Berchtsgoana Land

Aus Wikipedia

Wappn	Kartn

Basisdatn
Bundesland:	Baian
Bezirk:	Obabaian
Vawoitungssitz:	Reichahåi
Flächn:	839,97 km²
Einwohna:	102.558 (30. September 2005)
Bveikarungsdichtn:	122 Einwohner je km²
Kennzeichn:	BGL
Kreisschlüssl:	09 1 72
Kreisgliedarung:	15 Gmoa
Adress vo da Kreisverwåtung:	Soizburger Stroß 64 83435 Reichahoi
Website:	www.berchtesgadener-land.de
Politik
Landrat:	Georg Grabner (CSU)

"Wem da liabe God liabt, den schickt er in des Land" so da Ludwig Ganghofer, da boarische Voiksdichter.

S Berchtsgoana Land, àà bekannt åis "As gloane deitsche Eck", auf da Landkoartn siagt ma´s ois gloanan Zipfe gånz im Sidostn vo Deitschland, is a Låndkreis in Obabayan. Des Landl is, aber, auf da andern Seitn, aa in da Mittn vom boarischn Sprochraum. ´S is im Nordn und Westn begrenzt vom Landkreis Traunstoa und im Ostn, Sidn und Sidostn vom Bundesland Soizburg umschlossn. Des Biitdl mid St. Bartholomä, an Kinigsee und an Wotzmoo, kent ma fast auf da ganzn Wejt. Aber, net nur landschaftlich, hod's a sonst vii zum Bieten. Aa wann as Berchtsgoana Land wirtschaftlich vorbildlich dosteht (bei d'Arwartslosn hom's grod drei Prozent) und se von da Struktur recht modern zoagt, han de mehran Hiesign, no recht bodnständig und da Tradition verpflichtet und stengan zur Hoamat und Sproch, im Boarisch.

Wichtige Ortschaftn san Berchtsgoan, Reichahoi, Freilassing, Piding, Anger, Aufham, Teisndorf, Laffa, Scheenau an Kinigsee, Bischofswiesn und Ramsau.

[dro werkln] Gschicht

Des Landl is gschichtlich aa recht intressant zum Seng: Zum Beispüi hom vor 4000 Johr de Illyrer in Reichahoi scho Soiz obbaut, wia spada aa, de Kejtn (aa Vorfahrn von de Schottn, Iren, Waliser und Bretonen) und de Römer und no spada aa de Bajuwaren (Baiern). Des Soiz war für des ganze Gai oiwei wichtig und werd bis heit obbaut. Die Gegnd is bis heit dodafia bekannt.

Spada war dann des heitige Berchtsgoana Land in wesentliche drei Territorien aufgliedert, de wo warn:

da heitige innere Landkreis (ab Hallthurm), des war vo 1306 bis 1803 de Fürstprobstei vo Berchtsgoan
da Neardliche Landkreis (ab Piding), da Südteil vom Rupertiwinke, der war seit da Soizburga Loslegung vo Baiern 1342 bis zum Schluß 1803 beim Erzbistum Soizburg und
Reichahoi und Schneizlreith, de warn oiwei boarisch

Seit 1816 is zwar ois midanand vom heitigen Landkreis boarisch, aber erst seit 1973 gibt´s oan Landkreis.

[dro werkln] Leid

Leit wo's fast ibaroi kéna, aus da Gegnd, han unta andan da Hackl Schorsch und d´Niedernhuber Barbara, beide vo Berchtsgoan, d' Heisl Regina aus Schneizlreith, da Ringsgwandl aus da Staffabruck und da Söllner Hanse aus Marzoi.

[dro werkln] Landschaft

As Berchtsgoana Land is mit dem zwoathèchstn Bergmassiv vo Deitschland ausgschtatt, dem sågnhaftn Wotzmoo mit seina Oidn und seine siebm Kinda. Ansonstn gibts àà no recht vui anderne Bearg, wia an Staffa, d'Reitaòim oda an Predigtstui, àà a Stickl vom Unntasberg liagt im Berchtsgoana Land. Im Nordn hòds mera Hügl und flachs Land, wei's ja gròd am Alpenrand liagt.

Àà a bår recht scheene saubere und guat frische Seen håds, zum Beispui an Thumsää, an Abtsdorfa Sää, an Heglwèrtta Sää und 'n Keenigssää.

Durch an Bergrutsch vor 4000 Joar is da Zaubawoid am Uafa vom Hintasää dastandn.