Pongaurisch

Aus Wikipedia

Der Àrtikl is im Dialekt „Stådt-Såizburgarisch“ gschriem worn.

Boarisch (Pongaurisch)
Vabreitungsgebiet	Östareich (Bundeslãnd Såizburg)
Sprecha	za. 60.000
Linguistische Klassifikazion	Indogermanisch Germanisch West-Germanisch Hochdaitsch Owadaitsch Boarisch Südmittlboarisch Pongaurisch
Offiziella Stàtus
Ãmtsspråch in	-
Språchcodes
ISO 639-1:	-
ISO 639-2:	(B) gem	(T) -
SIL ISO 639-3:	BAR

Pongaurisch wird da Dialekt gnãnnt, den ma im Såizburga Lãnd (Östareich), im Bezirk St. Johànn im Pongau (oda kurz Pongau gnãnnt) rédt. 's Pongaurische is a Üwagãngsdialekt zwischn Mittl- und Südboarisch und håd sowoih südboarische åis à mittlboarische Elemente. Südboărisch wàrad zum Beispüi dé Lautvaschiabung vô "ck" zu "ckch" oda an stårk betontn "ch"-Laut (wia im Tirolarischn). 's håd à auffällige Nasàllaute, dé nur in der Gegnd vôm tirola Untalãnd, Pinz- und Pongau vurkemman. Weitas fåid à dé Vaniedlichungsform mit 'ai' auf, wia z. Bsp. Katzai, a bissai, a Schweindai, a Nudai/Nidai usw.

Inhaltsverzeichnis

1 Haitige Situazion
- 1.1 Dialektändarungen
2 Untateilung
3 Beispiele
- 3.1 Beispüiwörta
- 3.2 Beispüisätz
4 Schau à unta

[dro werkln] Haitige Situazion

Ma kã sång, dass da Dialekt im Begriff is, sé z'wãndln, und durchn stårkn Zuzug vô Leid aus ãndane Regionen vô Östareich imma mehr vôm Donauboarischn beeîflusst wird, speziell vôm Dialekt aus da Stådt Såizburg. Am stärkstn foid dés im Eîzugsgebiet vô dé zwà Klâstädte St. Johànn und Bischofshofn, sowia dé zwà berümtn Kurorte Båd Hofgàstein und Båd Gàstein auf, wo dé Kinda schô merklich ãndas redn wia zum Beispüi no dé Öitan. Vô Genarazion zu Genarazion wird da Dialekt imma üwaregionàla. Dé öitane Genarazion vawendt no Ausdrügg, dé dé jüngane zwår im Großn und Gãnzn vasteht, zum Großteil åwa nimma benützt. Weitas bemerkt ma à dé daitliche Åbschwächung vom "ckch" zu "ck" oda sogår "gg", sowiam "chch" zu "ch", Wegfåi vô diversn Nasal-Diftongen und Nasàllautn, sowia dé Vawendung da Vaniedlichungsform mid "al", zB Kàtzal, a bissal, a Schweindal, a Nudal. A weitas Fänomen is à, dass dé Leid, dé auf an Bauanhof aufgwåggsn san, no daitlich mehr Pongaurisch redn wia dé Leid vô Årbeitafamilien.

In dé klànen Gmoana is da Dialekt nåch wia vor guad erhåidn. Am bestn håd a sé in de Seitntäla wia zum Beispüi im Grossårlatåi oda Klâårlatåi erhåidn. St. Johànna und Bischofshofna håbm midunta schô Schwierigkeitn, dé Sprecha vô dé Täla z'vastêh - wãnn dé speziell pongaurische Ausdrügg vawendn.

[dro werkln] Dialektändarungen

Da urtümliche Dialekt vôm Pongaurischn kennt wia 's Owaboarische kân Buachståm „ü“ und „ö“; zum Beispüi wird d' hochdaitsche Laut „el“ im gstãndnen Pongaurisch néd zu Ostmittlboarisch „öi“, sondan wia in Owabayan zu „èi“. z. Bsp.:

„Gèid“ oda à „Gèit“ ãnstått „Göid“
„schnèi“ ãstått „schnöi“
„hèifm“ ãstått „höifm“

