Sanskrit
From Wikipedia
Sanskrit (sanskr.: samskrta, vun sam "tosamen" un krta "maakt", Partizip Perfekt vun kr "maken": "tosamenföögt") is de klassische indische Kulturspraak un warrt in Indien siet ca. 1500 v. Chr. snackt. Se warrt mit de Devanagarischrift schreven.
Sanskrit höört to den indischen Tweeg vun de indoeuropääsche Spraakfamilie un hett so densülvigen Utgangspunkt as de modernen europääschen Spraken un as ok Latien und Greeksch. Dat disse Spraken verwandt sünd, kann een t.B. an den Wöör för Vader un Moder wiesen: matr un pitr op Sanskrit, mater und pater op Latien und Oolgreeksch (μητηρ un πατηρ). Ok de Grundstruktuur vun de Grammatik is liek, as t.B.: 3 Geslechten, Tall un Funktschoon vun de Kasus (Fäll), Tietsysteem. Dat Opdecken, dat Latien, Greeksch un Sanskrit so liek sünd, weer wichtig för dat Opkamen vun de Spraakwetenschop (kiek ok bi Ferdinand de Saussure).
För Indien is Sanskrit dat, wat Latien för Europa is. Dat weer al in de Antike en wichtige Kultuurspraak. Obschoonst vele buddhistische Texten op Sanskrit schreven sünn, warrt över Buddha vertellt, dat he sülben lever Pali (de Spraak vun den eenfachen Lüüd) snackt harr.
As dat in dat Johr 1981 tellt weer, geev dat noch ca. 6000 Lüüd, de Sanskrit as Moderspraak snacken. Und in't Johr 1961 hebbt ca. 190.000 Lüüd vertellt, dat se dat as Tweetspraak snacken kunnen.
Dat Düütsche hett 'n poor Wöör ut Sanskrit importeert: Arier, Aschram, Dschungel, Ingwer, Kajal, Mandala, Moschus, Nirwana un Yoga.
[Ännern] Externe Links
- Wikipedia op Sanskrit Dor is man bloots nix to sehn, wenn dien Nettkieker de indischen Tekensetten nich wiesen kann.
