Petrozavodsk
Frå Wikipedia – det frie oppslagsverket
Petrozavodsk (russisk:Петрозаво́дск), eller Petroskoi (karelsk og finsk), er hovudstaden i den autonome russiske republikken Karelia. Det finske namnet på byen var Äänislinna (frå Ääninen, finsk namn på Onegasjøen). Byen vart gjeven dette namnet medan Finland okkuperte dei austlege delane av Karelen under finske framhaldskrigen (1941–1944).
Petrozavodsk ligg i Petrozavodskbukta ved den vestre breidda av innsjøen Onega, kring 500 km nord for St. Petersburg og 925 km nordvest for Moskva. Byen strekkjer seg 10 km langs breidda, og kring 2 km inn i landet. Det er to flyplassar i Petrozavodsk, hamna handterer gods- og passasjertrafikk og jarnbanen til Murmansk går gjennom byen. Frå hamna går det båt til øya Kizhi, som er på UNESCO si liste over verdsarv.
Byen vart grunnlagd av tsar Peter den store i 1703. På denne tida vart det bygd opp jernstøyperi og kanonfabrikk ved breidda av Onega. Kring fabrikken utvikla det seg ein landsby, Petrovskaya Sloboda. Fabrikken vart kjend for sine kanonar og si kunststøyping. Landsbyen fekk bystatus og namnet Petrozavodsk i 1777, då Katarina den store regjerte i Russland.
Petrozavodsk er republikken Karelia sitt administrative senter og viktigaste industriby. Byen har 282.900 innbyggjarar og er republikken sitt vitskaplege og kulturelle senter. Det er to universitet og fleire høgskular i byen. Statsuniversitetet i Petrozavodsk har òg eit skandinavisk institutt som vart grunnlagd i 1997. Kulturtilbudet er stort, med fleire teater, konserthus og kunstmuseum. Det er òg fleire kyrkjer i Petrozavodsk; Katarinakyrkja, Korskyrkja, den Lutherske kyrkja og Alexander Nevskiy-kapellet. Det er reist eit monument over Peter den store ved stranda.
[endre] Bilete frå byen
 Jarnbanestasjonen i Petrozavodsk. |
 Monument og parkanlegg. |
 Frå bygatene 1. |
 Frå bygatene 2. |
[endre] Lenkjer ut
- Nettstad for Petrozavodsk 1 (russisk)
- Nettstad for Petrozavodsk 2 (russisk)
- Nettstad for Petrozavodsk sitt 300års jubileum (engelsk)