Da hochdaitsche Endsüim „-iel“ wird néd zu Ostmittlboarisch „üi“ sondan wia im benåchbårtn Pinzgau sowia 'm Berchtsgåna Lãnd zu „-ii“. Wia z. Bsp.:

„vii“ ãnstått „vüi“
„Hiife“ ãnstått „Hüife“
spiin ãnstått „spüin“

's „ö“ wird wia in Owabayan zu „e“ oda „è“. z. Bsp.:

„Èstareich“ ãnstått „Östareich“
„éfta“ ãnstått „öfta“

Bei da jüngan Genarazion san dé Fromen åwa kaum no ãztreffm. Im Großåraltåi, wo da Dialekt no recht urtümlich is, san dé Wariàntn à am Rüggzug.

[dro werkln] Untateilung

's Såizburga Lãnd mid 'm Pongau und seine Dialekte

A Sprecha vô an ãndan boarischn Dialekt kã néd ausmåchn vô wo da im Pongaua Dialekt Rédnde her is. Leid dé 'n Dialekt beherrschn, kennan genaua untascheidn vô wöicham Ort dé éntsprechnde Person herkummt, weil sé da Dialekt bereits vô Ort zu Ort leicht untascheidt. Zum Beispüi a Grossårla kã mid Sichaheit sång, ob wer aus St. Johànn kummt oda néd, weil dé Leid no an bsundas urtümlichn Dialekt redn. Grossårla sprechns "ck" bzw. is "ch" sehr hårt (wia im Tirolarischn) aus. Nasàllaute wia z. Bsp. im Wort "Gmoã" wern mehr nasàliarta ausgsprochn wia dés in St. Johànn oda Bischofshofn da Fåi is (då tendiarts mehr zum "a" hî), weils Pongaurische in dé zwà Orte bereits mehr vôm Donauboarischn durchn stårkn Zuazug vô Leid aus ãndare Regionen vô Östareich beeîflusst worn is. Schwårzåch khert à mehr zum modaràtan Dialektgebiet vôm Pongaurischn, während ma ungefähr 2 km weida in St. Veit bereits schô wieda an urtümlichan Dialekt redt. Dés is begründbår durch dés, dass Schwårzåch imma schô mehr a Årbeitagmoa gwésn is, während St. Veit lãnge Zeid durch d' Lãndwirschåft prägt gwésn is. Speziell in dé Seitntäla vôm Såizåchtåi is da Dialekt no recht urtümlich erhåitn und då speziell vô öidane Leid, åwa à in dé Gmoana Werfm und Pfårrwerfm dé beide im Såizåchtåi lieng, zur Grénz zum Tennengau hî.

Weitas kã sé da Dialekt in St. Johànn bzw. Bischofshofn söiwa recht untascheidn. Leid in dé Ortsteile redn meist no urtümlicha wia dé im Ort söiwa.

's Ennspongaurische stöit ebmfåis a Untagrubbm vôm Pongaurischn dår, obwoih Sprecha vôm Såizåchpongaurischn dés néd genau untascheidn kenna obs a Ennspongaua oda a Såizåchpongaua is. In da Regl rédn dé Ennspongaua åwa no urtümlicha wia dé Såizåchpongaua.

