Muhammad
From Wikipedia
Muhammad anaaminika katika dini ya Uislamu kuwa ni mtume wa mwisho wa Mungu kwa wanadamu. Muhammad alizaliwa akiwa yatima kwani babake alifariki akiwa bado yuko matumboni mwa mamake. Hakuishi sana na mamake, naye akafariki dunia wakati Muhammad alipokuwa bado ana umri wa miaka sita, na baadaye alichukuliwa na babu yake AbdulMuttalib na kuishi naye kwa muda wa miaka miwili, kisha babu yake naye akafariki. Kazi ya kumlea Muhammad ilimwangukia ami yake Abu Talib ambaye ndiye aliyemlea na kuishi naye mpaka alipokuwa mkubwa na kumuoza na kumpa himaya wakati alipopewa utume na kuanza kazi ya kufikisha ujumbe wa Mwenyezi Mungu kwa watu wake.
Contents |
[edit] Bishara njema
Muhammad alipofikia umri wa miaka kumi na mbili alichukuliwa na ami yake Abu Talib katika msafara kuelekea Shamu, lakini walipofika mji unaoitwa Busra karibu na Sham, walikutana na mtawa wa kinasara aitwaye Bahira, na alipomuona Muhammad alimtambua kwa sifa zake kuwa ndiye Nabii anayesubiriwa aliyetajwa kwenye vitabu vyao vya dini, akamshauri ami yake amrudishe wala asiingie naye Sham maana huko huenda Mayahudi wakataka kumuua. Basi Abu Talib akatumiza baadhi ya vijana wake warudi naye Makka.
[edit] Hali ya Muhammad kabla ya kupewa utume
Muhammad alikuwa akikaa kwenye pango la Hira (Jebel Hirra) huko Makka kwa nia ya kutafakari na kutaamuli mambo ya Mwenyezi Mungu mpaka kimalizikapo chakula chake na maji yake hurudi kwa mkewe Khadija na kuchukuwa chakula na maji mengine - mara akikaa huko kwa masiku, mara kwa wiki, na mara nyengine kwa mwezi, na aliendelea kufanya hivyo kwa muda wa miaka mitatu akenda katika hilo pango mpaka Mwenyezi Mungu alipoamua kuteremsha rehema yake juu ya wanadamu ulimwenguni kwa kuwaletea hidaya na uwongofu.
[edit] Kupewa kwake Mtume
Bado akiwa anaendelea kulizuru pango la Hira, alijiliwa siku moja na Malaika Jibrili na kumtaka asome na Muhammad (SAW) akimjibu kuwa yeye hajui kusoma na baada ya kumshikilia mara tatu asome, naye akimjibu kuwa yeye si msomaji, alimteremshia Wahyi wa kwanza kutoka kwa Mola wake unaosema:
Soma kwa jina la Mola wako aliyeumba,
Amemuumba binaadamu kwa tone la damu,
Soma! Na Mola wako ni Karimu kushinda wote!
Ambaye amefundisha kwa kalamu.
Kamfundisha mtu aliyokuwa hayajui. (Q.96:1-5)
Mtume Muhammad baada ya kupewa utume alianza kazi ya kufikisha ujumbe wa Mwenyezi Mungu kwanza kwa watu wake, kisha kwa Waarabu wengine, na kisha kwa wanadamu wote kwa jumla, kuanzia tangu alipokuwa miaka arubaini (40) mpaka alipofariki akiwa na umri wa miaka sitini (60).
[edit] Maisha yake Makka
Muhammad aliishi Makka kwa muda wa miaka 53, arubaini (40) katika hiyo akiwa ni mtu wa kawaida kabla ya kupewa utume, na 13 akiwa ni mjumbe wa Mwenyezi Mungu. Maisha yake Makka yalikuwa ya taabu tangu utotoni mwake, kwani alizaliwa yatima kisha alipokuwa katika ujana wake alikuwa akifanya kazi ya kuchunga mbuzi na kondoo wa watu wa Makka kwa vijipesa kidogo mpaka alipofika umri wa miaka ishirini na tano akapata kazi ya kumfanyia biashara Khadija (RA), bibi mtukufu kabisa wa kikureshi ambaye baadaye alikuja kuwa mkewe, na kuzaa naye aghlabu ya watoto wake.
[edit] Miaka 13 ya Utume Makka
Katika miaka 13 aliyoyaishi hapo Makka baada ya kupewa utume, Muhammad alipata kila aina ya mateso na masumbuko, juu ya nafsi yake na juu ya wafuasi wake, naye alisubiri na kustahmili kila aina ya taabu na shida kwa ajili ya Mola wake, mpaka Mwenyezi Mungu alipompa amri ya kuhama mji huo na kuelekea Madina. Katika muda huu alipokuwa Makka, wengi katika jamaa zake na watu wa makabila mengine wa tabaka mbali mbali za jamii waliingia kwenye dini hii tukufu aliyokuja nayo Muhammad.
[edit] Kuhamia Madina
Mtume Muhammad, baada ya kupewa amri ya kuguria Madina, aliondoka yeye na sahibu wake Abubakar Assiddiq (RA) na kuhamia Madina, mji ambao ulimpokea na kumkubali na kumsaidia na kumtukuza na kumlinda na maadui. Mtume Muhammad aliishi Madina kwa muda wa miaka 10 mengine akitangaza dini ya Mwenyezi Mungu na huko watu wengi na makabila mbali mbali ya kiarabu yaliingia kwenye dini ya Uislamu kwa makundi makundi, na kwa hivyo, aliweza kurudi Makka akiwa na wafuasi wengi na kuiteka, na kuweza kuirudisha Kaaba ambayo ndiyo kibla cha Waislamu wote ulimwenguni katika mambo ya Sala na Hija.
[edit] Maisha yake Madina
Mtume Muhammad aliishi miaka kumi (10) Madina, akinadhimu maisha ya jamii ya Waislamu huko, na kuweka chanzo cha dola ya kiislamu ulimwenguni. Sharia na hukumu nyingi ziliteremka huko Madina katika kupanga na kunadhimu maisha ya jamii hiyo kwanza na maisha ya wanadamu wote kwa jumla. Sharia na hukumu hizi zinapatikana katika Kitabu Kitakatifu cha Mwenyezi Mungu (Qurani), na kutokana na Sharia na hukumu hizi, leo Waislamu wote ulimwenguni wananadhimu maisha yao kulingana na Sharia hizi.
Categories: Uislamu | Mitume | Dini
