Internet

De Vichipedie, la enciclopedie libare dute in marilenghe.

Internet (pr. Ìn-ter-net, dal latin inter, fra, e l'inglês net, rêt), in curt ancje Net al è un sisteme mondiâl viert a ducj di rêts conetudis di ordenadôrs che a comunichin tra di lôr par mieç dal standard Internet Protocol (IP). E je componude di tantis rêts comerciâls, academichis, domestichis e governativis plui piçulis. Internet al traspuarte diviersis informazions e servizis, come la pueste eletroniche, lis chats, lis pagjinis web e altris documents dal World Wide Web.

Al contrari dal pensîr comun, Internet e il World Wide Web no son sinonims: se Internet e je une colezion di rêts inter conetudis, leadis di fîi in ram, fibris otichis, e vie indevant, il Web e je une colezion di documents inter conetûts, colegâts di leams ipertestuâi e URLs.

[cambie] La storie

Internet al è nassût intai agns Sessante pes esigjencis militârs dai Stâts Unîts: si jere tal plen de Vuere frede e si veve bisugne di une rêt che no fos centrâl, ma cun plui ponts di acès e che podès lâ indevant ancje se un dai siei elements al fos stât eliminât. Cheste prime rêt e cjapave il non di ARPANET e funzionave dome jentri dai Stâts Unîts; ae fin dai agns Setante si slargjà ancje a cualchi paîs european, e tal 1980, cu la definizion dal Transmission Control Protocol (TCP) e dal Internet Protocol (IP), lis basis ancjemò vuê de rêt, si fevele di Internet. Il World Wide Web, ch'al rapresente ce ch'o doprin principalmentri vuê in Internet, al nas uficialmentri tal 1992, cuant che il ricercjadôr dal CERN Tim Berners-Lee al definì il protocol HTTP (HyperText Transfer Protocol). Subit daspò di cheste date e vignì fûr il prin sgarfadôr (browser), Mosaic .

[cambie] Principâi servizis disponibîi su Internet

• World Wide Web
• TCP/IP
• FTP (o ben File transfer Protocol)
• Gopher
• Pueste eletroniche (o Email)
• Liste di distribuzion
• Newsgroup
• Telnet
• Webcast
• File sharing (Condivision di file)

[cambie] Principâi ents di gjestion di Internet

• ICANN (Internet Corporation of Assigned Names and Numbers)
• IETF (Internet Engineering Task Force)
• W3C (World Wide Web Consortium)
• IESG (Internet Engineering Steering Group)
• ISOC (Internet Society)