker Konsonant. "b", "d", "g" und "p", "t", "k" hom se àà nu weiter åglicha, wàls òlle stimmlòus und unbehaucht àssprocha wern.
Weiters wern im Inlaut "b" und "p" hinter långe und dopplte Vokale zum (hòlwatn) Reibelaut "w" àfgwoicht. In vül nordboarische Dialekte wird àà nu es "g" hinter långe und dopplte Vokale im Inlaut vor Vokale und im Àslaut zu "ch" àfgwoicht. Spirantisierung hoißtma des in da Fåchspròuch.
Wegfòlln dejn "ch" im Àslaut und "d" und "t" vor "n" efters. Es "n" fòllt hinter Vokale im Àslaut efters weg, da Vokal wird nòu nasaliert. Hengt se a Vokal hinters "n", nòu erscheints wieder und da Vokal valejst sei nasale Àsspròuch.
De sidboarischn Dialekte hom d Konsonantnschwechung niat mitgmåcht, es "b" wird sugòr efters òls "p" gsprocha, und es "k" is in da Regl affriziert "kch", des hoißt: a Vaschlusslaut + a Reibelaut.
[dro werkln] Iwersichtstabölln
D Merkmòle vo Iwergångs- und Mischdialekte (Nordmittlboarisch, Sidmittlboarisch und åndere) hàn in zwoa (oder ejamòl àà in drei) Spòltn zun Finna. Beispülsweis in Pongaurischn òls sidmittlboarischer Dialekt "èi" und "ii" fir "el" und "il" hom wej in Sidboarischn unvaenderte Vokale ower schou a mittlboarische l-Vokalisierung.
[dro werkln] Vokale
| Standarddaitsch | Mittlhòuchdaitsch | Westmittlboarisch | Ostmittlboarisch | Nordboarisch | Sidboarisch | ||||||
|---|---|---|---|---|---|---|---|---|---|---|---|
| Beispül | Laut | Beispül | Laut | Beispül | Laut | Beispül | Laut | Beispül | Laut | Beispül | Laut |
| Wasser | a | wazzer | a | Wåssă (W), Wòssă (O) |
å, ò |
Wòssă, Wåssă | ò, å | Wåssă (W), Wòssă (O) |
å, ò |
Wòssăr | ò |
| Platz | a | plaz | a | Blòòz¹, Blååz¹ (W) Blòòz¹, Blooz¹ (O) |
åå, òò, oo | Blòòz¹, Blååz¹ | òò, åå | Blooz¹, Blòòz¹ | oo, òò | Plòtz | ò |
| Plätze | ä | Blàtz, Bletz | à, e | Blàtz, Bletz | à, e | ||||||
| Wagen (Einzahl) | aa | wagen | a | Wòòng, Wåång (W) Wòòng, Woong (O) |
åå, òò, oo | Wòòng, Wåång | òò, åå | Woong, Wòòng | oo, òò | Wòòng, Woong | òò, oo |
| Wägen / Wagen (Mehrzahl) | ää / aa | wägen | ä | Wààng, Weeng | àà, ee | Weeng | ee | Wààng, Weeng | àà, ee | Wòòng, Woong | òò, oo |
| Bett | e | bette | e | Bett | e | Bett | e | Bett | e | Bètt | è |
| Esel | ee | esel | e | Eesl | ee | Eesl | ee | Eesl, Iisl (W/NW), Iăsl³ (NO) |
ee, ii, iă |
Eesl, Ejsl | ee, ej |
| essen | e | ëzzen | ë | essn, èssn | e, è | essn | e | èssn, essn | è, e | èssn | è |
| Dreck | e | drëc | ë | Dreeg¹, Drèèg¹ | ee, èè | Dreeg¹ | ee | Dreeg¹ | ee | Drèkch | è |
| Feder | ee | vëder | ë | Feedă, Fèèdă | ee, èè | Feedă | ee | Feedă | ee | Fèèdăr, Feedăr, Fejdăr | èè, ee, ej |
| bitten | i | bitten | i | bittn | i | bittn | i | bittn | i | bittn | i |