[dro werkln] Beispiele

[dro werkln] Beispüiwörta

Pongaurisch	Stådingarisch (Såizburg)	Hochdeitsch
nid	néd/ned	nicht
zàch	miahselig/zàch	mühselig
Làssing	Frühling	Frühling
Hérest	Herbst	Herbst
Roã	Åbhãng	Abhang
åichibloackt	åwegschmissn	hinuntergefallen
mågst a Fotzn/Detschn	mågst a Wàtschn/àne ãdràht	willst du Schläge
Naidai/Naidal	Bussal	Küsschen
tenk/dengg	links	links
åft håsd a Pech	nåcha håst a Pech	danach hat man eben Pech
Àmpa	Küwe	Eimer/Kübel
Miichbutschn	Müichkãnn	Milchkanne
Piché	Hügl/Hüge	Hügel
ebbas	etwås/wås	etwas
enck	aich/enk	euch
znàgst amåi	båid amåi	bald einmal
Zwåugstèiz	Wåschschüssl	Waschschüssel
léb låb	zimle schlecht	ziemlich schlecht
Grànkn Såissn	Preislbeermamalàd	Preiselbeermarmelade
sëig wuscht woi s' Irgest seî	dés wàrad schô dés Ärgste	Das wäre wohl ganz schön schlimm
kléckhéscht	stâhårt	steinhart
Droatsau		ein mit Getreide gefüttertes Schwein
Lââ	Lawine	Lawine
drei/droi	drei	drei
schiaga	fåst	fast/schier
tréntn	drübm	drüben
aizai	bissl	bisschen
scheickig	liab/nett	nett
båtschiarigs Trichai	liabs Dirndl	hübsches Mädchen
gutt	klass/toll/leiwãnd	klasse/toll
zwê(n)/zwoa/zwo (gschlechtsåbhängig m/s/w)	zwà/ (Åid-Stådt-Såizburgarisch) zwoa	zwei
Diwan	Couch	Couch
fêscht/vorigs Jåuh	vorigs Jåhr	vergangenes Jahr
åûgétzt	åbgrutscht	abgerutscht
Kliabhacke	klàne Håckn	kleine Hacke
Janka	Janka/Jàggn	Jacke
Gstroû	Widda	Widder
Mànggai/Mànggal	Murmltier/Manggal	Murmeltier
òûhabig	ãhänglich	anhänglich/aufdringlich
Hådan	Hådan/Fetzn	Fetzen/Putztuch
iawand/iawends	åb und zuă	ab und zu
gàch	gàch/schnöi	schnell
Gràxn	Gràxn	altes Auto/Korb
Zecka	Korb	Korb
Kletzn	Kletzn	gedörrte Birnen
Ziwém/Zibebm	Zwetschgn	Zwetschke
Bêêheiga wtl.: "Beerenheiger"	Egoist	Egoist
hoia/haia	haia	heuer/dieses Jahr
schwåschz	schwårz	schwarz
greã	grea/grün	grün
blohàppàt	blossfiăßig/bårfuăssig	barfüßig
àrschlings	årschlings/rügglings	rücklinks
godln	nåchedösn	dösen/nachnickern
bleâgétzn	jàmman	jammern
ninascht	nirngs	nirgends

[dro werkln] Beispüisätz

Tüpische Beispüisätz wàràdn no:

Pongaurisch: Doscht amåi im Hérest håd 's in Lodan vo da Gmoã åichibloăckt iwas Roã.

Modaràts Pongaurisch: Nailich im Herbst håd 's in Lodan vo da Gmoã åwebloăckt üwas Roã.

Stådingarisch: Nailich im Herbst håds 'n Loda vô da Gmoa åwegschmissn üwan Hügl.

Hochdaitsch: Neulich im Herbst ist der gut gebaute Gemeindearbeiter gestürzt und den Abhang hinuntergerollt.

Pongaurisch: Àh dés greâne Schaickai gfoischt ma guad, séig mechat i håum.

Modaràts Pongaurisch: Ma dés greâne Schaickal gfoit ma guad, dés mechat i håm.

Stådingarisch: Ma dé grüne/greane Westn is voi liab, dé mechad i håbm.

Hochdaitsch: Diese grüne Weste finde ich sehr schön, ich würde die gerne haben wollen.

Pongaurisch: Hoia im Winta is oãfåcht iwahaupt koã Schnee zan Schiefåuhn dåu gwén, fêscht håd 's gnuag geem.

Modaràts Pongaurisch: Haia im Winta is oãfåch üwahaupt koã Schnee zum Schiefåhrn då gwén, vurigs Jåhr/Jåuh håd 's gnuag geem.

Stådingarisch: Haia im Winta wår néd wirklich a Schnee då zum Schifåhrn, vorigs Jåhr håd 's gnuag geem.

Hochdaitsch: In diesem Jahr im Winter hat es kaum Schnee gegeben zum Schifahren, letztes Jahr war genug da.

[dro werkln] Schau à unta

[dro werkln] Åigemeines üwa d' Boarische Språch

[dro werkln] Grammàtik vô da Boarischn Språch

[dro werkln] Gschicht vô da Boarischn Språch

Gschicht vôm Boarischn

[dro werkln] Regionàle Dialekte vôm Boarischn

Pinzgaurisch

[dro werkln] Sonstigs

Grossårl (Àrtikl auf Pongaurisch)
Sidboarisch (Àrtikl auf Pongaurisch)