Usâmah bin Lâdin
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
'Usâmah bin Muhammad bin 'Awad bin Lâdin (Arabisch أسامة بن محمد بن عود بن لادن, in de Westerse wereld miestaal gesjreve Osama bin Laden; Ar-Riyâdh, 10 meert of 30 juli 1957) is 'ne väölgezochten terroris en 't hoof vaan Al-Qaedah. Heer kump oet 'n puissant rieke familie oet Saoedi-Arabië; mèt zien femiliekapitaol hèlt heer veur e groet deil zien organisatie op de bein. Zien oorsprunkelik doel waor de Amerikaanse bases oet zie vajerland eweg te kriege. Sins de groets opgezatte aonsleeg op 11 september 2001 gelt heer es de "miesgezochte maan op Eerd".
[bewirk] Biografie
Heer woort gebore es zoon vaan 'ne rieke bouwmagnaat, dee sterke ban mèt 't Saoedische keuningshoes had en gere nao ziechzelf verwees es "sjeik". Ziene vajer waor tien kier getrojd (meh noets mèt mie es veer vrouwe tegliek, wie de sjarî'ah dat veursjrijf); Usâmah waor oongeveer d'n twintegste zoon. In 1974 trojde heer veur d'n ierste kier. Sommege vaan zien kinder zouwe topfuncties höbbe in Al-Qaedah.
Wie in 1979 de USSR Afghanistan binneveel, begós heer zien loupbaon es militante moslim. Heer veurde 'n guerilla tege 't Roed Leger. Zien organisatie, Maktab-al-Chadamât, woort door de Vereinegde State gesteund. In 1988 splitsde heer ziech vaan dees organisatie aof en riechde Al-Qaedah op. Roond 1990 kierde heer ziech tege de Vereinegde State en de Saoedische regering, dee häöm dao-op verbande nao Soedaan. E kopstök oet de Arabische regering dao besjermde zien activiteite. In 1994 oonterfde zien femilie häöm en 't jaor daonao naom de Saoedische regering häöm zien staotsbörgersjap aof.
Tege 't eind vaan de jaore negenteg gong heer trök nao Afghanistan, boe de fundamentalistische Talibân de mach gegrepe had. Dao kós heer in alle rös trainingskampe opriechte. Wie heer in 2001 hoofverdachte woort vaan drei suïcide-aonsleef tege de VS, eisde de Amerikaanse regering tot de Talibân häöm oetleverde. Op häör weigering veel me 't land binne. Sinsdeen bleef heer spoorloos, al doke vaan tied tot tied videoben op, die door d'n Arabische nuitszender Al-Jazîrah woorte oetgezónde. Heer claimde dao opelik zien verantwoordelikheid veur de aonsleeg.
Op 23 september 2006 kaom de Franse gezèt L'Est Républicain mèt 't nuits tot Bin Lâdin volges de Saoedische regering de maond deveur aon tyfus gestorve zouw zien. In Pakistan sprook me dit evels tege.
[bewirk] Veurnaomste aonsleeg
- 29 december 1992, Gold Mihor Hotel, Âden, 2 doeje (mislök)
- 26 fibberwarie 1993, World Trade Center, New York, gein doeje (mislök)
- 7 augustus 1998, Amerikaanse ambassades, Dar-es-Salaam en Nairobi, 225 doeje.
- 11 september 2001, World Trade Center, New York en Pentagon, Arlington County, Virginia, 2973 doeje
- 11 miert 2004, Stasie Atocha, Madrid, ca. 300 doeje.
