Karl Marx

De Uiquipedia

Karl Marx

Karl Heinrich Marx (5 de mayu de 1818 - 14 de marzu de 1883) foi ún de los pensadores más influyentes de la Historia y figura clave nel analís de la hestoria, la sociedá, la política y la economía. El so pensamientu prolóngase fasta munches décades más allá de la so muerte, siendo clave p'atalantar los procesos sociales y políticos del sieglu XX y convirtiéndose nel pá ideolóxicu del comunismu.

[editar] Biografía

Marx nació en Tréveris (en Prusia Trier -agora Alemaña-), col nome Karl Heinrich Marx, dientro d'una familia hebrea. Estudió derechu na Universidá de Bonn y pronto s'implicó na ellaboración de trabayos en torno a la realidá social, colaborando nel "Rheinische Zeitung", publicación de la que pronto llegará a ser redautor xefe. Funda tamién el "Deutsch-französische Jahrbücher", revista franco-alemana de la que sedrá direutor, de corta vida. En París, Marx conoz y faise collaciu de Friedrich Engels, personax que sedrá de vital importancia na so vida, ya que sedrá'l sofitu económicu de Marx. El pesu políticu de los artículos asoleyaos en Francia fain que gane fama d'axitador, lo que provoca la so espulsión de Francia. Establecíu en Bruseles, ingresa na Lliga de los Comunistes, tres lo cual declárase apátrida y revolucionariu. Tres el periodu revolucionariu de 1848, treslladase a Colonia, onde entama un nueu diariu, "Neue Rheinische Zeitung". qu'algama ésitu darréu, nel contestu d'una dómina de fuerte sentimientu social y compromisu revolucionariu. Poro, ye prohibíu pol gobiernu renanu. Ye agora cuando Marx se dedica a la escritura d'una de les sos obres fundamentales, El Capital, que fai nes sales de llectura del Muséu Británicu. El primer volume d'"El Capital" nun verá la lluz fasta 1867, tres dieciochu años de trabayu. Amás de preparar la publicación, Marx collaboró na organización de la Primera Internacional, participando activamente nos alderiques. Tres la Comuna de París de 1871, que significó un duru güelpe pa la Internacional, Marx retiróse de la llucha político y dedicóse a la escritura del so pensamientu. El 14 de marzu de 1883 morría en Londres.

Karl Marx casóse con Jenny von Westphalen, cola que tuvo tres fíos: la mayor, Francesca Marx, que se suicidó; Edgar Marx, que morrió a los ocho años, y la pequeña, Eleonora Marx (que formó parte del movimientu feminista).

[editar] Pensamientu

Testigu y víctima de la primer gran crisis del capitalismu (década de los años 30 del sieglu XIX) y del periodu revolucionariu de 1848, Marx desendolca una teoría económica capaz d'aportar esplicaciones a les mesmes, pero a la vegada encamentar a les clases populares a participar nella activamente pa producir un cambiu revolucionariu.

Billete de 100 marcos de la República Democrática Alemana (cola figura de Karl Marx)

Pa Marx, la determinación de la magnitú de valor d'una mercancía ye la cantidá de trabayu requeríu socialmente pa producila. Esta ye la conocía teoría del valor trabayu. Asína, criticando la teoría de David Ricardo del valor-trabayu, deduz qu'el salariu ye'l valor de la mercancía fuerza de trabayu, y como tou valor, determínase pol tiempu de trabayu necesariu pa la producción y reproducción de la mesma, nesti casu pa la producción y reproducción de la mercancía fuerza de trabayu, al valor de los medios de vida necesarios p'afitar la subsistencia del trabayador. Dotramiente, el capitalista comprador de la fuerza de trabayu consume dicha mercancía nel procesu de producción onde'l trabayador rinde demientres un tiempu (xornada llaboral) qu'escede la cantidá de tiempu necesaria pa la so reproducción como obreru (salariu), ye decir, el valor de la fuerza de trabayu y la so valorización nel procesu de trabayu son fautores distintos, cuya diferencia determina la magnitú de la plusvalía (exemplu de Marx nel Capital 1: "que p'alimentar y caltener en pie la fuerza de trabayu demientres veinticuatru hores faiga falta media xornada de trabayu, nun quier decir, nin muncho menos, qu'el obreru nun puea trabayar durante una xornada entera) . Esta plusvalía ye apropiada pol capitalista y d'ella vien la ganancia. Esta apropiación constitúi la bas fundamental del mou de producción capitalista y a la so vez estes condiciones materiales determinen la superestructura, ye decir les formes y conteníos de la concencia espresaes nel arte, la política, la relixón y también el derechu. Esta contradicción fundamental (producción colectiva vs. apropiación individual) baxo'l réxime de producción capitalista reviste la forma de Llei xeneral de l'acumulación capitalista que consiste en que cuanto mayor ye la riqueza social, ye decir el capital en furrulamientu y por tanto, tanto mayor ye la magnitú absoluta del proletariáu y la capacidá productiva del mesmu, tanto mayor ye l'exércitu de reserva, y polo tanto a medía que medra l'acumulación de capital medra l'acumulación de miseria, y dalgunos de los sos fenómenos son l'amenorgamientu de la tasa beneficios a la vegada que la concentración del capital en mui poques manes. Asína, la contradicción cimera del capitalismu según Marx ye l'antagonismu de clases ente la clas capitalista y la clas proletaria.

La necesidá de la revolución implicada en tales contradicciones ta determinada poles tensiones que deriven del fechu de que les fuercies productives sobrepasen y vense llimitaes poles relaciones de producción, pal capitalismu tal revolución consiste na "espropiación de los espropiadores" y movimientu final de la dialéutica de la propiedá privada y la so abolición, que nel pensamientu de Marx concrétase nun horizonte políticu concretu: el socialismu, antesala a la vegada del comunismu. El materialismu dialéuticu, ye decir la dialéctica del mou en que l'home produz los sos medios de vida, de la que se deriva la so alienación, constitúi pa Marx la historia humana (pa Marx: la historia humana ye la historia de la so alienación y de la abolición d'esta alienación), hestoria que a cada momentu solo pue ser entendida según los sos diferentes modos de producción, y la llucha de clases inherente, por exemplu, esclavista, feudal, capitalista y comunista.

El capital - Karl Marx

Les obres de Marx influyeron a bon númberu de teóricos y políticos, nun bon númberu d'ocasiones enemigos ente sí. Por una parte, habría señalar la interpretación fecha polos países del "socialismu real", partidarios de qu'una vanguardia del proletariáu se faiga col poder al traviés de la fuercia, p'asína avanzar faza'l socialismu: URSS, Albania, China, Cuba... Per otra, la que fai la socialdemocracia, nos sos entamos contraria a la táctica revolucionaria y partidaria d'avanzar faza'l socialismu al traviés de progresives reformes parlamentaries (hai que decir que la mayoría de partios socialdemócrates foron a poco y a poco reformando los sos plantegamientos, fasta aceutar la economía de mercáu). Asinamesmo, hai teóricos que s'asitien ente estes dos interpretaciones y defenden una revolución radicalmente democrática, y otros qu' apliquen el marxismu al estudiu de determinaes ciencies (historia: (materialismu históricu), arte, antropoloxía, ...).

[editar] Críticos de Marx

Un críticu de Marx ye Karl Popper. Otru críticu, más de la vida personal que de la ideoloxía de Marx, ye Paul Johnson, que dedica a Marx un capítulu del so llibru "Intellectuals".