Roald Amundsen
De Uiquipedia
Roald amundsen (Borje, Noruega, 16 de xunetu 1872- † nel Árticu, 1928), explorador noruegu.
La so primera estancia nel Árticu foi en 1897, durante la expedición del Gerlache. En 1903 descubrió'l pasu del Noroeste y bordió la costa norte del Canadá a bordu del Gjoa. El so propósitu principal yera la conquista del Polu Norte, pero, cuando preparaba la espedición p'algamar esti oxetivu, tuvo noticies de que'l norteamericanu Robert Peary yá s'adelantara a él. Home de gran flesibilidá, modificó los sos planes sobre la marcha y empobinóse pal Antárticu, cola intención de ser el primeru en llegar al Polu Sur. En xunu de 1910 zarpa oficialmente hacia l'Estrechu de Bering y manda un telegrama a Scott: "Tomo lliberta informavos que tomo ruta hacia Antártida". El 15 de xineru de 1911 instala'l so campu base na bahía de les Ballenes, na Antártida. Cuando'l Terra Nova, el barcu de Scott, penetra na bahía de les Ballenes y ven el Fram, queden sosprendíos pola calidá de la expedición noruega, la experiencia de los homes y, sobre too, pol númberu de perros que lleva Amundsen. Ye por esta fuerte impresión polo que Scott asitiará'l so campamentu a 700 Km al Oeste del campu d'Amundsen, en Cap Evans. El 20 d'ochobre Amundsen, Olav Bjaaland, Helmer Hansen, Sverre Hassel y Oscar Wisting parten rumbo al Polu Sur. El 14 d'avientu de 1911 la expedición algama el obxetivu. La preparación física y téunica de la expedición, basada nel usu de trineos tiraos por perros y la participación d'esquiadores esperimentaos, asina como'l so ampliu conocimientu del terrenu, fueron les claves que-y permitieron ser el primeru n'algamar esi obxetivu. D'esta manera superó por escasu marxe a la desgraciada expedición del capitán Robert Scott, que llegó al mesmu llugar poques selmanes dempués. Les sos restantes expediciones, qu'efectuó n'acabando la Primera Guerra Mundial, tuvieron por obxetivu algamar el Polu Norte, el so gran suañu, qu'enxamás vio cumplíu.
En 1925, con tres aviones, tuvo más cerca del polu que naide , aparte de Peary. En 1926 efectuó un nuevu intentu a bordu del dirixible de construcción italiana Norge, mandáu per Umberto Nobile, col que sobrevoló el polu el 12 d' abril. Tras l'accidente de Nobile y col so nuevu dirixible, l'Italia, en 1928, Amundsen partió el 18 de xunetu, n'hidroavión, al rescate del italianu, empresa na qu'alcontró la muerte.