| Fisch | i | visch | i | Fiisch¹ | ii | Fiisch¹ | ii | Fiisch¹ | ii | Fisch¹ | i |
| nieder | ii | nider | i | niidă, niădă³ | ii, iă | niidă, niădă³ | ii, iă | niidă | ii | niidăr | ii |
| Glocke | o | glocke | o | Glockn | o | Glockn | o | Glockn | o | Glokchn | o |
| Frosch | o | vrosch | o | Froosch¹ | oo | Froosch¹ | oo | Froosch¹, Fruusch¹ (W/NW), Fruăsch³ (NO) |
oo, uu, uă |
Frosch | o |
| Vogel | oo | vogel | o | Voogl | oo | Voogl | oo | Voogl, Vuugl (W/NW), Vuăgl³ (NO) |
oo, uu, uă |
Voogl, Vougl | oo, ou |
| Frösche | ö | vrösche | ö | Fresch² | e | Fresch² | e | Fresch² | e | Fresch² | e |
| Vögel | öö | vögel | ö | Veegl² | ee | Veegl² | ee, öö | Veegl², Viigl² (W/NW), Viăgl²³ (NO) |
ee, ii, iă |
Veegl², Vejgl | ee, ej |
| dumm | u | tumb | u | dumm | u | dumm | u | dumm | u | dumm | u |
| Guss | u | guz | u | Guus¹ | uu | Guus¹ | uu | Guus¹ | uu | Guss | u |
| Schlüssel | ü | slüzzel | ü | Schlissl² | i | Schlissl² | i | Schlissl² | i | Schlissl² | i |
| Flügel | üü | vlügel | ü | Fliigl² | ii | Fliigl² | ii, üü | Fliigl² | ii | Fliigl², Fliăgl²³ | ii, iă |
| Brücke | ü | brücke, brucke | ü, u | Bruck | u | Bruckn | u | Bruck | u | Brukchn | u |
| Schaf | aa | schâf | aa | Schòòf, Schååf | òò, åå | Schòòf, Schååf | òò, åå | Schòuf³ | òu | Schòòf, Schoof | òò, oo |
| Käse | ää | kæse | ää | Kààs | àà | Kààs | àà | Kààs | àà | Kchààs | àà |
| Schnee | ee | snê | ee | Schnèè | èè | Schnèè | ää | Schnèj³ | èj | Schnèă³ | èă |
| Eis | ai | îs | ii | Àis, Ääs, Äis (wàld.) |
ài ää, äi |
Äes | äe | Àis | ài | Àis | ài |
| rot | oo | rôt | oo | roud³, rood | ou | rood, ròòd | oo, òò | ròud³ | òu | ròăt³ | òă |
| böse | öö | bœse | öö | bèès² | èè | bèès² | èè | bèjs²³ | èj | bèăs²³ | èă |
| Haus | au | hûs | uu | Hàus, Haas, Håås (wàld.) |
au, aa, åå |
Håus | åu | Hàus | àu | Haus | au |
| Häuser | oi | hiuser | üü | Hàisă², Hääsă² (wàld.) |
ài, ää |
Häesă² | äe | Hàisă² | ài | Hàisăr² | ài |
| Feuer | oi | viur | üü | Fàiă², Fääă², Fäiă² (wàld.) |
ài, ää, äi |
Fäeă² | äe | Fàiă² | ài | Fuiăr, Foiăr Fàiăr² (O) |
ui, oi ài |
| Baum | au | boum | ou | Bààm | àà | Bààm | àà | Bààm | àà | Bààm | àà |
| Bäume | äu | böüme | öü | Bààm², Bàim² | àà, ài | Bààm | àà | Bàim², Bààm² | ài, àà | Bààm | àà |
| breit | ai | breit | ej | broăd | oa | broăd, braad (NO) |
oă, aa |
broăd, brååd (N) |
oă, åå |
broăt | oă |
| Leiter | ai | leiter | ej | Loătă | oa | Loătă, Laată (NO) |
oă, aa |
Loităn | oi | Loătăr | oă |
| fliegen | ii | vliegen | ii | fliăng, fluing, floing (wàld.) |
iă, ui, oi |
fliăng, floing, fluing (N/O) |
iă, oi, ui |
flejng | ej | fliăng | iă |
| Kuh | uu | kuo | uo | Kuă | uă | Kuă, Kui (O) |
uă, ui |
Kou | ou | Kchuă | uă |
| Kühe | üü | küe | üe | Kiă² | iă | Kiă | iă | Kej² | ej | Kchiă² | iă |
