Hormone

وکیپیڈیا سے

شکل اول : جسم انسانی میں موجود اہم غدود (glands) کی شکل۔ غدود ہی وہ اجسام ہوتے ہیں کہ جن کے خلیات سے انگیزات (hormones) خارج ہو کر جاندار کے جسم میں تضبیطی (controling) افعال انجام دیتے ہیں۔ اور یہ غدود جو کہ انگیزات خارج کرتے ہیں انکو داخلی غدود کہا جاتا ہے۔

1. غدہ صنوبری (Pineal gland)
2. غدہ نخامیہ (Pituitary)
3. غدہ درقیہ (Thyroid gland)
4. غدہ توتہ (Thymus)
5. غدہ کظر (Adrenal gland)
6. غدہ حلوہ (Pancreas)
7. مبیض (Ovary)
8. خصیہ (Testis)

انگیزات (واحد : انگیزہ) دراصل انسان ، حیوان اور نباتات سمیت تمام اقسام کے حیاتی اجسام کے خلیات سے افراز (secrete) ہونے والے کیمیائی مادے ہوتے ہیں جو کہ خلیے سے نکل کر خون کے زریعے سے سفر کرتے ہوۓ تمام جسم میں پھیل جاتے ہیں اور اپنے مقام افراز (اخراج) سے دور دراز موجود خلیات ، اعضاء اور دیگر انگیزہ پیدا کرنے والے داخلی غدد (endocrine glands) کے افعال کو تضبیط (control) کرتے ہیں۔ انکو انگریزی میں Hormones کہا جاتا ہے۔

اوپر کے بیان دو باتوں کا اندازہ ہوجاتا ہے؛ 1- ایک تو یہ کہ انگیزات یا hormones پیدا کرنے والے غدد (glands) کو داخلی غدد کہا جاتا ہے اور انکا نظام نظام داخلی غدہ (endocrine system) کہلایا جاتا ہے 2- دوسری بات یہ کہ انگیزات جسم میں تضبیطی (controling) افعال انجام دینے والے مادے ہوتے ہیں اور اسی وجہ سے انکا بنیادی فعل ، اعصابی نظام (nervous system) کی طرح ہی ہوتا ہے کیونکہ دماغ اور اس سے نکلنے والے اعصاب بھی بنیادی طور پر تضبیطی افعال ہی انجام دیتے ہیں اور اسی وجہ سے انگیزات کا نظام یعنی نظام داخلی غدہ اور اعصابی نظام کو مشترکہ طور پر نظمیتی نظامات (regulatory systems) میں شمار کیا جاتا ہے۔

[ترمیم] آسان بیان

انسان سمیت تمام جانداروں کو اپنے جسم کے اندرونی ماحول کو بیرونی ماحول سے متوازن رکھنا ضروری ہوتا ہے اور اسکے لیۓ ضروری ہے کہ پہلے خود جاندار کے تمام جسم میں ایک نظیمت (regulation) پائی جاتی ہو۔ جاندار کے جسم میں اس نظیمت کو پیدا کرنے کیلیۓ دو اہم ترین نظامات پاۓ جاتے ہیں ؛ ان میں سے پہلا دماغ کا نظام ہے اور دوسرا نظام ، اندرونی یا داخلی غدودوں کا نظام ہوتا ہے۔ اگر سادہ اور آسان انداز میں کہا جاۓ تو یوں کہا جاسکتا ہے کہ دماغ کا نظام بنیادی طور پر قلیل المعیاد (short term) انداز پر کام کرتا ہے یعنی اسکے اثرات فوری ، تیز اور (عموماً) موجودہ مدت کیلیۓ ہوا کرتے ہیں جبکہ اندرونی غدودوں کا نظام طویل المعیاد (long term) بنیادوں پر کام انجام دیتا ہے اور اسکے افعال معیادی ، آہستہ اور (عموماً) آئندہ مدت کیلیۓ ہوتے ہیں اور اگر ہمیشہ کیلیۓ نہیں تو کم از کم عرصے تک ضرور برقرار رہتے ہیں۔

