Swahili
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
| Swahili | ||
|---|---|---|
| Inheimse name: | Kiswahili | |
| Gekald in: | Oeganda, Tanzania, Kenia | |
| Classificatie: | Niger-Congo Volta-Congo Bantoïde Bantoe in ènge zin G-Bantoe Swahili |
|
| Aantal sjpraekers: | 10 miljoen es mojertaol, 70 miljoen es twiede taol | |
| Cónservatiegraod: | neet bedreig | |
| Officieel taal: | Tanzania, Kenia | |
| ISO-639-code: | sw, swa, swh | |
Swahili is 'n Bantoetaol die in Oos-Afrika in e groet gebeed gesproke en verstoon weurt, mèt es kirngebeed de kös vaan Tanzania en Kenia. 't Dao levende volk, wat ouch Swahili geneump weurt, heet dees taol es mojertaol en telt oongeveer vief miljoen lui; daoneve spreke nog viefteg miljoen lui de taol in Kenia, Tanzania, Oeganda, Roeanda, Boeroendi en de grensstreike vaan dees len.
De Swahili zelf neume hun taol Kiswahili, mèt 't veurvoogsel ki- wat 'n taol aongif. Sommege prifferere ouch 't gebroek vaan deze letterlike naom in de Europese taole, andere höbbe gei probleem mèt de naom Swahili. De naom vaan taol en volk is aofgeleid vaan 't Arabisch sawahil, wat "kös" beteikent.
[bewirk] Besjrieving
't Swahili is 'n Bantoetaol, meh es taol vaan 'n islamitisch volk wat iewelaank handel dreef mèt de Arabiere en de Perze heet 't hiel väöl Arabische en Perzische wäörd opgenómme. Daoneve höbbe ouch 't Portugees (in de zestiende iew veural) en 't Ingels (tijens de kolonisatie) hun spoere achtergelaote in de taol. 't Bantoe-karakter vaan 't Swahili bliek wel oet de meneer boe-op ouch de leinwäórd behandeld weure: e woord wie kitabu ("book", vaan 't Arabisch kitâb) heet es miervajd vitabu en neet al-uktub. Hei is de ierste syllaab ki- es klasse-affix opgevat en in 't miervajd door 'n andert vervange, dewijl 't Arabisch 't woord in 't miervajd opebrik. De taol kint vief klasse vaan substantieve en kint bij verbe ouch e systeem vaan affixatie.
[bewirk] Dialekte
't Swahili is oontstoon in de havestad Zanzibar (veur de kös vaan Tanzania), en 't dialek vaan Zanzibar, 't Kiunguja is de basis vaan 't Staanderswahili. Ander dialekte weure in väöl vaan de len gesproke, sommege es volkstaol, sommege allein es twiede taol, wie 't Kingwana oet 't oeste vaan Kongo (Kinshasa). De dialekte vaan boete 't kirngebeed zien natuurlik hendeg door de andere dao gesproke (Bantoe-)taole beïnvlood. De taol vaan de Comore, 't Shikomor, weurt soms ouch es e Swahili-dialek gezeen. In de sloppewieke vaan Nairobi sprik me 't Sheng, wat ziech neet aon de grammatica vaan 't Swahili hèlt en veural es straottaol en pidgin gebruuk weurt.
