Sida

From Wikipedia

Óyo ezalí ndámbo. Okokaka kosálisa mpé kobalusa.

Estimation de la répartition des personnes séropositives fin 2003

Sida (SIDA : Syndrome d’immunodéficience acquise na lifalansé ) epɛ́samaka na ngɛngɛ (virus).

Ngɛngɛ óyo epɛ́saka bokɔnɔ bwa Sida elímbisaka bokási bwa makilá ya moto. Ntángo ngɛngɛ êná ekɔ́tí na nzóto ya moto, ekoboma bakɛ́ngɛli ya makilá. Mpɔ̂ bangó ndé bapekisaka bokɔnɔ bokɔ́ta o nzóto ya moto. « Kobɛ́la bokɔnɔ bwa sida » elingí koloba ’te ngéngé yangó ekɔ́tí na nzóto ya moto mpé nsima ya mikɔlɔ akobɛ́la.

Etápe

1 Sida ebómbanaka mbúla míngi o káti ya nzóto
2 Ndéngé níni ngɛngɛ ya Sida epɛ́samaka ?
3 Ndénǵe níni tokokí komíkébisa na ngɛngɛ ya Sida ?
4 Tálá mpé

[kobalola] Sida ebómbanaka mbúla míngi o káti ya nzóto

Nsima ya bokɔ́tɛli bwa ngɛngɛ o nzóto, ekokí koleka mbúla míngi libosó nzóto elakísí kobɛ́la. Yangó wâná, nsima ya koyéba ’te ngɛngɛ ekɔ́tɛ́lí moto o nzóto, esɛ́ngɛ́lí kokɛndɛ nɔkí komɔ́na móngana.

Sɔ́kí na mokɔlɔ mwa lɛlɔ́, mínganga naíno basúkisi bokɔnɔ bwa Sida tɛ́, kasi nkísi ezalí mpɔ̂ ya kolɛ́mbisa bokási bwa ngɛngɛ êná. Nkísi wâná ndé ekopekisa nzóto ya moto ebɛ́la nɔkí bokɔnɔ bwa Sida.

Nsima ya bokɔ́tɛli bwa ngɛngɛ o nzóto, tokokí kopɛ́sa ngɛngɛ êná na moto mosúsu. Ngɛngɛ ekokí kopɛ́sama atâ sɔ́kí nzóto ya mokúmbi ngɛngɛ êná elakísí kobɛ́la tɛ́.

[kobalola] Ndéngé níni ngɛngɛ ya Sida epɛ́samaka ?

Ndéngé ya sida ekokí kotela moto o nzóto ntángo ya botámboli ya mwǎsí na mobáli sɔ́kí bamíkébísí tɛ́ na ekopekisa, tǒ ntángo ya bopɛ́si makilá, tǒ ntángo mwǎsí akúmbi zémi, sɔ́kí azalí na ngɛngɛ ya Sida akokí kopɛ́sa na mwǎna.

Ntángo ya botámboli ya mwǎsí na mobáli, sɔ́kí tomíkébísí na ekopekisa tɛ́ :

Mobáli nyɔ́nsɔ óyo azalí na ngɛngɛ ya Sida, akokí kopɛ́sa yangó mwǎsi ;
Mwǎsí nyɔ́nsɔ óyo azalí na ngɛngɛ ya Sida, akokí mpé kopɛ́sa yango ya mobáli ;
Mpɔ̂ ya baye bakɛndɛkɛ mibáli na mibáli, mɔ̌kɔ́ akokí kopɛ́sa moníngá ngɛngɛ ya Sida.

Mwǎsí ya zémi, sɔ́kí azalí na ngɛngɛ ya Sida na nzóto, akokí kopɛ́sa yangó na ndéngé misátó:

ntángo mwǎna azalí na libumu;
ntángo ya kobóta;
ntángo ya komɛlisa mwǎna mabɛ́lɛ.

[kobalola] Ndénǵe níni tokokí komíkébisa na ngɛngɛ ya Sida ?

Ntángo ya botámboli ya mwǎsí na mobáli : Káka ndé ekopekisa ekokí kopekisa ngɛngɛ ya Sida. Tokokí kosómba ebáteli na bisíká biyíké : esíká batɛ́kaka nkísi, makáyá tǒ masanga.