دماغ کا نظام تو جسم کو منظم کرنے کیلیۓ اپنے اعصاب سے بھیجے ہوۓ یا لیۓ ہوۓ برقی اور کیمیائی پیغامات کو استعمال کرتا ہے جبکہ اندرونی یا داخلی غدودوں کا نظام ، اپنے خلیات میں بناۓ ہوۓ کیمیائی مادوں کو استعمال کرتا ہے ، اور ان ہی کیمیائی مادوں کو انگیزہ (جمع : انگیزات) کہا جاتا ہے۔

[ترمیم] داخلی و خارجی غدود

شکل دوئم : ایک مشہور کیمیائی مادہ ، انسولین جس کو یہاں انگیزہ کی مثال کے طور پر پیش کیا گیا ہے یہ انگیزہ ، غدہ حلوہ سے افراز (secret) ہوتا ہے اور جسم میں گلوکوز کی مقدار کو تضبیط کرتا ہے۔ یہ عکس شمارندہ سے بنایا گیا ہے اور انسولین کے سالمہ کے سہ باری (threefold) تناظر (symmetry) کو ظاہر کرتا ہے، خارصین (zinc) کا جوہر درمیان میں دیکھا جاسکتا ہے جو کہ ہسٹیڈین کے حصوں کے ساتھ کیمیائی بند بناتا ہے۔

انگیزہ جن غدود میں پیدا ہوتا ہے اسے داخلی غدود کہنے کی وجہ یہ ہے کہ انگیزات اپنے غدود سے نکل کر خون کی گردش کے زریعے جسم میں ہی داخلی طور پر پھیل جاتے ہیں اور اپنے افعال انجام دیتے ہیں انکی اسی خصوصیت کی وجہ سے یہ غدود داخلی کہلاتے ہیں۔ جبکہ ایسے غدود کہ جن کے خارج کردہ کیمیائی مادے کسی بھی طور جسم سے نکل جانے والی سمت کی جانب چلے جائیں (جیسے معدہ اور آنتیں) تو پھر ایسے غدودوں کو خارجی غدود (exocrine glands) کہا جاتا ہے اور انکے خارج کردہ کیمیائی مرکبات کو انگیزہ یا hormone نہیں کہا جاتا بلکہ ان کو خامرے (enzymens) کہتے ہیں۔
جسم انسانی میں پاۓ جانے والے داخلی افرازی غدودوں کا مقام شکل اول میں دکھایا گیا ہے۔

[ترمیم] تاریخ

انگیزات کو سب سے پہلے 1902 میں برطانوی ماہرین فعلیات W. Bayliss اور E. Starling نے شناخت کیا تھا ^[1] ۔ اور سب سے پہلے 1905 میں اس اصطلاح کو استعمال کرنے والا بھی Starling ہی تھا ، اسکے اپنے الفاظ کے مطابق

• یہ کیمیائی پیامبر ۔۔۔ یا 'ہارمونز' جیسا کہ ہم انہیں پکار سکتے ہیں ، خون کے بہاؤ کے زریعے ان اعضاء سے جہاں یہ تیار کیۓ گۓ ہوں ان اعضاء تک لے جاۓ جاتے ہیں جہاں انہیں اثر پیدا کرنا ہو۔ ^[2]
  
  These chemical messengers ... or 'hormones' as we may call them, have to be carried from the organ where they are produced to the organ which they effect, by means of the blood stream.

[ترمیم] تجربے کی نوعیت

یہ علماء اپنی تحقیق ایک قسم کے غدود کے افرازات (secretions) پر کررہے تھے جسے طب میں غدہ حلوہ (pancreas) کہا جاتا ہے اور جو بالاخر اپنا افراز معدہ تک پہنچاتے ہیں۔ اس سے قبل روسی عالم P. Pavlov کا خیال تھا کہ یہ افراز دراصل اعصابی نظام سے تضبیط کیا جاتا ہے، اور اسی کو ثابت کرنے کیلیۓ مذکورہ بالا دونوں برطانوی علماء نے پہلے تو وہ اعصاب کاٹ کر منقطع کردیۓ جن کے بارے میں یہ خیال تھا کہ یہ دماغ سے تضبیط کرنے کے پیغامات آنتوں اور معدے تک لاتے ہیں۔

شکل سوئم : اس تجربہ میں مذکور غدود (gland) جسکو غدد حلوہ کہا جاتا ہے کا ایک خاکہ جو کہ غدد حلوہ کے قرب و جوار میں موجود دیگر اہم ا‏عضاء بھی ظاہر کررہا ہے۔

