La Espero

El Vikipedio

La Espero estas la himno de la esperanta movado kaj do la "nacia himno" de Esperantio. L. L. Zamenhof (1859-1917) skribis la vortojn kaj, inter dekduo da arioj, tiu komponita de la belgo Félicien Menu de Ménil, marŝa venkmelodio fariĝis la plej fama, kvankam neniam oficiale aprobita fare de Universala Kongreso. Tiu preskaŭ militisma melodio ne estis la ario, per kiu la poemo unue kantiĝis. La unuan, nemarŝan melodion, komponis jam en 1891 la svedo Cl. Adelsköld. Dum la 1-a UK 1905 estis proponitaj du himnoj: tiu de Adelsköld kaj tiu de Ménil. Neniu el ili estis definitive akceptita kiel oficiala. La koncerna decido estis jena: ". . . la demando pri la universala himno estas prokrastata ĝis la venonta kongreso".

Juran oficialigon ĝi havis nur en 2001, pro la Konstitucio de la Esperanta Civito (tamen kun alia partituro: arĉoj kaj flutoj, anstataŭ tamburoj kaj trumpetoj).

Aŭskultu muzikon en la dosiertipo MP3 (performita de Akordo).
Aŭskultu muzikon en la dosiertipo MIDI

[redaktu] La Espero

En la mondon venis nova sento,

Tra la mondo iras forta voko;

Per flugiloj de facila vento

Nun de loko flugu ĝi al loko.

Ne al glavo sangon soifanta

Ĝi la homan tiras familion:

al la mond' eterne militanta

Ĝi promesas sanktan harmonion.

Sub la sankta signo de l' espero

Kolektiĝas pacaj batalantoj,

Kaj rapide kreskas la afero

Per laboro de la esperantoj.

Forte staras muroj de miljaroj

Inter la popoloj dividitaj;

Sed dissaltos la obstinaj baroj,

Per la sankta amo disbatitaj.

Sur neŭtrala lingva fundamento,

Komprenante unu la alian,

La popoloj faros en konsento

Unu grandan rondon familian.

Nia diligenta kolegaro

En laboro paca ne laciĝos,

Ĝis la bela sonĝo de l'homaro

Por eterna ben' efektiviĝos.

[redaktu] Eksteraj ligiloj

http://upload.wikimedia.org/wikipedia/eo/3/36/LaEspero.mp3
http://upload.wikimedia.org/wikipedia/en/b/b4/LaEspero.mid
Muziko de Adelsköld
- Adelsköld versio ĉi tie aŭdebla
Muziko de Achille Motteau (malmulte konata sed bele solena) Motteauversio ĉi tie aŭdebla
Muziko de Menu deMenil:
- http://www.geocities.com/lilandr/kantoj/eismaj/EnLaMondon1.htm
- Ralph Glomp: ĵus per kares' - specimenoj en dosiertipo MP3, enhavas du versiojn de "La Espero"

		Citaĵo el Enciklopedio de Esperanto
La Espero. Poemo de Z. „La gvidanto parolas al siaj adeptoj kaj ankaŭ al tiuj, kiuj ne jam sekvas lian standardon, kaj montras al ili la logan bildon de l' estonteco.“ (Artikolo de Behrendt en „Kongresa Jubilea Libro“ 1933.) v. Himno E-ista.

	ESPERANTO
Historio • Movado • Universalaj Kongresoj • Asocioj • Aktivuloj • Esperantistoj laŭ la nacieco
Kulturo • Literaturo • Muziko • Radiofonio • Filmoj • Verkistoj • Esperantologio • Kursoj
Portalo Esperanto
redakti