Slobodan Miloŝeviĉ
El Vikipedio
Slobodan MILOŜEVIĈ (naskita la 29-an de aŭgusto 1941 en Poĵarevac, Jugoslavio, mortinta la 11-an de marto 2006 en Hago) estis serba politikisto; ekde 1987 politika gvidanto de Serbio, post 1989 kiel prezidento. Lia nacia agado rapidigis malkonstruon de Jugoslavio kaj antaŭhelpis komencon de militoj kontraŭ iamaj kunŝtatoj de Jugoslavio. Li estis ekde 1997 ĝis 2000 prezidento de la Jugoslava Federacia Respubliko.
Li devenis el montenegra familio kaj en aĝo de 18 jam aliĝis al la Asocio de Jugoslavaj Komunistoj. En 1964 li diplomiĝis pri juro en la Beograda Universitato kaj komencis komercan karieron. Li estis ĉefdirektoro de ŝtata energioindustria entrepreno Tehnogaz, poste prezidanto de la Beograda Kuna Banko. En 1984 li iĝis gvidanto de la komunista organizo de Beogrado.
Li baldaŭ ekpopulariĝis – li rekte alparolis la popolon – kaj elpremis en 1987 Stamboliĉon el la gvidpotenco. Li postulis retiron de aŭtonomeco de Vojvodino kaj Kosovo, dume apogis la ŝtatan ekonomian apogpolitikon.
En 1990 li forpenis grandan parton de aŭtonomeco de Kosovo kaj Vojvodino, kontraŭis la federacian ŝtatoformon proponitan de Kroatio kaj Slovenio. Lia politiko ekigis kontraŭserbajn movadojn dise en Jugoslavio. Inter 1992 kaj 1995 li apogis serbajn banditojn, krimulojn kontraŭ la novaj sendependaj ŝtatoj de iama Jugoslavio. Novembre de 1995 li estis altrudita je paco. Pro la similaj konfliktoj kun la albanoj en 1998, la internacia komunumo gvide de Usono ekbombardis Serbion en 1999 kaj altrudis denove al paco.
La jugoslava registaro arestis lin – pro internacia premo – kaj transdonis lin al IKK en Hago (2001). Li mortis tie, en prizono (2006) sen fina decido, prijuĝo de sia agado.
 |