اور اس سے انہوں نے خیال کیا کہ اب اگر آنتوں میں معدہ سے گذر کر غذا آۓ گی تو غدہ حلوہ کی چونکہ دماغ سے تضبیط منقطع ہو چکی ہے لہذا اب وہ معمول کے مطابق افرازات نہیں کر سکے گا مگر ایسا ہوا نہیں اور دماغ کے اعصاب کو کاٹنے کے بعد جب انہوں نے معدے سے آنتوں میں غذا پہنچائی تو یہ انکشاف ہوا کہ غدہ حلوہ تو اب بھی اپنے معمول کے مطابق افرازات (secretions) پیدا کررہا ہے۔ یہ ایک بہت بڑا انکشاف تھا جس نے ایک طرف تو یہ کہ اب تک موجود تصور کو باطل کردیا اور دوسری جانب نۓ سوالات بھی پیدا کردیۓ جن میں سے سب سے اہم یہ تھا کہ جب دماغ سے آنے والے اعصاب کو بھی کاٹ دیا گیا ہے تو پھر آخر ایسی کیا چیز ہے کہ جو غدہ حلوہ کو تضبیط (control) کررہی ہے؟ وہ کیا راز ہے کہ جس کی وجہ سے دماغ سے جدا کر دیۓ جانے کے باجود غدہ حلوہ اس بات کا اندازہ لگا لیتا ہے کہ اب غذا معدہ سے گذر کر آنت میں آگئی ہے اور وہ وقت ہے کہ اس غذا کو ہضم کرنے والے افرازات (secretions) کو آنتوں میں ڈالا جاۓ؟ ان سوالات کو حل کرنے کی خاطر کیۓ جانے والے بعد کے مزید تجربات نے اس بات کا انکشاف کیا کہ غدہ حلوہ کی تضبیط کرنے والے وہ اشارے دراصل برقی انداز میں آنے والے اعصابی اشارے نہیں بلکہ کسی اور جگہ سے آنے والے کیمیائی اشارے (chemical signals) ہیں جو کہ غدہ حلوہ کو تضبیط کرتے ہیں اور اسی وجہ سے اعصاب کو کاٹ دینے کے باوجود ان کیمیائی اشاروں سے اس غدہ کی تضبیط کا عمل معمول کے مطابق جاری رہتا ہے۔ اور پھر مزید تجربات سے یہ بات معلوم ہوئی کہ یہ کیمیائی مادے دراصل خود آنت کی دیوار سے افراز (خارج) ہو رہے ہوتے ہیں جہاں سے یہ خون میں جذب ہوکر اسکے زریعے سفر کرتے ہوۓ غدہ حلوہ تک پہنچتے ہیں اور اسکو غذا کے آنت میں آجانے کی اطلاع دینے کے ساتھ ساتھ اسکی تضبیط کا فعل بھی انجام دیتے ہیں ، انہوں نے اس کو پہلے افراز (secretion) کہا جو کہ بعد میں 1905 میں hormone کر دیا گیا (جیسا کہ اوپر بیان ہوا)۔

[ترمیم] تالیفِ انگیزہ

تالیف (synthesis) دراصل حیاتیات و حیاتی کیمیاء میں کسی بھی جاندار میں کسی مرکب کی تخلیق کو کہا جاتا ہے یہ عمل پودوں میں بھی ہوتا ہے اور حیوانات میں بھی۔ انگیزات کی سالماتی نوعیت کے اعتبار سے انکی تالیف کا عمل مختلف ہوتا ہے جسکی مختصر داستان نیچے درج کی جارہی ہے اور انکی مزید تفصیل ان کیمیائی مرکبات کے مخصوص نام کے صفحات پر ہوگی۔

[ترمیم] لحمیاتی و ہضماتی انگیزات

وہ انگیزات یا hormones کے جو امائنو ترشوں سے بنے ہوتے ہیں وہ ظاہر ہے کہ یا تو بہت بڑے یعنی مکمل لحمیہ (protein) کے سالمات کی شکل میں ہوسکتے ہیں یا پھر وہ نسبتاً چھوٹے اور یعنی ہضمہ (peptide) سالمات کی شکل میں ہوسکتے ہیں۔ اگر یہ لحمیہ کی شکل میں ہوں تو انکو لحمیاتی اور اگر ہضمہ کی شکل میں ہوں تو پر انکا ہضماتی کہا جاتا ہے۔ اور چونکہ بنیادی طور پر انکے سالماتی کی ساخت ایک ہی جیسی ہوتی ہے (یعنی یہ امائنو ترشے سے بنے ہوتے ہیں) اس لیۓ خلیات میں انکی تالیف بھی ایک مشترک طریقۂ کار کے مطابق ہوتی ہے۔