[dro werkln] Konsonantn und Ånders
| Standarddaitsch | Erklerunga | Westmittlboarisch | Ostmittlboarisch | Nordboarisch | Sidboarisch | ||||||
|---|---|---|---|---|---|---|---|---|---|---|---|
| Beispül | Laut | Beispül | Laut | Beispül | Laut | Beispül | Laut | Beispül | Laut | ||
| Mann | an | Nasalierung und Àsfòll vo "n" |
Moo, Môô | oo, ôô | Mãã | ãã | Mãã (W), Môô (S, O), Môă³ (N) |
ãã, ôô, ôă |
Mòn | òn | |
| Stein | ain | Schdoă | oă | Schdoă, Schdàà (NO) |
oă, aa |
Schdoă, Schdoi, Schdåå (N) |
oă, oi, åå |
Stoăn | oăn | ||
| Hals | al | "l"-Vokalisierung und d Vokalvaenderunga durch dej |
Hòis | òi | Hòis | òi | Hòls | òl | Hòls | òl | |
| Geld | el | Gejd, Gèjd, Gòid Gööd (wàld.) |
ej, èj, òi öö |
Gööd | öö | Göld | öl | Gèld, Gald | èl, al | ||
| wild | il | wuid (W) wejd, wèjd (O) wüüd (wàld.) |
ui ej, èj üü |
wüüd | üü | wüld | ül | wilt | il | ||
| Holz | ol | Hoiz | oi | Hoiz | oi | Hulz Holz (S/SO) |
ul ol |
Holz, Hulz | ol, ul | ||
| Schnabel, scheppern | -b-, -p- | Konsonantnschwechung Konsonantnàsfòll Spirantisierung |
Schnòòwĕ, scheewăn | -b-, -w- | Schnòòwü, schèèwăn | -w- | Schnoowl, scheewăn | -w- | Schnoobl, schebban | -b- | |
| Weg, mager | -g | Weeg, mòògă | -g | Weeg, mòògă | -g | Weech, moochă | -ch | Weeg, moogăr | -g | ||
| ich, noch | -ch | i, nu / no | ---- | i, nu | ---- | i, nu | ---- | i, no | ---- | ||
| reden, Schlitten | -d-, -t- | reen, Schliin | ---- | reen, Schliin | ---- | reen, Schliin | ---- | reen, Schlittn | -d- | ||
| Pech, Platz, Pratze | p- | Beech, Blòòz, Bråtzn | b- | Beech, Blòòz, Bròtzn | b- | Beech, Blooz, Bråtzn | b- | Pech, Plòtz, Pròtzn | p- | ||
| Tag, Traum | t- | Dòòg, Drààm | d-, dr- | Dòòg, Drààm | d-, dr- | Dooch, Drààm | d- | Toog, Traam | t-, tr- | ||
| Kanne | k- | Kånnă | k- | Kãnn | k- | Kånnă | k- | Kchònn | kch- | ||
| gehören | geh- | keăn | k- | keăn | k- | kèjăn | k- | keăn | k- | ||
| Kluppe, Krampf, Knie | kl-, kr-, kn- | Gluppăl, Gråmpf, Gniă Kluppăl, Kråmpf, Kniă (S/SW) |
g- k- |
Glubbm, Grãmpf, Kniă | gl-, gr-, kn- | Glubbăl, Gråmpf, Gnej | g- | Kchlubbăle, Kchròmpf, Kchniă | kch- | ||
| Acker, dreckig | -ck- | Åggă, dreggăd Åkkă(r), drekkăd (S/SW) |
-gg- -kk- |
Òkkă, drekkăd | -kk- | Åggă, dreggăd | -gg- | Òkchăr, drekchăd | -kch- | ||
| erst, Ferse, Kasper | s | Entwicklung vo "rs", "sp", "st" |
eăscht, Feăschn / Feăsn, Kàschbăl | sch, s | eăscht, Feăschn, Kàschbăl | sch | eăscht, Feăschn, Kàschbăl | sch | erscht, Ferschn, Kchàschbăle | sch | |
| fest, du sagst | st | fest, du sågst, fescht, du sågsch(t) (W/SW) |
scht, sch(t) | fest, du sògst | st | fest, du sågst | st | fescht, du sòggsch | scht, sch | ||
