Filosop
From Wikipedia
Filosop (se Vöna-Grikänapük: φιλοσοφία, sinifü „sapilöf“), distü nolavs, no labon studadomeni gudiko pemiedetöl. In valem kanoy lelogön oni as töbid ad kontrolön u fümükön tikami ön mod krütik ä tikävik, as vätälam metodik, kel lüodikon buo lü plänäd valemik levala e dabina menik. Steifül alik ad miedetön suemodi: „filosop“ u studadomeni ona binon ya bal yegädas filosopa it.
Ba leced bo süvikün, filosop binälon in metod onik, no in möd lesetas, lesagas u teorodas. Studs onik pastabons su tikäl, e filosopans steifülons ad no gebön büocedis no pevestigölis u lekredi. Filosopans difons ma ceds oksik tefü binäl tikäla, e no baicedons tefü studadomen onik. Anans kredons, das filosop vestigon dunami it seivida. Votans lesagons, das dabinons lesets binälo filosopiks, kelis filosop muton vestigön e ba blöfön.
Do vöd: „filosop“ licinon in vönaoleikod vesüdik, pösods mödik in jenotem kulivas votik ebejäfons yegädis sümik ön mods sümik. Filosopans lofüdäna pabespikons in yeged: Filosop lofüdäna; filosopans Nolüda-Frikop e Smala-Siyop ye palecedons as lü filosop vesüdik dutöls, ibä äkosädons kösömiko ko Yurop.