• اس قسم کے انگیزوں کی پہلے mRNA کے زریعے سے کھردرا درون شاکلی شبکہ (rough endoplasmic reticulum) کے مقام پر سلف پیش انگیزہ (pre pro hormone) کے طور پر تخلیق کی جاتی ہے
• اور پھر اسکے بعد اس سلف پیش انگیزہ سالمے سے سلف یعنی pre کے امائنو ترشے الگ ہوجاتے ہیں اور باقی رہ جانے والا پیش انگیزہ (pro homone) منتقل ہو کر گالجی اپریٹس میں چلا جاتا ہے
• گالجی اپریٹس میں جانے کے بعد اس میں سے پیش (یعنی pro) کے حصے والے امائنو ترشے بھی الگ ہو جاتے ہیں اور اس طرح باقی رہ جانے والے انگیزے (hormone) کو خلیے سے باہر خون میں افراز (secretion) کردیا جاتا ہے۔

[ترمیم] اسٹیرائڈ انگیزات

اسٹیرائڈ انگیزہ ایسے انگیزہ کو کہا جاتا ہے کہ جو اسٹیرائڈ سے بنے ہوتے ہیں لیکن انکی تخلیق ایک خاصہ پیچیدہ اور طویل عمل ہے جسکے لیۓ انکا صفحہ الگ سے مخصوص کیا جانا ضروری ہے۔ دیکھیۓ تالیف اسٹیرائڈ

[ترمیم] امائن انگیزات

ایسے انگیزے جو کہ Amine کے سالمات سے بنے ہوتے ہیں انکو امائن انگیزات کہا جاتا ہے انکی چند ایک مثالیں درقیہ انگیزہ (thyroid hormone) ، اپی نیفرین اور نور اپی نیفرین ہیں۔ انکی تالیف کی تفصیل کے لیۓ انکے مخصوص صفحات موجود ہیں۔

[ترمیم] افراز کی نظمیت

افراز (secretion) دراصل جانداروں کے جسم میں خلیات سے ہونے والے کسی ایسے اخراج (excretion) کو کہتے ہیں کہ جو جاندار کیلیۓ کسی مفید کام میں استعمال کیا جاتا ہو۔ انگیزات بھی جانداروں کے جسم میں ایک افراز کی حیثیت سے خارج ہوتے ہیں کیونکہ یہ جسم کے لیۓ مفید ہی نہیں لازمی حیثیت رکھتے ہیں۔ اور انکی مناسب تنظیم کو افراز کی نظمیت یا regulation of secretion کہا جاتا ہے۔

افراز انگیزات کا عمل جاندار کے جسم میں کچھ یوں تضبیط کیا جاتا ہے کہ اگر جسم میں انکی کمی واقع ہو رہی ہو (یا طلب میں اضافہ ہو رہا ہو) تو اسکا احساس حاصلیات (receptors) کے زریعے سے ان خلیات کو ہو جاتا ہے کہ جو مطلوبہ انگیزہ خارج کرنے کا فریضہ انجام دے رہے ہوں اور وہ اس احساس کو پاکر انگریزے کی پیداوار میں اضافہ کردیتے ہیں۔ اور اگر جسم میں انکی مقدار میں غیر ضروری اضافہ (یا استعمال میں کمی واقع ہورہی ہو) تو وہ خلیات اس احساس کو محسوس کر کہ اس انگیزے کی پیداوار میں کمی کردیتے ہیں۔ اس قسم کی تضبیط کا عمل فعلیات میں ارتجاع (feedback) کہلاتا ہے۔