| leben, reden, legen | -en | Infinitiv-Endunga | leem, reen, leeng | -m, -n, -ng | leem, reen, leeng | -m, -n, -ng | leem, reen, leeng | -m, -n, -ng | leem, reen, leeng | -m, -n, -ng | |
| kommen, kennen, singen | -en | kemmă / kummă, kennă, singă | -a | kummă / kemmă, kennă, singă | -ă | kummă, kennă, singă | -ă | kchemmen, kchennen, singen | -en | ||
| schauen, schneien, bauen | -en | schaung, schnaim, baun | -ng, -m, -n | schãun, schnâim, bãun | -n, -m, -n | schauă, schnaiă, bauă | -ă | schaung, schnaibn, baun | -ng, -bn, -n | ||
| hoffen, stechen, hocken | -fen, -chen, -ken | hoffă, stechă, hoggă | -fă, -chă, -gă | hoffm, stechn, hoggn (tòlweis + wien.) hoffă, stechă, hoggă (tòlweis) |
-fm, -chn, -gn -fă, -chă, -gă |
hoffm, stechn, hoggn (N) hoffă, stechă, hoggă (S) |
-fm, -chn, -gn -fă, -chă, -gă |
hoffm, stechn, hokchn | -fm, -chn, -kchn | ||
| Acker | -er | "r"-Vokalisierung Endsülm "-er" |
Åggă, Åkkă, Åkkăr (S/SW) |
-ă -ă, -ăr |
Òkkă | -ă | Åggă | -ă | Òkchăr, Òkchr, Òkchò, Òkcha | -ăr, -r, -ò, -a | |
| mehr Jahr Bier Schnur |
"r"-Vokalisierung Zwie-, Dreilaute |
meeă Jåår / Jòòă Biiă Schnuuă |
meeă Jòòă Biiă Schnuuă |
mèjă³ / mèèă Jòuă³ / Jòòă Bejă³ / Biiă Schnouă³ / Schnuuă 1. (W/N) / 2. (S/SO) |
mer Joor Bir Schnur |
||||||
| fahren schwarz Dorf Wort |
"r"-Vokalisierung | fåån / fåårn / fòòăn schwååz / schwårz / schwòăz Doăf / Dorf Woăt / Wort |
fòòăn schwòăz Doăf / Duăf Woăt / Wuăt |
fòòăn schwòăz Doăf / Dorf Woăt / Wort |
foorn schwòrz / -rschz / -schz / -chz Dorf Wort / -rscht / -scht / -cht |
||||||
| -lein / -chen (Einzahl) -lein / -chen (Mehrzahl) |
Vakleanerungs-Nòuchsülm | -l / -ăl / -ai / -ei / -i / -ĕ -ln / -ăln / -ai / -ei / -i / -ĕ |
-l / -ăl -ln / -ăln |
-l / -ăl -lă / -ălă |
-ăle -ălen |
||||||
| an- ab- ein- hinein- hinunter- |
Vorsülm | ôô- òò- âi- âinĕ- òwĕ- |
ãã- òò- âi- âinĕ- òwĕ- |
ãã- (W) / ôô- (S, O) / ôă- (N) oo- / òò- ââ- / âi- âi- / âinĕ- / âichĕ- oi- / oichĕ- / oinĕ- |
|||||||
D Kirzl:
(N)/(S)/(O)/(W) = in am Tàl vom Spròuchgebiet, Hümmlsrichtunga innerhòlb vom Dialekthàptgruppm-Spròuchgebiet
(wàld.) = wàldlerisch, des is (Nord-)Mittlboarisch im Boarischn/Owerpfölzer/Bèjhmerwòld
[dro werkln] Quölln, Literatur und Weblinks
- Ludwig Zehetner: Das bairische Dialektbuch, Verlag C.H.Beck, München, 1985, ISBN 3406305628
- Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/München/Regensburg, 2005, ISBN 3980702871
- Manfred Renn, Werner König: Kleiner Bayerischer Sprachatlas, Deutscher Taschenbuch Verlag, München, 2006, ISBN 3423033282
- Friedrich Kluge, bearb. v. Elmar Seebold: Etymologisches Wörterbuch der deutschen Sprache/Kluge, Walter de Gruyter, Berlin/New York, 2002, 24. Auflage, ISBN 3110174731
- Förderverein Bairische Sprache und Dialekte e.V. (Boarische Dialekte in Òltbayern)
