Augusto Pinochet
De Uiquipedia
Augusto José Ramón Pinochet Ugarte (Valparaíso, Chile, 25 de payares de 1915 - Santiago, Chile, 10 d'avientu de 2006) foi un militar y políticu chilenu.
Pinochet algamó en 1973 el cargu de Comandante en Xefe del Exércitu de Chile. El 11 de setiembre d'esi añu, empobina un Golpe d'Estáu que derrocó al gobiernu electu del cabezaleru d'esquierdes Salvador Allende, que morrió durante l'asaltu de los militares al palaciu presidencial, Palaciu de la Moneda. Pinochet faise entós col gobiernu del país, primero baxo'l cargu de Presidente de la Xunta Militar de Gobiernu (que caltuvo hasta 1981), al que se sumó'l títulu de Xefe Supremu de la Nación el 27 de xunu de 1974, y que-y confería'l poder executivu.
El 16 d'avientu del mesmu añu, fízose col cargu de Presidente de la República chilena, nel que sería ratificau na Constitución Política de la República de Chile de 1980. Pa entós, Pinochet y la so Xunta Militar nel gobiernu empobinaren un procesu de represión de la oposición política, fundamentalmente al traviés de la nomada Dirección de Inteligencia Nacional (DINA)', a la que se-y atribuyen al rodiu de 3.100 muertes, según la Comisión de Verdá y Reconciliación (conocida tamién como Comisión Rettig). Al tiempu, cientos de miles de chilenos salíen del país pa fuxir del sistema represivu impuestu pol gobiernu de Pinochet.
El so gobiernu terminaría tres de la derrota nel Plebiscitu Nacional de 1988 y la so sustitución por Patricio Aylwin en 1990. Pinochet caltendría entós el cargu de comandante hasta'l 10 de marzu de 1998, y al día siguiente asumirí'l cargu de senador vitaliciu, que exercería dafechu pente dos meses, y que-y apurría inmunidá xudicial.
La dictadura de Pinochet foi ampliamente refugada tanto nel país como nel restu del mundu poles estremaes violaciones de derechos humanos del so Réxime Militar, polo que Pinochet debió enfrentar dellos procesos xudiciales, entamaos con una orden de detención internacional en 1998 dictada dende España, pero que nun llegaron a condenar al dictador enantes de la so muerte.
Esti artículu ye un entamu, ampliándolu, ayudarás a meyorar la Uiquipedia