[ترمیم] مثبت ارتجاع

اور پر بیان کردہ ارتجاع کی پہلی صورت ، مثبت ارتجاع (positive feedback) کہلاتی ہے۔ یعنی اگر کوئی انگیزہ ، جسم میں پیدا کردہ اپنے اثرات کی وجہ سے بلاواسطہ یا بالواسطہ ان خلیات یا غدد پر اثرانداز ہوکر اپنی پیداوار بڑھواۓ کہ جن سے وہ افراز کیا گیا تھا تو ایسی صورت میں اسکو مثبت ارتجاع کہا جاۓ گا۔ اسکی ایک مثال مصفریہ انگیزہ (Luteinizing hormone) ہے جو کہ اباضہ (ovulation) کے وقت ایسٹروجن کی وجہ سے پیدا ہوکر مبیض (ovary) پر اثرانداز ہوتا ہے اور مزید ایسٹروجن کی پیداوار کا باعث بھی بنتا ہے۔

[ترمیم] منفی ارتجاع

منفی ارتجاع ایسے ارتجاع کہا جاتا ہے کہ جس میں کوئی انگیزہ اپنی خود تضبیط کرنے کی خاطر اپنے افراز کو محدود کروا لیتا ہے۔ مثال کے طور پر مشہور انگیزہ جزیرین (insulin) ؛ یہ انگیزہ ، غدہ حلوہ (pancreas) کے بیٹا خلیات سے اس وقت افراز ہوتا ہے کہ جب خون میں مٹھاس (glucose) کی مقدار بڑھ رہی ہو، اور اس بڑھتی ہوئی مقدار کو یہ انگیزہ خلیات میں منتقل کرکہ خون میں شکر کی مقدار کو کم کر کہ معمول کے مطابق رکھتا ہے۔ اب اس جزیرین کے اس اثر کی وجہ سے بیٹا خلیات سے اسکا افراز بھی کم ہوجاتا ہے کیونکہ اب خون میں شکر کم ہو چکی ہے اور مزید کم کرنے کی ضرورت نہیں ، اسی وجہ سے اب مزید جزیرین انگیزے (insuline hormone) کی ضرورت نہیں رہتی اور اسکا افراز کم ہو کر معمول کی سطح پر آجاتا ہے ، اس طرح کی تصبیط کو ہی منفی ارتجا‏ع یا negative feedback کہا جاتا ہے۔

[ترمیم] اھم انگیزات (بالخصوص انسانی)

• درج ذیل فہرست جانداروں میں پاۓ جانے والے انگیزات (HORMONES) کی اہم اقسام کو ظاہر کرتی ہے، گو کہ یہی (تمام نہیں) انگیزات دیگر جانداروں میں بھی پاۓ جاتے ہیں مگر اس فہرست کو انسانی نقطۂ نظر سے مرتب کیا گیا ہے۔

فہرست انگیزات (List of Hormones)

