Cublai Can
De Uiquipedia
Cublai Can (1215-1294) foi un can mongol, emperador de China y fundador de la dinastía Yuan.
Nietu de Xenxis Can, sucedió al so hermanu Mongke como Gran Can de los mongoles en 1260.
Cublai Can acabó de conquistar China en 1279 tres de la victoria sobre los últimos emperadores de la dinastía Song. Sicasí, nun foi quien a conquistar Xapón, Indonesia nin Vietnam.
En 1280 Cublai Can proclamose emperador de China, entamando asina la dinastía Yuan. Asitió la capital del imperiu en Pequín, que se llamaba d'aquélla Cambaluc (en turcu qan baliq: "ciudá del can"). La residencia de branu de la corte taba en Kai-ping-fu (anguaño Shang-tu, la famosa Xanadú).
Cublai Can centralizó l'alministración del imperiu, reclutando xente de tolos territorios conquistaos pa los diferentes servicios, anque los puestos de responsablildá taben toos en manes de los mongoles. Pa favorecer la economía construyó la Gran Canal, graneros públicos y renovó la rede de carreteres.
Foi un gobernante tolerante coles diferentes relixones y abiertu al esterior. Na so corte recibió a lames tibetanos, misioneros nestorianos o viaxeros europeos como Marco Polo. Esti últimu llegó a ocupar puestos de responsabilidá nel so imperiu y dexa entender que Cublai Can pensaba en convertise al cristianismu.