اسم انگیزہ Hormone name	اسم غدہ Gland name	بنیادی افعال Main function
درقیہ مائلہ حرر انگیزہ Thyro tropin releasing hormone	تحت المِہاد Hypothalamus	پیش لبنی اور درقیہ محرکی انگیزہ تحریک stimulates prolactin and TSH
قشرہ مائلہ حرر انگیزہ Cortico tropin releasing hormone	تحت المِہاد Hypothalamus	قشرکظری مائلہ انگیزہ کی تحریک stimulates adrenocorticotropic hormone
غددجنسی حرر انگیزہ Gonado tropin releasing hormone	تحت المِہاد Hypothalamus	مصفریہ اور جریب محرکی انگیزہ تحریک stimulates Luteinizing hormone and Follicle stimulating hormone
نمو انگیزہ حرر انگیزہ Growth hormone releasing hormone	تحت المِہاد Hypothalamus	نمو انگیزہ کی تحریک stimulates Growth hormone
جسدی مائلہ مانع حرر انگیزہ Somato tropin releas-inhibiting hormone	تحت المِہاد Hypothalamus	مانعت نمو انگیزہ Inhibits Growth hormone
پیش لبنی مانع عامل Prolactin-inhibiting factor	تحت المِہاد Hypothalamus	پیش لبنی مانعت inhibit Prolactin
درقیہ محرکی انگیزہ Thyroid stimulating hormone	امامی نخامیہ Anterior pituitary	درقیہ انگیزہ کی تحریک stimulates Thyroid hormone
جریب محرکی انگیزہ Follicle stimulating hormone	امامی نخامیہ Anterior pituitary	ایسٹروجن اور جریب کی تحریک stimulates follicle and estrogen
مصفریہ انگیزہ Luteinizing hormone	امامی نخامیہ Anterior pituitary	1- اباضہ (ovulation) 2- مبیض میں : ایسٹروجن اور پروگیسٹیرون 3- خصیہ میں : خصیہ انگیزہ کی تحریک
نمو انگیزہ Growth hormone	امامی نخامیہ Anterior pituitary	تالیف لحمیات و نشونما
پیش لبنی Prolactin	امامی نخامیہ Anterior pituitary	پستان کی ترقی اور دودھ (لبن) کی پیدائش
قشرکظری مائلہ انگیزہ Adrenocorticotropic hormone	امامی نخامیہ Anterior pituitary	تحریک و تالیفِ قشرِ کظری انگیزات stimulates synthesis and secretion of adrenal corcical hormones
بیٹا شحم مائلہ beta lipotropin	امامی نخامیہ Anterior pituitary	??
خلیہ اسودیہ محرکی انگیزہ Melanocyte stimulating hormone	امامی نخامیہ Anterior pituitary	تالیف اسودیہ کی تحریک stimulates melanin synthesis
ولادی علجہ Oxytocin	خلفی نخامیہ Posterior pituitary	قذف یا اخراج دودھ milk ejection
ضد مدرالبول انگیزہ Anti diuretic hormone	خلفی نخامیہ Posterior pituitary	پیشاب کی تشکیل کے دوران پانی کا انجذاب مکرر reabsorption of water during urine formation
متبادل زیرتحقیق Thyroxine	غدہ درقیہ Thyroid gland	ہڈیوں کی نشونما، استعمال آکسیجن ، پیدائش حرارت ، لحمیات ، شحم ، نشاستہ ؛ پیدائش سے قبل اعصابی نظام کی نشونما
متبادل زیرتحقیق Triiodothyronine	غدہ درقیہ Thyroid gland	بنیادی طور پر مندرجہ بالا علمی تفصیل کے لیۓ مطلوبہ صفحہ دیکھیۓ
شکری قشریکوئڈ Glucocorticoids	غدہ کظر Adrenal cortex	تخلیق شکر ، ضد التہاب ، کابت مدافعت gluconeogenesis, anti-inflammatory Immunosuppression
متبادل زیرتحقیق Estradiol	مبیض Ovary	مادہ کے تولیدی اعضاء کی پرورش و ترقی، حیض میں ملوث
از حمل اسٹیرون Progesterone	مبیض Ovary	حیض کا (مصفر دور) luteal phase of menstrual cycle
خصیہ اسٹیرون Testosterone	خصیہ Testis	تخلیق نطفہ ، نر ثانوی تولیدی خواص
نزد درقی انگیزہ Parathyroid hormone	نزد درقیہ Para-thyroid gland	مصلی Ca+2 ، مصلی PO4
چونا کس Calcitonin	نزد جریب خلیاتِ درقیہ Parafollicular cell of thyroid	مصلی Ca+2
الڈواسٹیرون Aldosterone	کظری قشر Adrenal cortex	کلوی +Na
دوہائڈروکسی کولیکیلسیفیرول 1,25-dihydroxycholecalceferol	گردے Kidney	آنتی Ca+2 انجذاب ، معدنتِ استخوان
جزیرین Insulin	غدہ حلوہ (بیٹا خلیات) Pancreas (beta cells)	گلوکوز خون ؛ شحمی ترشہ خون ؛ امائنو ترشہ خون
زعامۂ شکر Glucagon	غدہ حلوہ (الفا خلیات) Pancreas (alpha cells)	گلوکوز خون ؛ شحمی ترشہ خون
انسانی مشیمہ غددجنسی مائلہ Human chorionic gonadotropin	متبادل زیرتحقیق Placenta	جسمِ مصفریہ میں ایسٹروجن اور پروگیسٹیرون تالیف
انسانی مشیمہ لبنیخالق Human placental lactogen	مشیمہ Placenta	دوران حمل ، پیش لبنی اور نمو انگیزہ جیسے خواص
1. Textbook of Medical Physiology, 11 edition; 2005, Guyton. W.B. Saunders Company 2. Review of Medical Physiology, 22 edition; 2005, Ganong. McGraw-Hill Medical

[ترمیم] حوالہ جات